NEEMIA
Îromba rîa Neemia
1
1 Bibi i biugo bia Neemia mwana wa Akaria:Mweriini wa Kisirebu wa mwanka wa mîrongo îîrî ya wathani bwa mûnene Aritasasta wa Pasia, niû Neemia ndaarî taûni înene ya Susa ndeeni bantû ara airige na rûthiingo. 2 Anani, ûmwe wa aruayia, aaya kûûma Njunda amwe na antû bangî, ndabaûria îgûrû rîa Ayaundi bara baatigarire kuuma kîrî agwate bara baarî Mbabironi, na îgûrû rîa Njerusaremu. 3 Bambîîra, “Bara baatigarire kuuma naara baagwetwe i baracookire Njunda na barî na thîîna na îgi rînene mûno. Kinya rûthingo rwa taûni ya Njerusaremu i rûroomorirwe na mîîrîga yabîîthua na mwanki.”
4 Nkwîgua mantû mamu, ndaakara nthî ndaarîra. Gwa ntugû inyingî ndeegua ndî na kîeba na ndaatîîrîra kûrîa n'ûntû bwa maromba mbere ya Ngai wa îgûrû. 5 Rîru ndauga,
“Woû Mwathani, Ngai wa îgûrû, Ngai ûra mûnene na wa magegania, ûra waigaga kîrîîkanîro kîa wendo na bara bamwendeete na baathîkagîra maathana maake. 6 Ka matû maaku mathikîîrie na meetho marugûke wîgue maromba maakwa ûtugû na mûthenya n'ûntû bwa aruti ngûgî baaku antû ba Isiraeri. I nkwîrira meeyia mara tiû Aisiraeri, niû amwe na mûciî wakwa, tûkwîyîrîtie. 7 Itûrûthîîte ûthûûku na tûtiathîkîrîte mawatho na maathana mara wanenkeere mûruti ngûgî waku Musa.
8 Ririkana bûra weerire mûruti ngûgî waku Musa, ‘Bwarega gûtuîka eetîgua, i nkabûnyagaaria kîrî mîgongo îra îîngî. 9 Îndî bwancookera na bwathîkîra maathana maakwa, kinya ûkeegua antû beenu barî bagwatîre mûthiani wa nthîgûrû kûrû, nkabeethîrania mbacookie bantû ara nthuurîîte a kûngongagîrwa.’
10 N'aruti ngûgî baaku, antû bara wakûûrire na inya yaku înene. 11 Woû Mwathani, thikîîria îromba rîakwa na maromba ma bara bakenagîîra gûtîîya riîtwa rîaku. Nenkera mûruti ngûgî waku kûûmbana na kwendeerwa mbere ya muntû ûyû.”
Ntugûûni inu ndaarî mûmenyeeri wa ndibei wa mûnene.