Kînyamaara kîa Ayubu gîtarî mûthia
7
1 Muntû atirî na ngûgî îmbûmo îgûrû rîa nthîgûrû?Ntugû ciake ti ta ntugû cia mwandîkwa?
2 Ta mûruti ngûgî ûra eeriragîîra irundu bia ûgoro,
ta mwandîkwa eeteereete mûcaara wake,
3 I ta bu naani mpeetwe mîeri ya mana,
na ndaneenkerwa mootugû ma thîîna.
4 Rîra ndaamaama nthûgaanagia nkaûria,
‘Ngaakara îgiita rîgana ata nkîîya gûûka?’
Ûtugû bwîgagua bûrî bûraaya,
naani nkagaragara mwanka rûkîîrî.
5 Mwîrî wakwa ûûyûrîîte maginyo na weere,
rûûo rwakwa i rûtembûkangîîte na i rûkuuma maira.
6 Ntugû ciakwa irîkûrûka na mpwî nkûrûki ya rûrigi rwa mûtumi,
na ikathira gûtarî na wîrîgîîro.
7 Woû Mwathani, ririkana atî ûtûûro bwakwa i ta mûruke,
meetho maakwa matikooro moona gîkeno kaîrî.
8 Riitho rîra rîkûûmbona rîtiimbona kaîrî,
bûgaanceria, îndî ûtiîgua ndî oogo.
9 Wa ta bûra îtu rînyagaaraga na rîkathi,
nwa ta bu ûra athiiyaga nthikooni atacookaga.
10 Atikooro aaya mûciî wake kagiita kangî,
bantû aake atimûmenya kaîrî.
11 Kwoogu, ntiikira,
nkaaria nainya ndî na mûthûûro wa nkoro yakwa,
nkaanung'una na marûrû ma nkoro yakwa.
12 Ka ndî njoka îra nene, kana nyamû îra nene ya îria,
kaingo ûmbaigagîra akaria?
13 Rîra nkûthûgaania ûrîrî bwakwa bûkambooreeria
na bantû aakwa a kûmaama akaanyiyia gûkaya gwakwa,
14 kinya rîru bûnguayagia na irooto
na bûkaamakia na bioneki.
15 Na n'ûntû bwa ûgu nkathuura guitwa na gûkua,
bantû a mwîrî ûyû wakwa.
16 I nkûmeneeria mûtûûrîre wakwa, ntiutûûra tene na tene.
Tigana naani, ntugû ciakwa itirî na gîtûmi.
17 Ka muntû arî mbi n'ûntû ûrî na bata nwe ûûgû,
na ûmûthikîîria mûno,
18 kaingo ûmûthima wa kîra rûkîîrî
na ûmûgeria kîra îgiita?
19 I rî ûgaatiga kûndaitha,
kana ûreka mmeria mata?
20 Wegua mbîyîîtie rî, n'ata nkûrûthîîte,
woû mûcûûbîri wa antû?
I kî n'ûntû ûntuîkithîîtie gîntû gîaku gîa kûthima?
Ga ntuîkîîte mûrigo kîrî woû?
21 I kî n'ûntû ûtakûndekera mabîtia maakwa
na ûndekera meeyia maakwa?
N'ûntû îgiita rîtarî rîraaya nkaamaama tîîriini,
ûgaanceria, îndî ûtiîgua ndî oogo.”