Antû ba Isiraeri beerira meeyia maao
9
1 Ntugû ya mîrongo îîrî na inya ya mweri ûyu wa mûgwanja, antû ba Isiraeri beethîrana amwe, baatîîrîra kûrîa irio na beekîra nguo cia nkunia na baaka tîîri biongo kwonania kwîrira kwa meeyia kwao. 2 Bara baarî ba rûrîîyo rwa Isiraeri i baarî bakwîbathûrana na antû ba mîgongo îra îîngî. Baarûngama kwîrira meeyia maao na ûthûûku bwa biûyûyû biao. 3 Gwa kagiita ka mathaa mathatû, baarûngama wa ara baarî na baathooma îbuku rîa watho bwa Mwathani Ngai wao na gwa kagiita ka mathaa mathatû beerira na baagonga Mwathani Ngai wao. 4 Njesua, Bani, Kandimieri, Sefania, Mbuni, Serebia, Mbani na Kenani baarûngi bantû aûkîîru a Arawi na baromba Mwathani Ngai wao na kayû kaanene mûno.5 Atongoria ba Arawi tabo, Njesua, Kandimieri, Bani, Asabuneya, Serebia, Ondia, Sefania na Pethaya beera antû, “Rûngamaani bûkumie Mwathani Ngai wenu, ûra atûûraga tene na tene! Antû bonthe bakumie riîtwa rîake rîra rîrî mwago, na rîrî îgûrû mûno nkûrûki ya ithaarimo na gûkumia.”
Îromba rîa kwîrira
6 Na antû ba Isiraeri baaromba îromba rîrî, “Woû wenka, i woû Mwathani, waûmbire îgûrû na njûûrî yaarîo yonthe, nthîgûrû na bira bionthe birî ku, îria na bionthe bira birî ndeeni yarîo, ûnenkagîra bionthe mwoyo, na njûûrî yonthe ya îgûrû n'îkûgongaga. 7 Woû i woû Mwathani Ngai ûra wathuurire Aburamu, wamûruta Uri ya Akarindeaa na gwamwîta Îburaîmu. 8 Wamwona arî mwagîru, na waiga kîrîîkanîro n'we gîa kûneenkera nciarwa ciake nthîgûrû ya Akanaani, Aiti, Amori, Aperisi, Anjebusi na Angirigasi. Na waingia wîrane bwaku n'ûntû woû ûrî mwîtîgua.
9 N'wonire kînyamaara kîa biûyûûyû bietû rîra baarî nthîgûrû ya Miisiri, na bagûkûromba barî Îria Rîtuune, wabeegua. 10 N'warûthire biama na magegania kîrî Faraû, aruti ngûgî baake na antû baake bonthe n'ûntû n'waiyî ibainyîîrîtie biûyûûyû bietû. Wagîa na îgweta mwanka îmunthî. 11 Wagaaniirie îria mbere yao nabo baakûrûkîîra gatîgatî bantû aûmo. Îndî wagera anthû baao ta iiga rîîrito rûûyîîni rwingî. 12 Mûthenya wabatongoriirie na gîtugî kîa matu, ûtugû wabatongoria na gîtugî kîa mwanki kûbamûrîkîra njîra îra bakaathiîra.
13 Wendamire waya kîrîmaani gîa Sinai na waria nabo kuuma îgûrû. Wabaneenkeere mawatho na maathana meega na ma mma. 14 Gûkûrûkîîra mûruti ngûgî waku Musa, n'wa bamenyithiirie Sabatû yaku întheru na wabeera bathingate mawendi, mawatho na maathana maaku. 15 Rîra baarî na yûûra, n'wabaneenkere irio kuuma îgûrû, na rîra baarî na bûûta wabakuundia rûûyî kuuma iigaani. Wabeera bathi bathûkie nthîgûrû îra wabaathîîte.
16 Îndî bo na biûyûûyû bietû baagîa na wîkumia na baûmia biongo biao baarega kwathîkîra mawatho maaku. 17 Baaregire gûkwathîkîra na baariganîrua i magegania mara wabarûthîîre. Baûmia biongo biao na beethuurîra mûtongoria wa kûbacookia ûkombooni nthîgûrû ya Miisiri. Îndî woû Ngai ûrî mpwî cia kûrekera, ûrî wega na kîao, na ûtithûûrangaga na mpwî na ûrî wendo bwingî na kwoogu ûtaabatiganîria. 18 Kinya bakwîrûthîra mûbuanaano wa kayaû na bauga, ‘Ûyû n'we Ngai wenu ûra aabûrutire nthîgûrû ya Miisiri,’ kana rîra baarûthire ûntû bûthûûku bwa kûruma Ngai.
