Neemia 3

Aaki ba rûthingo rwa Njerusaremu

1 Ûûgû i bu rûthiingo rwa taûni rwacookeerue. Eriasibu mûthînjîri ûra mûnene wa Ngai amwe na athînjîri bara bangî baanjîîria gwaka Mwîrîga wa Ng'ondu. Bacuathûra na kûthuuranîra mîrango yau, bagîakaga rûthingo rûraaya ta Kîbayo kîa Îgana, kîra baatheriirie, mwanka Kîbayo kîa Ananeri. 2 Antû ba Njeriko baaka gîcuncî gîku kîngî kîa rûthingo, na Sakuri mwana wa Imuri aaka rûru rûngî rwathingatîîte.

3 Mwîrîga wa Makûyû waakirwe i nthaka cia Asenaa. Beekîîre mîaro, mîrango na beekîra cuuma na itugî. 4 Meremothi mwana wa Uria, mwana wa Akosi aacookeeria gîcuncî gîku kîngî kîa rûthingo. Akubî nabo i kwarî na Mesuramu mwana wa Mberekia, mwana wa Mesesaberi na Sandoki mwana wa Mbaana kinya bo baacookeeria. 5 Gîcuncî gîku kîngî kîathingatîîte gîakirwe n'antû ba Tekoa, wana wegua atongoria baao i baaregire kûbatetheeria.

6 Mwîrîga wa Njesana wa taûni waakirwe i Njoyanda mwana wa Pasea na Mesuramu mwana wa Mbesondeya. Beekîîre mîaro na mîrango na beekîra cuuma na itugî. 7 Akubî nabo gwacookeerue i Meratia wa kuuma Ngibeoni, Njandoni wa kuuma Meronothi, na antû ba kuuma Ngibeoni na Misipa, bara baarî ruungu rwa ûtongoria bwa ngabana wa gûntû kûra kûngî ndeeni ya nthîgûrû ya ûthwîro bwa riûa ya Yufîrîti. 8 Usieri mwana wa Arikaya mûturi wa thaabu aaka gîcuncî gîku kîngî. Anania mûthondeki wa mîtaa îkûnunka bwega aaka rûra rwathingatîîte Baacookeeria Njerusaremu mwanka Rûthiingo rûra Rwariî. 9 Refaya mwana wa Uri, mûtongoria wa gîteere kîa Njerusaremu, aaka gîcuncî gîku kîngî. 10 Gicuncî kîra kîerekanîrîte na kîra kîarî akubî na mûciî wa Njendaya mwana wa Arumabi, n'agîakire na Atusi mwana wa Asabuneya aaka kîra kîarî akubî n'we. 11 Marikiya mwana wa Arimu na Asubu mwana wa Paathi-Moabu baaka gîcuncî kîngî na Kîbayo kîa Mariiko. 12 Sarumu mwana wa Aroesi, mûtongoria wa gîteere kîa Njerusaremu, aaka gîcuncî gîku kîngî agîteethagîîrua n'aarî baake.

13 Mwîrîga wa Iguuru waakirwe nî Anuni na antû ba kuuma Sanoa. Beekîîre mîrango na cuuma na itugî. Bacooka baaka rûthingo rwa mita magana mana ma mîrongo îna, mwaka Mwîrîga wa Mai.

14 Mwîrîga wa Mai waakirwe i Marikiya mwana wa Rekabu, mûtongoria wa gîteere kîa Bethi-Akeremu. Aacuakire na eekîra mîrango na konji cia kwinga nacio.

15 Mwîrîga wa Kîthima waakirwe i Sarumu mwana wa Koro-Ose, mûtongoria wa gîteere kîa Misipa. Aamîakire, amiimba na eekîra mîrango na konji cia kwinga nacio. Acooka aaka rûthingo rwa Karia ga Siroamu akubî na Mûnda wa mûnene, mwanka kîrî nkinyo ira ciendamîîte kuuma Taûni ya Ndaundi. 16 Neemia mwana wa Asibuki, mûtongoria wa gîteere kîmwe kîa Bethi-Suri, aaka gîcuncî kîa rûthingo kîra kîathingatîîte. Kîathiire mwanka nthikooni ya Ndaundi, kîthimaani na Nyomba ya aûmbani ba Njûûrî.

