Ngûgî ya gûcookeeria Nyomba ya Ngai yanjîîria
5
1 Îgiita rîru Agai na Sakaria mwana wa Indo baaroreria Ayaundi barî Njunda na Njerusaremu riîtwani rîa Ngai wa Isiraeri. 2 Serubaberi mwana wa Searitieri na Njosua mwana wa Njosandaki baacookia na njîra ya kwanjîîria ngûgî ya gwaka Nyomba ya Ngai Njerusaremu. Na iroria bia Ngai i biarî nabo bikîbateethagîîria.3 Kagiitaani wa gaku Tatenai ngabana wa gîteere kîa ûthwîro bwa riûa bwa Yufîrîti, na Sethari-Bosenai na acoore baao baakinya Njerusaremu kagiita gatarî karaaya baûria, “N'ûû we aabwere watho bwa gûcookeeria na kûrîîkia Nyomba îno ya Ngai?” 4 Na baûria mariîtwa ma antû bonthe bara baakaga Nyomba ya Ngai. 5 Îndî n'ûntû Ngai wao n'abakarîîtie, atongoria ba Ayaundi bataarigîîrua gwaka mwanka ntûmwa yatûmwa kîrî Ndariasi na îcookio rîake rîîya rîandîkîîtwe.
Barûa ya ngabana Tatenai kîrî mûnene Ndariasi
6 Îno n'yo baarûa îra Tatenai ûra ngabana, Sethari-Bosenai, na aruti ngûgî bara bangî ba nthîgûrû ya ûthwîro bwa riûa bwa muuro wa Yufîrîti baatûmire kîrî mûnene Ndariasi. 7 Ntûmwa îra baamûtûmîîre yaugaga ûûgû:
Kîrî mûnene Ndariasi:
“Nkeethi kîrî mûnene Ndariasi. 8 Itûkwenda gûkûmenyithia i twathiire ara Nyomba ya Ngai ûra mûnene yaakagwa ndeeni ya nthîgûrû ya Njunda. Îrîakwa na maiga maarûthe bwega, na mbaaû ciaigîîrîtwe nthingooni ciayo. Ngûgî n'îthiîte na mbere nainya na kûûmbana kûûnene. 9 Itwaûriirie atongoria, ‘N'ûû we aabwere watho bwa gûcookeeria na kûrîîkia Nyomba îno ya Ngai?’ 10 Na twaûria mariîtwa maao kaingo tûkwîra atongoria babu i baaû.
11 Rîrî i rîo rîarî îcookio rîao,
Tûrî aruti ngûgî ba Ngai wa îgûrû na nthî, na i tûgûcookeeria Nyomba ya Ngai îra yaakîîtwe aaga mîanka îmiingî yaakûrûkire i mûnene ûmûnene wa Isiraeri. 12 Îndî n'ûntû bacûûcû beetû i baathûûriirie Ngai wa îgûrû, abeeyana kîrî mûnene Nebukandinesa mûkarindini, mûnene wa Mbabironi, ûra eenyangiirie nyomba îno ya Ngai na aathûkia antû abaira Mbabironi. 13 Amwe na ûgu, mûnene Sairas wa Mbabironi, mwankaani wa mbere kagiitaani ka wathani bwake naarutire watho atî Nyomba ya Ngai n'îbatîîrue gwakwa. 14 Mûnene Sairas acookia into bia kûrîîra bia thaabu na fetha bira Nebukandinesa aathûkîîtie kuuma Nyomba ya Ngai Njerusaremu bira aigîîte Mbabironi. Into bibu biathûkiirue kuuma ku na bianenkanîrwa ûmenyeerini bwega bwa muntû wetagwa Sesibasa, ûra mûnene Sairas aathuurîîte arî ngabana. 15 Mûnene aaruta watho amwîra acookie into bibu bantû ara biakaraga Njerusaremu na aake Nyomba ya Ngai agu Njerusaremu ara yarî mbere. 16 Kwoogu Sesibasa aaya eenja mîcingi ya Nyomba ya Ngai Njerusaremu. Antû beethîrîîtwe bakîruta ngûgî kuuma rîru, wana wegua îtaarî î kûûyûra.
17 Kwoogu îîndî, ûkaaya kwîgua bwakenia mûnene, itûgûkûûria ûcerie mabukuuni ma mûririkana ma Mbabironi wone kana mûnene Sairas araruta watho bwa gwaka Nyomba ya Ngai Njerusaremu. Rîru mûnene atûtûmîre îcookio rîake îgûrû rîa ûntû bûbû.”