Esira 6

Watho bwa Ndariasi

1 Rîru mûnene Ndariasi aaruta watho, na baaceria mabukuuni mara maigîîtwe kîgîînaani Mbabironi. 2 Îbuku rîonekana ndeeni bantû ara airige na rûthingo taûniini ya Ekibatana ndeeni ya gîteere kîa Mendia, na ûûgû i bu rîandîkîîtwe:

Mûririkana:

3 “Mwankaani wake wa mbere wathaniini, mûnene Sairas n'aarutire watho atî Nyomba ya Ngai yakwe Njerusaremu îrî ta bantû ara igongwana bikaarutagîrwa na bikabîîthua. Nyomba înu îkeethîrwa îrî ya ûraaya bwa biiti mîrongo kenda na wariî bwa biiti mîrongo kenda. 4 Nyuma ya gwaka maiga mathatû mûthiûrûûko gûkaigagîîrwa mbaaû. Marîi makaarîwa kuuma kîgîînaani kîa ûnene. 5 Wana into bia thaabu na fetha bia Nyomba ya Ngai, bira Nebukandinesa aathûkiirie kuuma Nyomba ya Ngai Njerusaremu, bigaacookua Nyomba ya Ngai wa bûra biakari.”

6 Kwoogu, mûnene Ndariasi aatûmana ntûmwa îno:

“Kîrî Tatenai ngabana wa gîteere kîa ûthwîro bwa riûa bwa Yufîrîti, na Sethari-Bosenai na bara bûrutanagîria ngûgî nabo ba nthîgûrû înu, umangaani agu. 7 Menya bûtanga mwako wa Nyomba ya Ngai. Tiganaani na ngabana wa Njunda na atongoria ba Ayaundi barute ngûgî yao, ka baake Nyomba ya Ngai ara yarî mbere. 8 Nkûrûki ya ûgu ndî aga nkîrutaga watho atî bûteethie atongoria baba ba Ayaundi gwaka nyomba îno ya Ngai. Nwa mwanka bûrîe marîi ma mwako monthe bûtagûkarakara kuumania na mbeca ciakwa ira ciîthîranîîtue cia ûgooti nthîgûrû yenu kaingo ngûgî îtarûngama. 9 Nenkera athînjîri ba Ngai Njerusaremu kîonthe kîra gîkeendekana, ta ncamba itarî nkûrû mûno, ntûrûme, na mîatî birî bia igongwana bia kûbîîthua bia kûrutîrwa Mwathani Ngai wa îgûrû. Na bûbanenkere ngano, mwonyo, ndibei, na maguta mara bakeenda ntugû cionthe bûtagûtîîrîra. 10 Kaingo bakaûmba kûruta igongwana bira bigeetîgîîrîka i Ngai wa îgûrû na bandombere amwe na aana baakwa.

11 “Ûra akaagarûra watho bûbû rûbaaû rûûnene rûkaarutwa nyomba yake rûthongorwe mbarî îmwe, amuntîîrwe îgûrû rîaru. Na n'ûntû bwa ûthûûku bûbû mûciî wake ûgaatuîkithua kîthûmba kîa rûko. 12 Ngai ûra athuurîîte mûciî wa Njerusaremu ûrî bantû a gûtîîyîra riîtwa rîake, aroînyangia mûnene wonthe kana mûgongo unthe ûra ûkaaregana na watho bûbû na eenyangie Nyomba îno ya Ngai. I niû Ndariasi ndaaruta watho bûbû. Ka bwathîkîrwe na inya yonthe.”

Kûrîîkia na kwathûrwa kwa Nyomba ya Ngai

13 Tatenai, ngabana wa gîteere kîa ûthwîro bwa riûa bwa muuro wa Yufîrîti, na Sethari-Bosenai na acoore baao beetîganîîria na watho bwa Ndariasi warîmwe. 14 Kwoogu atongoria ba Ayaundi baathi na mbere na ngûgî yao, na i beekîîrwe wîru mûno i ntûmîîri ya kîroria Agai na Sakaria mwana wa Indo. Mûthiani Nyomba ya Ngai yaûyûra, wa ta bûra kwathanîîtwe i Ngai wa Isiraeri na watho bwakûrûkua i Sairas, Ndariasi, na Aritasasta mûnene wa Pasia. 15 Nyomba ya Ngai yarîîkirie ntugû ya ithatû mweri wa Anda, mwankaani wa îthanthatû wa wathani bwa mûnene Ndariasi.

16 Antû ba Isiraeri, athînjîri ba Ngai, Arawi, na antû bara bangî baarî bagûcooka kuuma ûkombooni bakûngwîra kwathûrwa kwa Nyomba ya Ngai na gîkeno kîînene. 17 Îgiita rîa kîatho gîa kwathûrwa kwa Nyomba ya Ngai, ncamba itarî nkûrû mûno îgana rîmwe, ntûrûme magana maîrî, na mîatî magana mana i ciarutirwe kîgongwana. Na mbûri îkûmi na ciîrî i ciarutirwe kîgongwana kîa meeyia n'ûntû bwa meeyia ma mîîrîga îrî îkûmi na îîrî ya Isiraeri. 18 Rîru athînjîri ba Ngai na Arawi bagaanua twanyaani twao twa gûtûmîka Nyomba ya Ngai naagu Njerusaremu, bakîthingataga mataaro monthe mara maandîkîîtwe îbukuuni rîa Musa.

Kîatho gîa Pasaka gîakûngwîrwa

19 Ntugû ya îkûmi na inya ya mweri wa mbere, antû bonthe bara bacookeete kuuma ûkombooni baakûngwîra Pasaka. 20 Athînjîri ba Ngai na Arawi i baarî bakwîtheria bonthe. Kwoogu, baathînjîra ng'ondu ya Pasaka antû bonthe bara baarî agwate. 21 Irio bia Pasaka biarîîrwe n'antû ba Isiraeri bara baarî bagûcooka kuuma ûkombooni na bara bangî ba nthî înu bara baarî bakûgarûka kuumania na mawîthîre maathûûku batua kûgonga Mwathani, Ngai wa Isiraeri. 22 Baarîîre irio bia Pasaka na bakûngwîra kîatho kîa mîgaate îtarî miimbithie kagiita ga ntugû mûgwanja. I kwarî na gîkeno kîînene nthî yonthe n'ûntû Mwathani n'aarî akûgarûra nkoro ya mûnene wa Aramu, kaingo abateethia gwaka Nyomba ya Ngai wa Isiraeri.