Gûtirî mûgwatithania gatîgatî ka Ayubu na Ngai
9
1 Rîru Ayubu acookia auga,2 “Ûmma, imbiyî atî i bu gûkari ûgu.
Îndî n'aata muntû aûmba kwîgua arî mwagîru mbere ya Ngai?
3 Muntû akîenda gûturania mbaara n'we,
atikîûmba kûmûcookeria kiugo nwa kîmwe kuuma kîrî biugo ngiri.
4 Ûûme bwake i bûûnene, inya yake n'înene.
N'ûû waamûrega na aûmbana?
5 Athiiyangagia irîma bitakûmenya
na akabigarûrania athûûri.
6 Ainainagia nthîgûrû kuuma bantû aayo,
na agatûma itugî biayo bithetema.
7 Aaragîria riûa na rîtithararaga,
agakunîka werû bwa nthata.
8 N'we wenka ûtambûrûkagia îgûrû
na agakinyanga makûmbî ma îria.
9 Nwe aûmbire ikundi bia nthata, Ndûba, Orioni, Kîrîmîra
na ikundi biingî bia mbarî ya naiti.
10 Arûthaga marigarania mataereeka,
biama bira bitatarîka.
11 Rîra ankûrûka, ntiûmba kûmwona,
rîra akûrûkîîra akubî naani, ntiûmba kûmûmenya.
12 Akathûkia rî, n'ûû amûgiria?
N'ûû amûûria, ‘N'aata ûkûrûtha?’
13 Ngai atigarûraga mûthûûro wake,
i bamûturagîria maru bara kinya bo bateethagia nyamû îra nene ya îria îîtagwa Raabu.
14 N'ata îîndî niû mbûûmba kûmûcookeria?
Ndaûmba kwona mîgambo ya gûcookania n'we?
15 Wana kinya ûkeegua ntarî na mabîtia, ntiona bwa kûmûcookia,
nwaka mbereka mûgiiti magamba akambîgîîrua kîao.
16 Kinya nkamwîta akaambîtîga,
ntiîtîgia kana akûnthikîîria.
17 N'ûntû andiingaga na kîbuubani
na akaingîyia ironda biakwa gûtarî na gîtûmi.
18 Atirekaga mbeeba
îndî ikûmbûyûria ûrûrû.
19 Ûkeegua i mantû ma inya, arî n'yo!
Na ûkeegua i mantû ma gûtua îgamba, n'ûû amûgambithia?
20 Kinya nkeegua ntirî na mabîtia, kanyua gaakwa nwa kangambithie,
kinya ûkeethîrwa ntirî na ûthûûku, gakiumbûra ndî na mabîtia.
21 Wana wegua ntirî na mabîtia,
ntiîmakagîra,
imbûthagia mûtûûrîre wakwa.
22 Nwa bûmwe, i kîo gîtûmaga mbuga,
‘Athiragia ûra mwagîru na ûra mûthûûku bûmwe.’
23 Rîra ûthûûku bûreetaga gîkuû gîa mpwî,
athekagîîra magerio ma ûra atarî na mabîtia.
24 Rîra nthîgûrû îkwathwa i muntû ûmûthûûku,
ka aingaga meetho ma agambithania baayo,
wegua t'we rî, n'ûû îndî?
25 Ntugû ciakwa iriugia nkûrûki ya muugia rwîro,
irîbuurûûka itarî na wega.
26 Iriugia ta matarû ma nthanje,
ta ndiiû ciîndamîîte kûgwata nyamû ya kûrîa.
27 Nkaaya kuuga, ‘Nkaariganîrua i kûnung'una gwakwa,
nkaagarûra mwonekere wakwa, na kûthekatheka.’
28 Nwa ngûkuthûka inyamaara biakwa,
n'ûntû inkûmenya ûtintara ntarî na mabîtia woû, Mwathani.
29 N'ûntû nwamboneetwe ndî na mabîtia rî,
nkaathîîna mana i kî?
30 Kinya nkathamba na sabuni
na nkathamba njara ikathera ata,a
31 nwa akîngera îrinyaani
bûra kinya nguo ciakwa ikînthûûra.
32 Ngai ti muntû ta niû kaingo mûcookia,
atî tûrûngamana kootiini.
33 Ta ûkaaya kwîgua kûrî na wa gûtwathûrana
kana wa gûtûgiitîra îgamba,
34 muntû wa kûrutaruta mûraagi wa Mwathani kuuma kîrî niû,
kaingo kûmakania gwake gûtanguayia kaîrî.
35 Rîru ndaaria ntakûmûkuthûka,
îndî bûra nkari îîndî, ntiaria.