Ngûgî ya waki yarigîîrua
4
1 Ata rî, Sanibarati akwîgua atî gatwaakaga rûthingo, athuura mûno na aambîîria kûnyûrûûnta Ayaundi, 2 akiugaga mbere ya acoore baake na njûûrî ya Samaria, “N'ata Ayaundi baba bionje bakûrûtha? Ka bagwîciiria bagaaka rûthingo na ntugû îmwe na barute igongwana? Barîîciiria bagaukûra maiga mama mateetwe kîrinyaani mabîthîîtue i mwanki?” 3 Tobia ûra Mûamoni, ûra aarûngi akubî na Sanibarati, auga, “Nyomba îno bagwaka, wana mbwe igatwa îgûrû yayo, ka yomora nthingo inu cia maiga.”4 Ndacooka ndaromba ndauga, “Woû Ngai wetû îgua bûra bagûtûnyûrûnta. Ka irumi biao bibacookere. Ka bagwatwe mîgwate nthîgûrû îngeni. 5 Ûtikaabarekere mabîtia maao kana meeyia maao n'ûntû bagûkûthûûria mbere ya aaki.” 6 Kwoogu antû baarutire ngûgî na wîru, na twaka nthingo cia Njerusaremu mwanka ciakinya nucu kaîrî.
7 Îndî rîra Sanibarati, Tobia, Aarabu, Amoni na Asindondi beegiirue atî waki i bwathiîte na mbere na mîanya ya nthingo cia Njerusaremu yakwa kaîrî, baathûûra mûno. 8 Baabanga barî amwe kûthi kûreeta thîîna na kûrûa na antû ba Njerusaremu. 9 Îndî naati twaromba Ngai wetû na twaiga akaria mûthenya na ûtugû kaingo batûrigîîria.
10 Kagiitaani gaku antû ba Njunda baanjîîria kûnung'una bakiugaga, “Inya ya aruti ngûgî n'ikûnyiia na îîndî kûrî na rûko rwingî rwa gûkamata. Tûtithi na mbere na gwaka rûthingo.” 11 Nabo anthû beetû baugaga, “Mbere bamenya kana batwona, tûkeegua tûgûkinya kwao twabaûraga na twarûngîka ngûgî.” 12 Ayaundi bara baatwîre akubî na anthû beetû bakwîgua biugo biao, baaya maita îkûmi bagîtwîraga, “Bakaaya kuuma gûntû kunthe gûtuithûkîra.” 13 Kwoogu ndaatûma antû bakaria rûthingo na mbarî cia ru cia ruungu na naara kwarî na marinya. Ndabaigire kûringana na mîciî yao barî na ndûûyiû, matumo na nta. 14 Nkûraithîîria mantû bûra maakari ndeera atongoria, aruti ngûgî na antû babu bangî, “Bûtikaamake n'ûntû bwa anthû! Ririkanaani Mwathani ûra mûnene na wa kûmakania na wa kûrigarania, na bûrûe n'ûntû bwa aruanyûkwe, nthaka na aarî beenu, aka beenu na mîciî yenu.”
15 Rîra anthû beetû beegiirue atî itûkûmenya mîbango yao, na Ngai abarigîîria kûrûtha bûra beendaga, twinthe twacooka gwaka rûthingo. 16 Kuuma ntugû înu na kûthi na mbere, nucu ya aruti ngûgî baakwa i bo baakaga na nucu înu îngî bakarîtie na matumo, rong'o, nta na îthaga rîa kûrigîîria kîbara. Arûngamîîri beetû beegua barî nyuma ya antû ba Njunda 17 bara baakaga rûthingo. Bara baakamataga into bia gwaka baarutaga ngûgî na njara îmwe na njara înu îngî îkagwata mathaga ma ndûa. 18 Woora mwaki aarî na rûûyiû oogeereete kauna gaake athiîte na mbere na gwaka. Na muntû wa kûringa karumbeta aarî akubî naani.
19 Ndeera anene, atongoria na antû babu bangî atî, “Ngûgî n'îînene mûno na n'îtambîîte gûntû kûnene mûno mwanka twanyagaara, woora ûmwe arî kûraaya na ûra ûngî. 20 Bwegua karumbeta kaaringwa, ugiani rwîro kîrî tiû. Ngai wetû agatûrwîrîîra.”
21 Kwoogu twathi mbere kûruta ngûgî yetû na nucu ya antû bagwete matumo kuuma rware rûgîtema mwanka rîra nthata cionekanaga îgûrû. 22 Kagiitaani wa gaku ndeera antû, “Woora muntû mûrûme na mûruti ngûgî wake bakare Njerusaremu ûtugû, kaingo beegua barî akaria ûtugû na aruti ngûgî mûthenya.” 23 Kwoogu niû, aruayia, aruti ngûgî baakwa kinya akaria bara baanthingatire, tûtaaruta nguo cietû. Woora ûmwe wetû eegagua arî na mathaga ma ndûa njarani yake rîonthe kinya rîra athiiyaga kûnyua rûûyî.