Neemia ateethia nkea
5
1 Nyuma ya kagiita kwaumîîra kîrîro kîînene gîa antû arûme na aka baao, bakîrîrîra Ayaundi baciao. 2 Bamwe baugaga, “Itû tûrûmieni irio tûrîe kaingo tûûmba gûtûûra n'ûntû tiû, nthaka cietû na aarî beetû tûrî baingî.” 3 Bangî nabo baugaga, “Tûranenkanîîre mînda yetû, mînda ya mîcabiibû na mîciî yetû n'ûntû bwa yûûra kaingo twona irio.” 4 Na bangî bauga, “Kaingo tûûmba kûrea ûgooti bwa mûnene n'ûntû bwa mînda na mîcabiibû yetû, ga twakoobire mbia. 5 Tiû i bûmwe na Ayaundi, ka aana beetû batarî gîtûmi ta baao. Amwe na ûgu, nwa twendiirie aana beetû ta nkombo, na aarî beetû i batuîkithîtue nkombo. Îîndî tiû gûtirî inya tûrî n'yo ya kûrigîîria ûntû bûbû, n'ûntû mînda yetû na mîcabiibû yetû n'îthûkîîtue n'antû bangî.”6 Nkwîgua kîrîro kîao, Ndaathûûra mûno. 7 Nkûrîîkia gwîciiria îgûrû rîa ûntû bûbû, ndaarîria anene na atongoria. Ndabeera, “N'antû beenu bûkwinyîîria.” Kwoogu ndeetana mûcemanio ûmûnene wa kûbakaania. 8 Ndauga, “Kûringana na bûra kwaûmbîkaga, itwagûrire aruayia Ayaundi bara baarî kwendua kîrî antû ba mîgongo îra îîngî. Îîndî ka bûkwendia Ayaundi bacienu, kaingo tûcooka kûbagûra kaîrî!” Kwoogu baakira ki, batarî na bwa kuuga.
9 Ndathi na mbere kuuga, “Ûthûûku bûbu bûkûrûtha bûtiagîrîîte. Bûtibatîîrue bûkuthûka Ngai wetû kaingo arigîîria mîgongo îra îîngî îîgagua îrî anthû beetû îtigatûnyûrûnte? 10 Nkûrûki ya ûgu, niû ningwa, aruayia na aruti ngûgî baakwa itûrakobithiirie aruayia mbia na irio. Na tûtiraûria baita nwa îrîkû. 11 Îmunthî rîrî bacookerieni mînda yao, mînda ya mîcabiibû, mînda ya mîceituuni na nyomba ciao, kinya baita ya mbia, irio, ndibei, na maguta mara ndaarî nkûrûngithia.” 12 Beetîgîîria na bauga, “Tûkabacookeria na tûtibeetia gîntû nwa kîrîkû. Tûkarûtha wa ta ûgu wauga.” Ndeeta athînjîri ba Ngai mbere na atongoria bonthe bathiîtia kûrûtha kûringana na wîrane bwao.
13 Ndaaruta nguo îra ndoogeete kauna ndamiinainia ndabeera, “Ûûgû i bu Ngai akainainia ûra atakiingia wîrane bûbû. Ngai akabûtuunya nyomba cienu na into bionthe bira bûrî nabio bûtigwe bûtarî gîntû.”
Antû bonthe bara baarî oogo bauga, “Aameni,” na baakumia Mwathani. Na antû baarûtha wa bûra baugîîte bakaarûtha.
14 Kuuma kagiita kara ndaarî ngabana wa Njunda gwa kagiita ka mîanka îkûmi na îîrî, kûûma mwanka wa mîrongo îîrî mwanka mwanka wa mîrongo îthatû na îîrî wa wathani bwa mûnene Aritasasta, niû na antû beetû tûtarea irio bira biabatîîrue birîîgwa i ngabana. 15 Aathani bara baathanîîte mbere yakwa baarî mûrigo ûmûrito mûno kîrî antû, bakîbeetagia irio na ndibei, nkûrûki ya ûgu, babarîyia nucu kiro ya fetha. Wana kinya ateetheeria baao banyamaaria antû, îndî niû ntaarûtha ûgu n'ûntû indakuthûkaga Ngai. 16 I ndaarî na wîru bwingî mûno ndeeni ya waaki bûyerû bwa rûthingo îndî ntagwata nwa mûnda. Wana aruti ngûgî baakwa bonthe baaruta ngûgî înu na wîru bûnene mûno. 17 Nkûrûki ya ûgu, Ayaundi îgana rîmwe na mîrongo îtaano, baarîyaga amwe naani na atongoria bara baayaga kîrî tiû kuuma mîgongo îra yarî akubî. 18 Wa kîra ntugû, kaingo mbaithia antû babu, ndathîînjaga ncamba imwe, ng'ondu inoru ithanthatû na ngûkû. Nyuma ya ntugû îkûmi ndaaruta ndibei kwa wingî. Îndî amwe na mama monthe, n'ûntû antû i baarî na mûrigo ûmûrito wa gûkamata, nteetia irio bira biabatîîrue kûnenkerwa ngabana.
19 Ûndirikane, woû Ngai wakwa, n'ûntû bwa mawega mara ndûthîrîte antû baba.