Ayubu aruma ntugû îra aaciarirwe
3 “Îroûra ntugû îra ndaaciarirwe,
na ûtugû bûra kwaugirwe,
Kaana ga kamuntû karûme gakûgîa nda.
4 Ntugû înu îrootuîka mwindu,
Ngai atikaamîraithe kuuma îgûrû,
na werû bûtikaamîthararîre.
5 Îgwatwe i mwindu, mwindu mûtheri, ûtuîke wayo.
Îtu rîkare îgûrû rîayo.
Ga kîra kîonthe gîtûmaga ntugû îgîa mwindu kîmîkunîkanie.
6 Ûtugû bûbu, bûroogîa mwindu ûmûnene,
Bûtigaatarwe ndeeni ya ntugû cia mwanka,
kana bwîkîrwa ndeeni ya îthaabu rîa mîeri.
7 Raitha, ûtugû bûbu bûrootuîka nthaata,
na gûtikeeguîke ndeeni yaabu kayû ga nkena.
8 Babu barumaga mîthenya baroobûruma,
bara beethuuranîrîîte gûûkia nyamû îra nene ya îria îîtagwa Rebiathani.
9 Nthata cia rûkîîrî rwayo irootuîka mwindu,
îroeteera werû bûkaûra kûrû bûtikaabuone,
na îtikoone mînyîîrî ya rûkîîrî.
10 N'ûntû bûtainga mîrango ya nda ya taata,
kana bûndigîîria kwona thîîna.
11 I mbi yagiriirie nkua rîra ndaaciaragwa,
nta mwoyo nkiuma nda ya taata?
12 I kî gîatûmire mbaambîîrua bierooni,
na nyonto ciîgua îrî oogo mbonka?
13 N'ûntû ndaayaga kûmaama na gûkirîîria.
Ndaayaga kûmaama na kûnogoka,
14 amwe na anene na ataari ba nthîgûrû,
bara beebakîrîîte nyomba ira îndî ciatuîkire maganjo,
15 kana amwe na atongoria bara baarî na thaabu,
bara baûyûrîtie fetha mîciî yao.
16 Kana i kî n'ûntû ntaathikwa ta kaana kara gaciaragwa karî gakuû,
ta kagenke kaniini kara gatoona werû.
17 Naagu antû baathûûku i batigaga kûthîînania,
naagu i noogo bara baanogire banogokeete.
18 Naagu agwate beegagua barî na kînogoko,
batiîgagua kayû ka mûrûngamîri wao.
19 Anene na aniini barî naagu,
mûruti ngûgî n'ûmûrekeerie kuuma kîrî Mwathi wake.
20 I kî n'ûntû bara barî thîînaani beetwe werû,
na bara barî na marûrû nkorooni beetwe mwoyo,
21 bara beeteereete gîkuû, îndî batigûkîona,
ba gûgîceria nkûrûki ya gûceria ûtonga bûûthike,
22 bara bakeneete mûno,
na kûgwîrua boona nthiko?
23 I kî n'ûntû muntû aingîrîîtwe njîra eetwe mwoyo,
ûra Ngai acîgîîrîîtie katheng'eng'aani?
24 N'ûntû gûkaya gwakwa gwakarire ta irio biakwa,
na kûrîra naku kûrîîtîga ta rûûyî.
25 N'ûntû ûntû bûra nkuthûkaga i bûngwataga,
nabu bûra bûmbîkagîra ûguaya i bûmbûyagîîra.
26 Niû ntikwona ûkiri kana gûkirîîria,
ntinogokaga, i ndîîyaga thîîna.”