Erifasi ariuga Ayubu n'eyîîtie
4
1 Rîru Erifasi ûyu Mûtemani, aacookia auga,2 “Muntû akageria kwaria naawe, ûkaûmîîria?
Îndî n'ûû aûmba kwîgwata atikaarie?
3 Raitha, woû n'ûrutanîîte antû baingî,
na weekîra njara ira ciarî indigooyu inya.
4 Mîgambo yaku n'îtiirîîte bara batarataraga.
Naawe nwîkîrîîte inya maru matarî na inya.
5 Îndî îîndî mathîîna magûkûûyîîra, naawe ûtikûmaûmîîria,
magûkûringithia, na wanyamaara mûno.
6 Anga gûtîîya Mwathani gwaku tiku kûûmîîria gwaku,
na njîra ciaku imbega wîrîgîîro bwaku?
7 Ririkana, itû, n'ûû aarothîîna atarî na mabîtia?
I kû antû baagîru baarothirua?
8 Ta bûra mboneete, bara baciimbaga moothûûku,
na bara baandaga thîîna, bakethaga cio.
9 Bathiragua i mîruke ya Ngai.
Na bakathirua i mîruke wa mûthûûro wake.
10 Cimba nwa irurume, wana kinya tuunga twacio,
îndî magego maacio i maunaange.
11 Cimba n'îkuuyaga i kwaga biakûrîa,
nabo aana ba cimba ya nka bakanyagaara.
12 Ndaareteerwe kiugo na witho,
matû maakwa maathikîîria kîoye gîakîo.
13 Gatîgatîîni ka mathûgaania ma kûmûtanga kuumania na bioneki bia ûtugû,
rîra toro îndito îgwataga antû.
14 Ûguaya bwangwata na kwinaina,
na kwathetemia mîîndî yakwa yonthe.
15 Rîru kîrundu gîakûrûkîîra mbere ya ûthiû bwakwa,
na ntundu cia mwîrî wakwa ciarûngama.
16 Kîrundu gîku kîarûngama,
îndî ntaûmba kwona mûkariî wakîo.
Mûbuanaano warûngama mbere ya meetho maakwa,
na ndeegua kayû gakîûria,
17 ‘Kîûmbe kîethîrwa na wagîru nkûrûki ya Ngai?
Muntû eegua arî mûtheru nkûrûki ya mûûmbi wake?
18 Ûkeegua Ngai atigwîtîgia kinya aruti ngûgî baake,
agatarîra araîka baake mabîtia rî,
19 î bara batûûraga nyomba cia ntaga ti nkûrûki,
bara mîcingi yao îrî tîîriini,
bara bathithirûkaga nkûrûki ya kîrabuutia!
20 Gatîgatî ka rûkîîrî na ûgoro baunangagwa tûcuncî tûcuncî,
bakaûra tene na tene na gûtirî we amenyaga.
21 Ka mîkanda ya îrema rîao îtaakuuyua,
kaingo bakua batarî na ûûme?’ ”