Esira athoomera antû mawatho ma Musa
8
1 Antû bonthe beethîrana amwe barî na îthûgaania rîmwe kîaragooni kîra kîarî akubî na Mwîrîga wa Rûûyî. Beera Esira ûra mwandîki areete îbuku rîa mawatho ma Musa, mara Mwathani anenkeere antû ba Isiraeri. 2 Kwoogu ntugû ya mbere ya mweri wa mûgwanja, Esira, ûra aarî mûthînjîri wa Ngai, aathi aareeta îbuku rîa mawatho ma Musa mbere ya mûcemanio ûra warî na arûme, aka na bonthe bara baaciûkagîrwa i mawatho mamu. 3 Aathoomera bara baaciûkagîrwa nainya arî mbere ya Mwîrîga wa Rûûyî kuuma rûkîîrî mwanka mûthenya gatî. Antû bonthe bathikîîria Îbuku rîa Watho bwega. 4 Esira ûra aarî mwandîki arûngama bantû aûkîîru aakîîtwe na mbaaû ara kwathuranîrîtwe gwa kîatho. Bwa njara yake ya ûrîo i kwarî na: Matithia, Sema, Anaya, Uria, Irikia na Maaseya, na bwa njara yake ya ûmotho i kwarî na Pendaya, Misaeri, Marikiya, Asumu, Asibandana, Sakaria na Mesuramu. 5 Esira aarugûra îbuku. Antû bonthe i bamwonaga n'ûntû arûûngi bantû aûkîîru. Na akûrîrugûra antû bonthe baarûngama. 6 Esira aacookeria Mwathani Ngai ûra mûnene nkaatho na antû bonthe baûkîîrîîtie njara ciao îgûrû bacookia, “Aameni! Aameni!” Beendamîîria moothiû maao nthîgûrû baagonga Mwathani.7 Arawi nabo baarî Njesua, Bani, Serebia, Njamini, Akubu, Sabethai, Ondia, Maaseya, Kerita, Asaria, Njosabandi, Anani na Peraya beereithia antû bara baarûngi agu mawatho. 8 Bathoomire bwega kuuma îbukuuni rîa Watho bwa Ngai na kûbeereithia bûra bwaugaga. 9 Antû bakwîgua mawatho, baringithua nkorooni ciao na baambîîria kûrîra. Neemia, ûra warî ngabana na Esira mûthînjîri wa Ngai na mwandîki na Arawi bara bathoomithagia antû babeera, “Ntugû îno n'întheru kîrî Mwathani, Ngai weenu, kwoogu, bûtikeethikîrie kana bûrîra.” 10 Neemia abeera, “Îthiini bûkûngwîre bûkîrîyaga irio na bûnyue ndibei îmbega, îndî bûririkane kûnenkera bara batarî na bia kûgana, n'ûntû îmunthî i ntugû întheru mbere ya Ngai wetû. Bûtikeegue bûrî na kîeba n'ûntû gîkeno kîa Mwathani i kîo inya yenu.”
11 Arawi bakiria antû bonthe bakiugaga, “Kiraani n'ûntû îmunthî i ntugû întheru.” 12 Kwoogu antû bonthe baacooka kwao kûrîa na kûnyua bakeneete na kûrûmia bara bangî irio n'ûntû ibagwatire mara monthe beerirwe.
Antû bakûngwîra kîatho gîa Tûganda
13 Ntugû ya ciîrî, anene ba mîciî, athînjîri ba Ngai na Arawi beethîrana gwa Esira ûra mwandîki, kaingo beerutana watho. 14 Baamenya kwandîkîîtwe îbukuuni rîa watho, Mwathani aathire Musa atî, antû babatîîrue gûkara tûgandaani kagiita ka biatho bia mweri wa mûgwanja. 15 Na batûmîîrie taûniini ciao cionthe na Njerusaremu bakiugaga, “Îthiini irîmaani bûreete mpong'i cia mîceituuni, mûceituuni wa kîthaka, mîandasi, mîkîîndû, na mîtî îîngî kaingo bwaka tûganda, wa ta bûra kwandîkîîtwe.”
16 Kwoogu antû baathi bareeta mpong'i, na baaka tûganda woora muntû rûûgûrû rwa nyomba yake, kîaragooni gîake na kîaragooni kîa Nyomba ya Ngai na kîaragooni kîa Mwîrîga wa Rûûyî na kinya kîra kîrî Mwîrîgaani wa Eburaimu. 17 Antû bonthe bara baacookire kuuma ûkombooni baaka tûganda baakara ku. Rîrî rîarî îgiita rîa mbere rîa antû gûkûngwîra kîatho gîa tûganda kuuma îgiita rîa Njosua mwana wa Nuni. Antû baakena mûno. 18 Wa îra ntugû, kuuma ntugû ya mbere mwanka ya mûthia, Esira athoomera antû îbuku rîa watho bwa Ngai. Baakûngwîre kîatho gîku gwa kagiita ga ntugû mûgwanja, na ntugû ya inyanya beethîrana amwe kûringana na watho.