Esira 9

Îromba rîa Esira îgûrû rîa ngûrano cia Aisiraeri na aka ageni

1 Nyuma ya mantû mama magûkarîka, atongoria baaya kîrî niû bambîîra, “Antû ba Isiraeri, amwe na athînjîri ba Ngai na Arawi, batiîbathûrîîte kuumania na antû bara batûûranîrîîte nabo na mantû maao maathûûku, ta mara ma antû ba Kanaani, Aiti, Aperisi, Anjebusi, Aamoni, Amoabu, Amiisiri na Aamori. 2 Antû bamwe ba Isiraeri ibagûrîîte eekûrû kuuma kûngî, na batûma kinya nthaka ciao ibathingatîîra. Na beengîrania rûrîîyo rûûtheru rwa Isiraeri na antû bara batûûranîrîîte nabo. Anene na atongoria i bo baarî ba mbere kûrûtha ûntû bûbû bûthûûku ûûgû.” 3 Rîra ndeegiirue ûgu, ndaatembûranga nguo ciakwa, ndaamunyûria ntundu kuuma kîongo gîakwa na kîreru, na ndaakara nthî makîîte. 4 Rîru bonthe bara bainainire bakwîgua mîgambo ya Ngai wa Isiraeri beethîrana akubî naani n'ûntû bwa kûrega gwîtîgîka gûku kwao. Na ndaakara agu makîîte mûno mwanka îgiita rîa kîgongwana kîa ûgoro.

5 Îgiita rîa kîgongwana, ndaarûngama kuuma ara ndaakari ndî na kîeba na nguo ciakwa irî nteembûkangu. Ndaaturia maru, ndaûkîîria njara ciakwa kîrî Mwathani Ngai wakwa. 6 Ndaaromba:

“Îî Ngai wakwa, ndî na îgi rîînene mûno, wana inkwîgua nthoni gûkwerekeria ûthiû bwakwa n'ûntû meeyia na mabîtia meetû i maanene mûno mwanka maakinya îgûrû. 7 Rûgono rwetû runthe rwîthîrîtwe rûrî rwa wîyia bûûnene. Gîku i kîo gîtûmîîte tiû na anene beetû na athînjîri beetû ba Ngai twîthîrîtwe tûrî ruungu rwa anene bataiyî Ngai. I tûûragîîtwe, tûkagwatwa, tûkaiywa, na tûkagîa îgi, wa ta bûra tûkari îmunthî. 8 Îndî îîndî itûranenkeretwe kagiita gaakai ga ûtugi, n'ûntû Mwathani Ngai wetû n'etîgîîrîîtie baakai beetû gûtûûra ta matigari. 9 Kinya wegua tûrî nkombo, Ngai wetû atitûtiganîrîîtie ûkombooni bwetû. N'atwîgîîrîtue kîao mbere ya anene ba Pasia, n'atwete ûtûûro bwaimbia bwa gwaka Nyomba ya Ngai na gûcookeeria maganjo maayo, na n'atwirigîrîte ndeeni ya Njunda na Njerusaremu.

10 Na îîndî, Îî Ngai wetû, n'ata tûûmba kuuga nyuma ya mantû mama monthe? N'ûntû i tûreganîîte na mawatho maaku, 11 mara weyanire gûkûrûkîîra aruti ngûgî baaku iroria rîra waugire, ‘Nthîgûrû înu bûkûthûngîra kwîgwatîra i nthîgûrû îthûûkîîtue n'ûmaramari bwa antû bara batwîre ku. N'ûntû bwa moothûûku mara barûthîîte bamîûyûrîîtie na mantû maao ma rûko kuuma mûthia ûmwe mwanka ûra ûngî. 12 Watwîrire tûtikaareke aarî beetû bagûrwa i nthaka ciao, na tûtikaareke nthaka cietû igûra aarî baao. Bûtigaacwe rwaria rwa ûcoore nabo nwa rî, kaingo bûgîta inya na bûrîa into biega bia nthî înu na bûtigîra aana beenu ta rûgai rwa gûtûûra tene na tene.’

13 Bûra gwakarîka kîrî tiû i maumithio ma ngûgî inthûûku na wîyia bwetû bûûnene, na amwe na ûgu, Ngai wetû, ûtwete îkaanûkia rîniini nkûrûki ya bûra meeyia meetû meendaga na n'ûtwete matigari ta mama. 14 Tûkauna maathana maaku kaîrî na tûgûrane na antû bara barûthaga mantû ma îgi ta mama? Ûtithûûra mûno i tiû na ûtwînyangie, kinya kwage muntû nwa ûmwe atigeere kana akoonoka? 15 Îî Mwathani, Ngai wa Isiraeri, ûrî ûmûtheru! Tûtigîîtwe îmunthî tûrî matigari. Tûrî aaga mbere yaku tûrî na wîyia, kinya wegua gûtirî nwa ûmwe wacietû aûmba kûrûngama mbere yaku.”