19 N'ûntû bwa kîao gîaku ûtaabatiganîria rwanda. Gîtugî gîa îtu kîabatongoragia mûthenya na ûtugû gîtugî kîa mwanki gîkabamûrîkîra njîra îra baathiyaga. 20 Nwabanenkeere Kîrundu waku ûmwega abaatha, na ûtaabeeria mana barîa na rûûyî rwa kûnyua beegua bûûta. 21 Gwa kagiita ka mîanka mîrongo îna, wabamenyeera barî rwanda na gûtirî kîo baaga. Nguo ciao itaathira kana magûrû maao maimba.
22 Nwabanenkeere kûûmbana îgûrû rîa moonene na mîgongo, wabarûthîra mantû maingî mbarî cionthe, na baathûkia nthîgûrû ya Esiboni îra yaathagwa i mûnene Sioni na nthîgûrû ya Mbasani îra yaathagwa i mûnene Ogu. 23 N'watûmire nciarwa ciao ciingîa ta nthata cia îgûrû, na wabareeta nthîgûrû îra waigîîte wîrane na biûyûûyû biao. 24 Nciarwa inu ciayire na ciathûkia nthîgûrû înu. Nwakîriirie Akanaani bara baatwîre ku inya, wanenkanîra anene baao na antû ba nthîgûrû înu babarûtha bûra bakwenda. 25 Baagwatire taûni ira ciairigîrîtwe na nthingo, baathûkia ira ciarî na ûtonga, nyomba irî na into biingî na biega, ithima bira biarî biînje, mînda ya mîcabiibû na mîceituuni amwe na mîtî îrî na matunda maingî. Baarîîre na baabaa, baanora na baakeneera wega bwaku.
26 Îndî bataarî eetîgua kîrî woû. Bakûrega na batiganîria mawatho maaku na baûraga iroria bira biabakaanagia kaingo bagûcookera. Baarûtha meeyia mbere yaku. 27 N'wabanenkanîîre njaraani cia anthû baao, bara babanyamaaragia. Îndî wa barî kînyamaaraani baakûrîragîra naawe ûkabeegua ûrî îgûrû na n'ûntû bwa kîao gîaku kiingî, wabairîra atuunyûkia ba kûbatuunyûkia kuuma kîrî anthû baao.
28 Îndî gûkûgîa na ûkiri, beeyia kaîrî mbere yaku. N'wabatiganîîrie njaraani cia anthû baao babaatha. Amwe na ûgu bagûkûrîrîra kaîrî wabathikîîria ûrî îgûrû. N'ûntû bwa kîao gîaku, waboonokia maita maingî. 29 Wabakaania kaingo bacookera watho bwaku. Amwe na ûgu n'ûntû bwa kûûma kîongo kwao baatiga kwathîkîra maathana maaku, na baarega mataaro maaku mara matûmaga muntû atûûra mwoyo amaathîkîra. 30 N'wabainyîkîîrie kwa mîanka îmiingî, na wabakaania na njîra ya Kîrundu waku gûkûrûkîîra iroria biaku, kinya rîo bataakûthikîîria. Kwoogu wabarekeeria njaraani cia mîgongo îra îîngî. 31 N'ûntû bwa kîao gîaku kiingî, ûtaareka bathira kana ûbatiganîria, n'ûntû ûrî Ngai wa ûtugi na kîao.
32 Kwoogu woû Ngai wetû, Ngai mûnene, ûrî inya na wa kûmakania, woû ûgwatagîîra kîrîîkanîro gîaku na ûrî kîao kiingî. Kînyamaara kîra gîatûgwatire, tiû, anene beetû atongoria, athînjîri ba Ngai, iroria bietû, biûyûûyû bietû na antû baaku bonthe kuuma kagiita ka mûnene wa Aramu mwanka îmunthî, ûtigaakîone kîrî kîniini. 33 Îndî woû ûrî mwîtîgua kîrî mara monthe maarotûgwata, n'ûntû woû ûrûthaga ûmma îndî tiû tûkarûtha ûthûûku. 34 Anene beetû, atongoria beetû, athînjîri ba Ngai na biûyûûyû bietû bataathiingata mawatho maaku kana bamaathikîîria kinya rîra wabakaanagia. 35 Kinya rîra baarî ûneneeni bwao bagîkenagîîra mawega maaku maingî mara wabarûthîrîte barî nthîgûrû înene na înoru îra wabanenkeere, bataatiga kûrûtha moothûûku.
36 Îmunthî tûgûtuika nkombo nthîgûrû îra wanenkeere biûyûûyû bietû kaingo barîa matunda na gûkeneera mawega maaku. 37 N'ûntû bwa meeyia meetû, maketha maingî ma nthîgûrû îno mathiiyaga kîrî anene bara waigire batwathaga. Barîtwatha tiû na ng'ombe cietû bûra bakwenda. Tûrî thîînaani înene mûno.”
Antû baiga kîrîîkanîro
38 N'ûntû bwa mantû mama monthe, tiû antû ba Isiraeri i tûkwaiga kîrîîkanîro gîa gûtûûra na njîra ya kwandîkanîra, rîru atongoria beetû, Arawi na athînjîri ba Ngai beekîre mîûni yao kîrî kîo.