Esira 7

Esira Aakinya Njerusaremu

1 Nyuma ya mantû mama, kagiitaani ka wathani bwa mûnene Aritasasta wa Pasia, i kwarî na muntû eetagwa Esira. Aarî mwana wa Seraya, mwana wa Asaria, Asaria n'we aarî mwana wa Irikia, 2 Irikia aarî mwana wa Sarumu, Sarumu aarî mwana wa Sandoki, Sandoki aarî mwana wa Aitubu, 3 Aitubu aarî mwana wa Amaria, Amaria aarî mwana wa Asaria, Asaria aarî mwana wa Merayothi, 4 Merayothi aarî mwana wa Seraya, Seraya aarî mwana wa Usi, Usi aarî mwana wa Buki, 5 Buki aarî mwana wa Abisua, Abisua aarî mwana wa Finiasi, Finiasi aarî mwana wa Eriasari, Eriasari aarî mwana wa Arûni mûthînjîri ûra mûnene wa Ngai. 6 Esira ûyû aarî wa kuuma Mbabironi na aarî mwarimû wa maathana, na n'arî na ûmenyo bwingî îgûrû rîa watho bwa Musa, bûra Mwathani Ngai wa Isiraeri aaneenkereete antû ba Isiraeri. Mûnene amwaa kîonthe kîra aûriirie, n'ûntû njara ya Mwathani Ngai wake ya ûtugi n'yarî îgûrû rîake. 7 Bamwe ba antû ba Isiraeri, amwe na bamwe ba athînjîri ba Ngai, Arawi, aini, akaria ba mîrango, na aruti ngûgî ba Nyomba ya Ngai, baaya Njerusaremu mwankaani wa mûgwanja wa wathani bwa mûnene Aritasasta.

8 Esira aakinyire Njerusaremu mweriini wa îtaano mwankaani wa mûgwanja wa wathani bwa mûnene Asuerusu. 9 N'ûntû aumire Mbabironi ntugû ya mbere ya mweri wa mbere, na aakinya Njerusaremu ntugû ya mbere ya mweri wa îtaano n'ûntû njara ya Ngai n'yarî amwe nwe. 10 Esira n'we n'erutanîrîtie kûthooma na kwathîkîra mawatho ma Mwathani, na kûrutana mawatho mamu na nkuagaya kîrî antû ba Isiraeri.

Barûa ya mûnene Asaerusu kîrî Esira

11 Îno i barûa îra mûnene Aritasasta aanenkanîîre kîrî Esira, mûthînjîri wa Ngai na mûthoomi ûra aarî na ûmenyo bûûnene bwa mawatho na maathana mara Mwathani aanenkanîrîîte kîrî Isiraeri:

12 “Kuuma kîrî Aritasasta mûnene wa anene,

Kîrî Esira mûthînjîri wa Ngai, mwarimû wa watho bwa Ngai wa îgûrû.

Ingûgûkeethia.

13 Ndîruta watho atî muntû wonthe Mûisiraeri ûra arî wathaniini bwakwa, amwe na athînjîri ba Ngai na Arawi, nwa beerute gûcooka Njerusaremu naabi. 14 Niû na kîama gîakwa gîa antû mûgwanja i nkûbûtûma bûûrithîrie mantû ma Njunda na Njerusaremu bûra gûkari, bûkîringanagia na watho bwa Ngai bûra bûrî njaraani cienu. 15 Kaîrî i tûkûbûûria bûkamate thaabu na fetha inkai, ira tûkûbwaa na njîra ya kwîbendera ta kîewa kîrî Ngai wa Isiraeri ûra Nyomba yake îrî Njerusaremu, 16 amwe na thaabu cionthe na fetha nwa bûthûkie kuuma nthîgûrû ya Mbabironi, kinya biewa bia kwîbendera bia antû na athînjîri ba Ngai bia Nyomba ya Ngai wao Njerusaremu. 17 Bwone bûkûgûra na mbia ino ncamba cia ng'ombe, ntûrûme inene na tûûniini, amwe na biewa biao bia irio na biakûnyua, na bûbirute igongwana kîthînjîrooni kîa Nyomba ya Ngai wenu Njerusaremu. 18 Mbia wa ira igaatigara, nwa itûmîrwe na njîra îra biû na acoore beenu bûkoona i ku kwenda kwa Ngai wenu. 19 Îndî mantûûni ma into bia kûrîîra bira tûgûkwaa n'ûntû bwa gûtûmîka Nyomba ya Ngai waku, binenkanîre bionthe kîrî Ngai wa Njerusaremu. 20 Ûkaaya kwîgua ûrî na ûbatu bwa mbia cia kûgûra gîntû kîra gîkwendekana Nyomba ya Ngai waku kana moobatu ta mamu, nwa wîtie mbia kuuma kîgîînaani kîa ûnene. 21 Niû, mûnene Aritasasta ingûtûma watho bûbû kîrî aigi mbia bonthe ndeeni ya nthîgûrû ya ûthwîro bwa riûa bwa muuro wa Yufîrîti, bûkaanenkera Esira kîonthe kîra akaabûûria, n'ûntû i mûthînjîri wa Ngai na mwarimû wa watho bwa Ngai wa îgûrû. 22 Bûmûnenkere mwanka kiro ngiri inya cia fetha, kiro ngiri îkûmi cia ngano, rita ngiri ciîrî cia ndibei, rita ngiri ciîrî cia maguta, na mwonyo ûra akeenda. 23 Bûmenyeere bweyane kîra kîonthe Ngai wa îgûrû ageetia kuuma Nyomba yake, n'ûntû i mbi igaatûma tûreka mûthûûro wa Ngai wîgua ûrî îgûrû rîa mûnene na aana baake? 24 Na kaîrî ndîruta watho atî gûtirî mûthînjîri wa Ngai, Mûrawi, mwini, mûkaria wa mûrango, mûruti ngûgî Nyomba ya Ngai, kana mûruti ngûgî wonthe ûra arî ndeeni ya nyomba îno ya Ngai akaûrua arîe ûgooti bwa mûthemba nwa ûrîkû.

25 Na woû Esira, ûtûmîre ûûme bûra Ngai akwete kûthuura atongoria na agiiti magamba bara baiyî mawatho ma Ngai waku bara bagaatongoria antû bonthe ba nthîgûrû ya ûthwîro bwa riûa bwa muuro wa Yufîrîti. Wegua antû batamenyanîrîtie na mawatho mamu, nwa mwanka ûbarutane. 26 Ûra wonthe akaarega kwathîkîra watho bwa Ngai waku na bwa mûnene anenkerwe îkaanûkia rîa gîkuû, kûthaamua, gûtuunywa into, kana kwingîrwa nceera.”

Esira aakumia Mwathani

27 Esira auga, “Mwathani arookumua, Ngai wa biûyûûyû bietû, ûra aatûmire mûnene eegua kûthongamia Nyomba ya Mwathani Njerusaremu! 28 Na mûkumie n'ûntû bwa kwonania wendo ta bûbû bûnene ûû kîrî niû na njîra ya gûntîîya mbere ya mûnene, kîama gîake, na anene baake bainya bonthe! I ndeegiirue ndeekîrwa inya n'ûntû njara ya Mwathani Ngai wakwa ya ûtugi n'yarî îgûrû rîakwa. Na ndeethîrania bamwe ba atongoria ba Isiraeri bacookania naani Njerusaremu.”