17 Arawi bara bathiire mbere gwaka icuncî bia rûthingo baarî Reumu mwana wa Bani na Asabia, ûra aathanîîte nucu ya gîcuncî gîa Keira. Aaka gîcuncî kîa rûthingo mbarî ya gîteere gîake. 18 Babai mwana wa Enandandi, ûra aathaga nucu ya gîteere kîa Keira aaka gîcuncî kîra kîathingatîîte. 19 Eseri mwana wa Njesua, ûra aathanaga Misipa, aaka gîcuncî kîa rûthingo rûra rwarî mbarî ya mbere ya waigo bwa mathaga ma ndûa. 20 Mbaruku mwana wa Sabai aaka na wîru gîcuncî kîa rûthingo rûra rwathiîte mwaka mwîrîgaani wa nyomba ya Eriasibu mûthînjîri ûra mûnene wa Ngai. 21 Meremothi mwana wa Uria na mwana wa Akosi baaka gîcuncî kîngî kîa rûthingo rûgoongo rûra rûngî rwa mwîrîga wa nyomba ya Eriasibu mwanka mûthia waru.

22 Athînjîri ba Ngai bara bathiûrûkîrîte baaka gîcuncî gîku kîngî kîa rûthingo. 23 Benjameni, Asubu na Asaria mwana wa Maaseya na mwana wa Anania baaka gîcuncî kîra kîarî akubî na nyomba ciao. 24 Binui mwana wa Enandandi, aaka gîcuncî kîa rûthingo kuuma nyombani ya Asaria mwanka koonaani ya rûthingo. 25 Parari mwana wa Usai aaka gîcuncî gîku kîngî, kîra kîanjîîrie koonaani ya rûthingo na kîbayo kîra kîaumîrîîte rûteere rwa îgûrû rwa nyomba ya mûnene akubî na kîeni gîa akaria. Akubî n'we kwarî Pendaya mwana wa Parosi. 26 Na aruti ngûgî ba Nyomba ya Ngai bara baatwîre Oferi, bara baakire rûthingo rûra rwerekeene na Mwîrîga wa Rûûyî mbarî ya uumîîro bwa riûa na kîbayo kîîraaya. 27 Antû bangî kuuma Tekoa, baaka gîcuncî gîku kîngî kîa rûthingo kîra kîaumîîte kîbayooni kîra kîîraaya mwanka rûthingooni rwa Oferi.

28 Athînjîri ba Ngai baaka rûthingo bwa neegûrû ya Mwîrîga wa Mbaraathi, woora ûmwe agîakaga gîcuncî kîra kîrî akubî na nyomba yake. 29 Sandoki mwana wa Imeri aaka gîcuncî kîra kîarî akubî na nyomba yake. Semaya mwana wa Sekania, ûra aarî mûkaria wa Mwîrîga wa mbarî ya Uumîîro bwa Riûa, aaka gîcuncî kîra kîathingatîîte. 30 Anania mwana wa Seremia na Anuni mwana wa bathanthatû wa Sarabu, baaka gîcuncî kîra kîathingatîîte. Akubî nabo Mesuramu mwana wa Mberekia aaka gîcuncî kîra kîarî akubî na ara aatûûraga. 31 Marikiya ûmwe wa aturi into bia thaabu aaka gîcuncî kîra kîathingatîîte mwanka nyomba îra îtûmagîrwa n'aruti ngûgî ba Nyomba ya Ngai na abiacaara, ûkîonaga Mwîrîga wa Ûcûnkûûni, akubî na nyomba ya bwa neegûrû koonaani. 32 Aturi bara bangî na abiacaara baaka rûthingo kuuma koona înu mwanka Mwîrîga wa Ng'ondu.