Kûrigîîria kwa waki kwongeereka
6
1 Rîra Sanibarati, Tobia, Ngesemu ûra Mûarabu na anthû beetû bara bangî bakwîgua atî itûrîîkîîtie gwaka rûthingo na gûtirî karumu gatigeere (wana wegua tûtaarî gwîkîra mîrango ya mîîrîga), 2 Sanibarati na Ngesemu baatûma ntûmwa îno kîrî niû bakiugaga, “Tûrîîkane ntûûraani îmwe kîbondeeni kîa Ono.” Îndî ka beendaga kûnthûûkia. 3 Kwoogu ndabatûmîra atûmwa, babeera, “Ngûgî îra nkûruta n'ya gîtûmi mûno na ntiûmba kûûya kwenu ngûgî yîîya kûrûngama.” 4 Baantûmîîre ntûmwa înu maita mana bakîenda nthi, îndî naani ndabacookeria wa ta bûra ndabacookeretie rîa mbere. 5 Sanibarati atûma mûruti ngûgî wake iita rîa mataano na barûa îtarî mbinge. 6 Yaandîkîtwe ûûgû:“Kûrî na ntheto itambîîtue mîgongooni yonthe na Ngesemu n'augîîte ntheto ino i cia mma atî woû amwe na Ayaundi bûrî na mûbango wa kûrega kwathîka, gîkî i kîo gîtûmi kîenu gîa gwaka rûthingo. Na kûringana na ntheto inu, woû ûrîenda gûtuîka mûnene wao. 7 Nwîthurîrîîte iroria Njerusaremu kaingo batûmîîria atî, ‘Kûrî na mûnene Njunda!’ Ntûmwa îno îgaakinyîîra mûnene, kwoogu îndî ncû twarîîrie ûntû bûbû tûrî amwe.”
8 Ndamûcookeria ndamwîra, “Gûtirî ûntû ta bûbu ûkuuga. Ntheto inu i woû ûtungîîte wengwa.” 9 Baarûthaga ûgu gûtûmakia bakîthûgaanagia, “Batiithi na mbere na ngûgî, na kwoogu gûtirî bu bûkarûthîka.” Îndî ndaaromba, “Woû Ngai itû nnenkera inya.”
10 Ntugû îmwe ndaathi gwa Semaya mwana wa Nderaya mwana wa Meetaberi, ûra ateetîgagîîrua kuuma gwake. Semaya ambîîra, “Tûthi twîbithe amwe bantû ara atheru Nyomba ya Ngai na twinge mîrango, n'ûntû îmunthî ûtugû i baayîîte gûkûûraga.” 11 Îndî ndeebûria nkorooni, “Anga muntû ta niû arî na gîtûmi gîa kuugia? Muntû ta niû nwa athûûngîre Nyomba ya Ngai kaingo oonokia ûtûûro bwake? Arî, ntithûûngîra!” 12 Îndî ndaamenya atî atatûmîîtwe i Ngai, i ka aakomboreetwe i Tobia na Sanibarati auga mantû moothûûku îgûrû rîakwa. 13 Aakomboreetwe aamakia ndûtha meeyia. Na ûgu i bu bakîona mwanya wa kûnthûûkîria riîtwa.
14 Ndaaromba Ngai ndauga, “Woû Ngai, ririkana mara Tobia na Sanibarati baarûthire na kinya Noandia kîroria na iroria bira bingî biendaga nkunthûka.”
Kûrîîkia kwa rûthiingo
15 Kwoogu, rûthingo rwarîîkia gwakwa ntugû ya mîrongo îîrî na itaano ya mweriini wa Eruri. Rwathûkiirie kagiita ga ntugû mîrongo îtaano na ciîrî. 16 Rîra anthû beetû ba mîgongo îra tûtûranîrîîrîte n'yo beegiirue ngûgî îkûthira, bamaka na beegua nthoni mûno, n'ûntû baiyî ngûgî îno yaarîîkirie n'ûntû bwa ûteethio bwa Ngai wetû.
17 Kagiita gaku konthe, atongoria ba Ayaundi baandîkagîra Tobia baarûa imbingî, na macookio kuuma kîrî Tobia maakaraga makîbacookagîra. 18 Baingî ba Ayaundi baagwatanagîra n'we kuumania na mûthiîtio wao n'ûntû aarî mûthonuue wa Sekania, mwana wa Ara. Na mwana wa Tobia eetagwa Njeoanani, aagûrîîte mwarî wa Mesuramu, mwana wa Mberekia. 19 Nkûrûki baakarire bakîmbîîraga mantû meega ma Tobia na kûmwîra monthe mara ndaugîîte. Nwe Tobia antûmîra barûa inyiingî cia kûmakania.