Saitaani aageria Ayubu kaîrî
2
1 Ntugû îmwe araîka i baathiire kwîbonania mbere ya Mwathani, na kinya Saitaani aathiiyania nabo, kaingo eebonania mbere ya Mwathani. 2 Mwathani aûria Saitaani, “Wauma kû?” Saitaani acookeria Mwathani, amwîra, “Ndauma kûriûngariûnga nthîgûrû, na kûthi na gûcookanîîria ku.”3 Mwathani aûria Saitaani, “Ûkwona mûruti ngûgî ûyu wakwa Ayubu? Gûtirî we nthîgûrû akari t'wee, muntû ûmûkinyanîru na ûmûrûûngaru, muntû ûtîîyaga Ngai na n'areganîîte na kûrûtha ûthûûku; n'we kinya îîndî n'agwatîîrîîte wagîru bwake, wana wegua n'wambîîngîîre kaingo mûthîînia ûtheri.”
4 Saitaani acookeria Mwathani amwîra, “Rûûo kwa rûûo, muntû nwa arute bionthe bira arî nabio n'ûntû bwa mwoyo wake. 5 Îndî îîndî ta tambûrûkia njara na ûringithie mwîrî wake na mîîndî, na ûmma agakûruma meethooni.”
6 Mwathani eera Saitaani, “I bu. Wee arî njaraani ciaku; îndî ûtigaatonge mwoyo wake unka.” 7 Kwoogu, Saitaani auma mbere ya Mwathani, aaringa Ayubu na moote maathûûku kuuma mbayo mwanka nthontia. 8 N'we aathûkia rûgîo rwa nyûngû rwa kwîthûa naru; aakara nthî muuni.
9 Mwekûrû wake amûûria, “Nwa ûthiîte na mbere kûgwatîîra wagîru bwaku? Ûtirume Ngai ûkue!”
10 Îndî we amûcookeria amwîra, “Woû ûrîaria ta ûmwe wa aka bara biaa. Ga tûkaagwata meega akî kuuma kîrî Ngai, na ti thîîna?”
Mantûûni mama monthe, ataaria wîyia na kanyua gaake.
Acoore bathatû ba Ayubu
11 Acoore bathatû ba Ayubu, Erifasi Mûtemani, na Mbirindandi Mûsui, na Sofari Mûnaamathi, bakûgwata ntûmwa ya moothûûku mamu monthe maamûgwatîîte, bauma kwao baarîîkana amwe baathi kûmûkirakiria. 12 Bakwona Ayubu barî gataaria bataamûmenyaga baanjîîria kûrîra na inya. Baatembûranga nguo ciao na beetûûra tîîri biongo biao. 13 Rîru baakara nthî amwe n'we îgiita rîa ntugû mûgwanja, mûthenya na ûtugû, na gûtirî ûmwe aaria n'we kiugo nwa kîrîkû, n'ûntû boonire kînyamaara kîra aarî nakîo i kîînene mûno.