Ayubu ariuga îgamba rîake i rîa mma
6
1 Rîru Ayubu aacookia auga,2 “Ûtakîîgua mûthûûro wakwa waathimwa,
na kînyamaara gîakwa kîonthe gîgeekîrwa kîthimiini!
3 Ûmma wîgua kîrî kîrito nkûrûki ya mûthanga wa îria,
na i ntûma ndariirie na mpwî.
4 Mwene Inya n'andathîîte na mîgwî,
na nkoro yakwa n'îkûnyua cûmû yaayo;
imakania bia Ngai i biîbangîîte îgûrû rîakwa.
5 I ka îng'ooi rîa kîthaka rîanagia rîrî nyakiini?
Kana ng'ombe yaania îrî rûriîni?
6 Irio bitarî na mûcamo biarîîka bitarî mwonyo?
Mûruru ûra mûyerû wa îkome ûrî mûrîo?
7 Ntikwenda kûbitonga,
irio ta bibu i bitûmaga mbayua.
8 Ûtakîîgua nkîewa kîra nkwenda,
Ngai akaaneenkera kîra mbîrîgagîîra,
9 atî Ngai akîenda kûnthithira,
akaregeria njara yake na kûngiitania!
10 Agu n'oogo ngîkirakirua kinya îîndî,
îî, nkîbûûmîîria ûrûrûûni bûtagûntiga,
n'ûntû ntaakaana mîgambo ya Ûra Mûtheru.
11 Inya yakwa n'îrîkû, kinya mbeteere?
Na mûthia wakwa i mbi, kinya ncueteere?
12 Ka ndî na inya ta ya iga?
Kana mwîrî wakwa ûrî rûthuku?
13 Ndî na inya ya gwîteethia,
ta îîndî kûûmbana wakwa kûrutarutîîtwe kuuma kîrî niû?
14 Muntû ûra athirîrîîtwe abatîîrue kwona ûteethio kuuma kîrî acoore,
kinya agatiganîria gûkuthûka Mwene Inya.
15 Îndî acoore baakwa ti bakwîrîgîîrwa,
nwa ta tuuro tûgûmba,
ta tuuro tûra tûûyûraga tûkaunûka,
16 rîra twîkîrîtwe mwindu i mbaraabu
na twaimba i mbaraabu îgîkanjûka,
17 îndî tûgatiga kûthi kwara,
na kagiita ka thaano tûkabwa.
18 Mîkondo ya nkamîîra na athiithia baacio baûndûka kuuma njîraani ciao,
beetagia rwanda bakaûra.
19 Mîkondo ya kuuma Tema îceragia rûûyî,
abiacaara ba Seba baraithaga na wîrîgîîro.
20 Barî na nthoni n'ûntû i beebîtîgagia,
baakinya oogo, bagakua nkoro.
21 Kinya biû bûkari wa ta miuro înu kîrî niû,
bûrîona ûntû bwa kûmakania bûkamaka
22 Ndaro mbwîra bûmpe gîntû,
bûmpe gîntû kuuma ûtongaani bwenu?
23 Bûntunyukia kuuma njaraani cia mûnthû,
bûnkûûra kuuma kîrî bara bambinyagîîria?
24 Ndutanaani, na ngaakira,
mboniani ara mbîtîîtie.
25 N'ata mîgambo ya gwîtîgîka îrî ûrûrû!
Îndî nkarari cienu irîmbonia ata?
26 Ka bûkwenda kûruta bûra nkuuga mabîtia,
na bûtuîkithia mîgambo ya muntû wîtîîyîrîîte ta mîruke?
27 Nwa bûriinge kuura îgûrû rîa bara batarî na beethe
na bûkeendia mûcoore wenu.
28 Îndî îîndî ndaithaani na kîao,
nwa mbûrongoyie meethooni?
29 Garûkaani, bûtigantuîre bûra gûtaagîrîîte,
îî, garûkaani, n'ûntû nwa ngwatîrîîte wagîru bwakwa.
30 Kûrî na ûthûûku nwa bûrîkû mîromooni yakwa?
Kanyua gaakwa gatiûmba kwathûrana mantû maathûûku?