Agwate bara baacookaniirie na Esira
8
1 Ûyû nuu mûtaratara wa atongoria ba mûciî na ndîîyo cia bara baayire naani kuuma Mbabironi îgiitaani rîa wathani bwa mûnene Aritasasta:2 Kuuma mûciî wa Finiasi: Ngerisomu.
Kuuma mûciî wa Ithamarû: Ndanieri.
Kuuma mûciî wa Parosi: Sakaria na antû arûme bangî îgana na mîrongo îtaano.
4 Kuuma mûciî wa Paathi-Moabu: Erieoenai mwana wa Seraya na antû bangî magana maîrî.
5 Kuuma mûciî wa Satu: Sekania mwana wa Njaasieri na antû bangî magana mathatû.
6 Kuuma mûciî wa Andini: Ebendi mwana wa Njonathani na antû bangî mîrongo îtaano.
7 Kuuma mûciî wa Eramu: Njesaya mwana wa Atharia na antû bangî mîrongo mûgwanja.
8 Kuuma mûciî wa Sefatia: Sebandia mwana wa Mikaeri na antû bangî mîrongo înaana.
9 Kuuma mûciî wa Njoabu: Obandia mwana wa Njeiyeri na antû bangî Magana maîrî ma îkûmi na inyanya.
10 Kuuma mûciî wa Bani: Seromithi mwana wa Njosifia na antû bangî îgana na mîrongo îthanthatû.
11 Kuuma mûciî wa Bebai: Sakaria mwana wa Bebai na antû bangî mîrongo îîrî na banaana
12 Kuuma mûciî wa Asigandi: Njoanani mwana wa Akatani na antû bangî îgana na îkûmi.
13 Kuuma mûciî wa Andonikamu, ûra aayire Nyumaani: Erifereti, Njeyeri, Semaya, na antû bangî mîrongo îthanthatû.
14 Kuuma mûciî wa Bigibai: Uthai, Sakuri, na antû bangî mîrongo mûgwanja.
Rûgendo rwa Esira rwa kûthi Njerusaremu
15 Ndeethîrania agwate muurooni wa Aaba, na twamba marema oogo ntugû ithatû nkîraithaga mûtaratara wa antû na athînjîri ba Ngai bara baakinyîîte. Ndoona gûtirî Mûrawi nwa ûmwe eeruta athiyania naati. 16 Kwoogu ndaatûmana Erieseri, Arieri, Semaya, Erinathani, Njaribu, Erinathani, Nathani, Sakaria, na Mesuramu, i bo baarî atongoria ba antû. Na ndacooka ndaatûmana Njoyaribu na Erinathani, bara baarî baûgî mûno. 17 Ndaabatûmire kîrî Indo, mûtongoria wa Arawi naara Kasifia, bamûûria amwe na antû ba mûciî wao na bara batûmîkaga Nyomba ya Ngai batûtûmîra aruti ngûgî ba Nyomba ya Ngai Njerusaremu. 18 Na n'ûntû njara ya Ngai wetû ya ûkiri n'yarî îgûrû rîetû, i baatûtûmîîre muntû wetagwa Serebia, na nthaka ciake amwe na aruagina îkûmi na banaana. Aarî muntû ûmûûme kuuma mûciî wa Maari, ûra aarî wa mûciî wa Rawi mwana wa Isiraeri. 19 Baatûma kinya Asabia, amwe na Njesaya kuuma nciarwani cia Merari, na nthaka ciake amwe na aruagina bonthe mîrongo îîrî, 20 na antû bara baatûmîkaga Nyomba ya Ngai magana maîrî ma mîrongo îîrî. Babu baatûmîkaga Nyomba ya Ngai baarî ateetheeria ba Arawi, gîkundi kîa aruti ngûgî ba Nyomba ya Ngai ba mbere bara bathuurîîtwe i mûnene Ndaundi. Bonthe i bandîkîîtwe mariîtwa.
