5
1 “Îtana îîndî wone wegua kûrî we agaagwîtîga!N'ûû wa bara batheru ûkaûndûkîra?
2 N'ûntû mûthûûro ûûragaga muntû ûmûtaku,
rûriitho naru rûkaûraga kîaa.
3 I mboneete biaa bikiuma mîri,
îndî nthûti îmwe mûciî wake waarumwa.
4 Aana baake barî kûraaya na kwîgua batarî na thîîna,
nabo bainyîîrîîtue kootiini gûtarî wa kûbatheteera.
5 Bara barî na yûûra baarîa maketha maake,
bamaruta kinya gatîgatî ka mîîgua,
na bara barî na bûûta baugagîria ûtonga bwao.
6 N'ûntû ûthûûku bûtiumaga mûthangaani,
kana thîîna yuuma nthîgûrû,
7 îndî muntû aciaragwa kaingo agwata kînyamaara
wa ta bûra ndathe ithûngûthaga îgûrû.
8 Îndî ûkîîgua i niû, ngîceria Ngai,
nkiira thîîna ciakwa mbere yake.
9 Wee ûra arûthaga mantû maanene, matamenyekana,
biama bitatarîka,
10 aurithagia mbura nthîgûrû,
akaira rûûyî îgûrû rîa nthîgûrû.
11 Aûkagîîria bara barî nthî,
na bara barî na kîeba bagaûkîîrua beegue barî mayîîga.
12 Wee agarûraga mataaro ma arongo,
kaingo njara ciao itikaûmbe kûûyûria mîbango yao.
13 Agwataga bara barî na ûûme ûûgîîni bwao,
na mîbango ya bara baûgî îgaciatwa.
14 Mwindu ûbaayagîîra mûthenya,
baataataga mûthenya wa ta ûtugû.
15 Oonokagia nkîa kuumania na rûûyiû rûrî kanyua kaao,
aboonokagia kuuma njaraani ya ûra arî na inya.
16 Kwoogu, nkîa inu irî na wîrîgîîro,
kûrûtha ûthûûku ibûkunîkaga kanyua gaake.
17 Muntû ûra Ngai akaanûkagia arî kîthaarimo,
kwoogu ûtikaabûthîîrie gûkaanûkua i Mwene Inya.
18 N'ûntû we n'aguraragia, îndî kaîrî n'oogaga,
we n'eekagîra kîronda, na akooria na njara ciake.
19 Wee agakwonokia kuumania na inyamaara bithanthatû,
kinya na mûgwanja, gûtirî ûthûûku bûgaakûringithia.
20 Îgiita rîa yûûra agagûkûûra kuuma gîkuûni,
na ndûani agagûkûûra kuumania na inya ya rûûyiû.
21 Ûkaithwa kuumania na kînyamaara kîa rûrîme,
na ûtiîgua ûguaya rîra kwînyangua gûkaaya.
22 Woû ûkaathekeera thîîna na yûûra,
Îndî ûtiikuthûka nyamû ira nthûûku cia nthî.
23 N'ûntû ûkeegua ûrî na ngwatanîro na maiga ma rwanda,
nacio nyamû cia rwanda ikeegua irî na ûkiri naawe.
24 Naawe ûkaamenya atî îrema rîaku rîrî mayîîga,
ûkaathûûrima into biaku, na ûtiona kûrî kîo kiûru.
25 Kaîrî ûkaamenya atî rûciaro rwaku rûkeegua rûrî rwingî,
na nciarwa ciaku ikeegua ikari ta nyaki ya nthîgûrû.
26 Ûgaakinya nthikooni ûrî na ûkûrû bûûganîîru,
ta bûra nyamba ya ngano îîgagua îkari îgiita rîayo.
27 Raitha, mama i tûmathigaanîîte, i bu makari,
mathikîîrie, ûmamenye wengwa.”