Neemia aacooka Njerusaremu
2
1 Mweriini wa Nisani mwanka wa mîrongo îîrî îgiita rîa wathani bwa mûnene Aritasasta, rîra areteerwe ndibei, ndaamîthûkiirie na ndaanenkera mûnene. Ntaaro nthûûra mbere ya mûnene agu mbereeni. 2 Kwoogu mûnene ambûûria, “I kî n'ûntû ûthiû bwaku bûkwonekana bûrî na kîeba na ûtirî ûmwayie? Gîkî ti kîngî tatiga kîeba gîa nkoro.” Ndaamaka mûno.3 Îndî ndaacookeria mûnene, “Mûnene arootûûra tene na tene! I mbi îkaagiria ûthiû bwakwa bûgîa na kîeba wegua taûni ira biûyûûyû baathikirwe n'imbombokanu, na mîîrîga yenyangua na mwanki?” 4 Mûnene ambûûria, “I mbi ûkwenda?” Ndaaromba Ngai wa îgûrû. 5 Rîru ndaacookeria mûnene, “Ûkaaya kwîgua mûnene n'akûgwîrua na mûruti ngûgî waku nooneete kwendeerwa meethooni maake, ka aantûme taûni ya Njunda naara biûyûûyû baathikirwe kaingo mîaka kaîrî.”
6 Rîru mûnene, na mûnene wa mûka akari rûteere rwake, aambûûria, “Rûgendo rwaku rûkaathûkia kagiita kagana ata, na ûgaacooka rî?” Kwoogu mûnene eetîgîîria, na ndaatua tarîki cia rûgendo rwakwa.
7 Ndacooka ndamwîra, “Ûkaaya kwîgua i ngûkenia mûnene, inkûromba ûmpe barûa kaingo mbirîra atongoria ba uumîîro bwa riûa bwa muuro wa Yufîrîti, kaingo bambîtîgîîria nkinya Njunda bwega. 8 Na inkûromba barûa yandîkîrwe Asabu, mûmenyeeri wa kîthaka kîa mûnene, kaingo aanenkera mbaaû cia kûthondeka mbureemu cia mîîrîga îra iirigîrîte Nyomba ya Ngai na nthingo cia taûni na nyomba yakwa îra ngaakaraga.” Na n'ûntû njara ya Ngai ya ûkiri n'yarî amwe naani, mûnene etîgîîria îromba rîakwa. 9 Kwoogu ndaathi kîrî ngabana ba uumîîro bwa riûa bwa muuro wa Yufîrîti ndabanenkera barûa ya mûnene. Mûnene n'aarî agûntûma amwe na atongoria ba njûûrî na athiithia ba mbaraathi.
10 Îndî Sanibarati Mûoroni na Tobia mûruti ngûgî wa Amoni bakwîgua gûkinya gwakwa, bathûûra mûno bakûmenya atî muntû wa kûmenyeera ûthii na mbere bwa Isiraeri akûûya.
Neemia acûnkûûna nthingo cia Njerusaremu
11 Ntugû ithatû nkûrîîkia gûkinya Njerusaremu, 12 ndaumagarûka ûtugû niû na antû baakai. Nteerîîte muntû nwa ûmwe mîbango îra Ngai eekîrîte nkorooni yaakwa ndûthîra Njerusaremu. Ntathûkia nyamû nwa îrîkû tatiga îng'ooi rîra ndatwete.
13 Ndaumire ome gûkûrûkîîra Mwîrîga wa Kîbonde njîraani îra îthiiyaga Kîthimaani kîa Njoka na Mwîrîga wa Mai gûcûnkûûna nthingo cia Njerusaremu ira ciomokangîîte na mîîrîga îra yathûkangîtue i mwanki. 14 Ndacooka ndaathi mwîrîgaani wa inyaka na îriani rîa mûnene, îndî îng'ooi rîakwa rîtaûmba gûkûrûkîîra oogo. 15 Kwoogu ndaathi bwa muuro wa Kindironi ûtugû ngîcûnkûnaga nthingo. Mûthiani, ndacookeera mwîrîgaani wa kîbonde. 16 Atongoria bataamenya naara ndaarî nkûthi kana bûra ndaarûthaga. N'ûntû nteerîîte Ayaundi, athînjîri ba Ngai, atongoria, anene kana antû bara bakîîgua bakîruta ngûgî înu.
17 Rîru ndabeera, “I bûkwona thîîna îno tûrî n'yo? Njerusaremu n'yomorangîîtwe na mîîrîga yayo yabîthua na mwanki. Ncûûni twakeeni rûthingo rwa Njerusaremu, na tûtiigîa îgi kaîrî.” 18 Ndaacooka ndabeera mantû ma njara ya ûtugi ya Ngai kîrî niû na bûra mûnene aambîîrîîte.
Bancookeria bauga, “Twambîîrieni gwaka kaîrî.” Kwoogu baanjîîria ngûgî înu mbega. 19 Îndî Sanibarati ûra Mûoroni, Tobia mûnene wa Amoni na Ngesemua ûra Mûarabu bakwîgua mîbango înu, baanjîîria gûtûthekeera na gûtûnyûrûûnta, bagîtûûragia, “I mbi îno bûkûrûtha ûûgû? Kabûkûregana na mûnene?”
20 Ndabacookeria ndabeera, “Ngai wa îgûrû agatûma tûûmbana. Tiû aruti ngûgî baake tûkaanjîîria gwaka kaîrî, îndî biû, bûtirî na rûgai Njerusaremu kana uuge nwa bûrîkû nwa rî.”