21 Na agu muurooni wa Aaba, ndaaruta watho kîrî tiû twinthe tûtîîrîre kûrîa n'ûntû bwa kûromba na twînyiie mbere ya Ngai. Twaromba atwee rûgendo rwega na atûrigîîrie tiû, aana beetû, na into bietû tûrî rûgendooni. 22 I ndeegagua nthoni cia kûûria mûnene atwa acikaarî na antû ba mbaraathi bathiiyania naati na batûrigîîria kuumania na anthû beetû njîraani. 23 Kwoogu i twatîîrîîre biakûrîa twaromba mûno Ngai wetû atûmenyeere, na n'egiirue maromba meetû.
24 Rîru ndaathuura atongoria ba athînjîri ba Ngai, Serebia, Asabia, na athînjîri bangî îkûmi 25 bara baarî kaanyaani ga gûkamataga thaabu, fetha, mbakûri irî na thaabu, na into bingî bira mûnene, kîama gîake, atongoria baake, na bira antû ba Isiraeri barutîîte n'ûntû bwa Nyomba ya Ngai. 26 Ndaathimire into bibu nkîbanenkera ndoona birî: kiro ngiri mîrongo îîrî na ciîrî cia fetha, into îgana bia fetha bia ûrito bwa kiro ngiri mîrongo mûgwanja, kiro ngiri inya cia thaabu, 27 mbakûri mîrongo îîrî cia thaabu cia ûrito bwa kiro inyanya, na into bingî biîrî bia rûthuku rûkeembe, rwa goro ta thaabu.
28 Na ndeera athînjîri baba ba Ngai, “Biû na into bibi bûthuurîîtwe ta bûrî baatheru kîrî Mwathani. Thaabu îno na fetha i kîewa gîa kwîbendera kîrî Mwathani, Ngai wa biûyûûyû bietû. 29 Menyeeraani into bibi bwega gûtarî nwa kîmwe gîkûûra mwanka rîra bûkaabieyana, kîrî atongoria ba athînjîri ba Ngai, Arawi, na atongoria ba Isiraeri biandaani Nyomba ya Ngai Njerusaremu.” 30 Kwoogu athînjîri ba Ngai na Arawi beetîgîîria ngûgî ya gûkamata into bibi baira Nyomba ya Ngai wetû Njerusaremu.
31 Ntugû ya îkûmi na ciîrî mweri wa mbere i rîo twaumire muurooni wa Aaba twathi Njerusaremu. Njara ya Ngai wetû n'yarî îgûrû rîetû, na atûrigîîria kuumania na anthû na kwithûkîrwa njîraani. 32 Kwoogu i twakinyire Njerusaremu, ara twanogokire ntugû ithatû.
33 Ntugûûni ya inya nyuma ya tûgûkinya, thaabu, fetha, na into bira bingî biathimîrwa Nyomba ya Ngai wetû na bianenkanîrwa kîrî Meremothi mwana wa Uria ûra aarî mûthînjîri wa Ngai na kîrî Eriasari mwana wa Finiasi, amwe na Njosabandi mwana wa Njesua na Noandia mwana wa Binui, baba barî baîrî baarî Arawi. 34 Gîntû kîonthe gîatarirwe kîî mûgana na ûrito, na îthaabu rîandîkwa bwega.
35 Rîru agwate bara baacookeete kuuma ûkombooni baaruta igongwana bia kûbîîthua kîrî Ngai wa Isiraeri. Baanenkanîîre ncamba îkûmi na ciîrî n'ûntû bwa antû ba Isiraeri, amwe na ng'ondu mîrongo kenda na ithanthatû na ntûrûme mîrongo mûgwanja na mûgwanja. Baacooka baaruta nthenge îkûmi na ciîrî ta kîgongwana kîa meeyia. Bibi bionthe biarutirwe ta igongwana bia kûbîîthua kîrî Mwathani. 36 Mawatho ma mûnene i maakinyire kîrî atongoria ba njûûrî na ngabana ba gîteere kîa ûthwîro bwa riûa bwa muuro wa Yufîrîti, bara baateetheerie antû na Nyomba ya Ngai.