Mbirindandi ariuga Ayubu nwa mwanka eerire
8
1 Rîru Mbirindandi ûyu Mûsui aacookia aûria,2 “Woû ûkaaria mîgambo îno mwanka rî?
Mîgambo ya kanyua gaaku îkari ta kîbuubani kîînene.
3 Ka Ngai atuuyaga îgamba bûra gûtaagîrîîte?
Ka Mwene Inya akoombagia bûra kûbatîîrue?
4 Rîra aana baaku beeyiirie mbere yake,
n'aabengatiirie n'ûntû bwa wîyia bwao.
5 Îndî ûgaceria Ngai,
na ûkeereka Mwene Inya,
6 wegua ûrî ûmwagîru na ûrî ûmûrûûngaru,
kinya îîndî agaûkîîra n'ûntû bwaku
na agûcookanîîrie bantû aaku ara aagîrîîte.
7 Kinya wegua mwanjîîrio waku warî ûmûniini,
ntugûûni ciaku cia nyumaani ûkeegua ûrî ûmûnene mûno.
8 Ûria nthuke ira ikûrûkîîte
ûmenye bûra beethe baathoomire,
9 n'ûntû tûraciarirwe îgoro na gûtirî bu twiyî,
na ntugû cietû aaga nthîgûrû nwa ta kîrundu.
10 Batikûrutana na bakwîre?
Batiiruta mîgambo kûringana na kwerewa kwao?
11 Mûrindûrindû nwa ûraayîe bantû gûtarî na kîrimba?
Nthanje nwa ikûre bantû gûtarî na rûûyî?
12 Wa igîkûraga woogu na itarî nteme,
ciûmaga na mpwî nkûrûki ya nyaki.
13 I bu mûthia wa bara bonthe bariganagîrua i Ngai ûkari,
mwîrîgîîro wa muntû ataiyî Ngai i bu ûthiraga ûgu.
14 Kîra eetîgîîtie gîkaanyagaara
kîra eerîgagîîra i rûûî rwa mbûbûî.
15 Eetiirîkanagia na nyomba yake, îndî îtirûngama,
akeerûmanîîria n'yo, îndî îteerikîrie.
16 Akari ta kîmera gîîtûûrîrie rûûyî bwega kîrî mwathûûni,
gîtambîîtie mîri yakîo mûndaani,
17 kîrigicagîîria mîri yakîo kîthûmbaani kîa maiga,
na gîgaceria bantû gatîgatî ka maiga.
18 Îndî rîra gîkeenyangua kuuma bantû aakîo,
bantû agu agagîkaana na auge, ‘Ntaaro kwona.’
19 Gîkî i kîo gîkeno kîa njîra yaake,
na bangî bakauma bwa nthîgûrû.
20 Ûmma Ngai atiregaga muntû atarî na mabîtia
kana eekîra njara cia bara barûthaga moothûûku inya.
21 Amwe na ûgu akaûyûria kanyua gaaku ntheko
na mîromo yaku tûyû twa nkena.
22 Anthû baaku bagaakunîkwa na îgi,
na marema ma bara bathûûku mationwa kaîrî.”