AYUBU
Ayubu aagerua i Saitaani
1
1 I kwarî na muntû nthîgûrû ya Usi, eetagwa Ayubu. Muntû aarî ûmwega na ataarî ûguute, n'we n'atîîyaga Ngai, na n'areganîîte na ûthûûku. 2 N'aciarîîrwe nthaka mûgwanja, na aarî bathatû. 3 Ûtonga bwake nabu bwarî ng'ondu ngiri mûgwanja, nkamîîra ngiri ithatû, ncamba cia kûrîma ngiri, mang'ooi maake maarî magana mataano, na aruti ngûgî ba mûciî baingî mûno. Kwoogu muntû ûyu n'aarî muntû ûmûnene mûno nkûrûki ya antû bonthe ba rûteere rwa uumîîro bwa riûa. 4 Nacio nthaka ciake ciathiiyaga kîatho mûciî woora ûmwe waciao wa muntû na ntugû yake; na i beetaga aaragina barî bathatû kaingo baaya kûrîa na kûnyuunyanîra amwe nabo. 5 Rîra biatho bibi biarîîka, Ayubu n'aatûmanaga kaingo batherua. Rûkîîrî gacaitîrî n'aarutagîra woora mwana kîgongwana gîa kûbîîthua akauga, “Kwaûmbîka ûkeegua aana baakwa ibeeyîîtie na baaruma Ngai nkorooni ciao.” Gaku kaarî kamenyeria ka Ayubu.6 Ntugû îmwe araîkaa i baayire kwîbonania mbere ya Mwathani, na kinya Saitaani aayania amwe nabo. 7 Mwathani aûria Saitaani, “I kû wauma?”
Saitaani aacookeria Mwathani amwîra, “Ndauma kûriûngariûnga nthîgûrû, na kûthi na gûcookanîîria ku.”
8 Rîru Mwathani aûria Saitaani, “Ûkwona mûruti ngûgî wakwa Ayubu? Gûtirî we akari t'wee nthîgûrû, muntû ûmûkinyanîru na ûmûrûûngaru, muntû ûtîîyaga Ngai na akuthûkîîte kûrûtha ûthûûku.” 9 Saitaani acookeria Mwathani amûûria, “Ga atîîyaga Mwathani ûtheri? 10 Ûtimûkarîîtie nteere cionthe, amwe na mûciî wake, na into biake bionthe? N'ûthaarimîîte ngûgî cia njara ciake na ûtonga bwake bwongeereka nthîgûrû. 11 Îndî ta taambûrûkia njara yaku îîndî, ûringithie bibu bionthe arî nabio, wone bûra agaakûruma meethooni.” 12 Mwathani eera Saitaani, “I bwega, bionthe bira arî nabio birî njaraani ciaku; îndî ûtikaamûtonge we wengwa.”
Kwoogu Saitaani auma mbere ya Mwathani.
13 Ntugû îmwe, nthaka na aarî ba Ayubu baarîîyaga kîatho na bakînyuunyaga ndibei mûciî wa mûruagina ûra mûkûrû, 14 mûtûmwa aaya kîrî Ayubu amwîra, “Ncamba irîrîmaga na mang'ooi marîîthîîtue waagu akubî nacio, 15 Aseba baithûkire baathi nacio. Baûraga aruti ngûgî na rûûyiû, nwa niû ninka ndaamonyoka ndaaya gûkwîra!”
16 Wa akîaragia woogu, mûtûmwa ûngî aaya amwîra, “Mwanki wa Ngai wagwa kuuma îgûrû wabîîthia ng'ondu na aruti ngûgî, nwa niû ninka ndaamonyoka ndaaya gûkwîra!”
17 Ûyu wa akîaragia woogu, mûtûmwa ûngî aaya amwîra, “Ikundi bithatû bia Akarindea biithûkire biaiya nkamîîra ciaku baathi nacio. Baûraga aruti ngûgî na rûûyiû, na i niû ninka ndaamonyoka ndaaya gûkwîra!”
18 Wa akîaragia woogu, mûtûmwa ûngî amwîra, “Nthaka ciaku na aarî barîrîîyaga kîatho na bakînyuunyaga ndibei barî nyomba ya mûruagina ûra mûkûrû, 19 nthûti îmwe kîbuubani kîînene kuuma rwanda kîîyire kîaringa koona irî inya cia nyomba. Yaboomokera baakua, i niû ninka ndaatigara ndaaya gûkwîra!”
20 Rîru Ayubu aûkîîra, aatembûra nguo yake, eenja kîongo gîake. Eegûîthia nthî, na aagonga Ngai, 21 akiugaga, “Niû ndaumire nda ya taata ndî ûtheri, na nkaathi ndî ûtheri. I Mwathani ampeere, na i Mwathani aathûkia; riîtwa rîa Mwathani rîrookumua.”
22 Mantûûni mamu monthe Ayubu ataarûtha meeyia athetia Ngai.