Esira 4

Kûrigîîrua kwa waki bwa Nyomba ya Ngai

1 Gwakarîkire ata rî, anthû ba Njunda na Benjameni i beegiirue agwate i bagûcookeeria Nyomba ya Mwathani, Ngai wa Isiraeri. 2 Kwoogu baathiîra Serubaberi na atongoria bara bangî ba mîciî babeera, “Gatûbûteethie gwaka n'ûntû tûgongaga Ngai ûra bûgongaga. Twîthîrîîtwe tûkîmûrutîra igongwana kuuma mûnene Esarandoni wa Asîîria agûtûreeta aaga.”

3 Îndî Serubaberi, Njosua, na atongoria bara bangî ba Isiraeri baacookia, “Tûtikwenda ûteethio bwenu bwa gwaka Nyomba ya Mwathani Ngai wetû. Tûgaaka twingwa, wa ta bûra Sairas mûnene wa Pasia aatwathire.” 4 Rîru antû bara baatûûraga nthîgûrû înu baageria kûguayia antû ba Njunda na gûtûma bakua nkoro batiga gwaka. 5 Kinya baagukuma aruti ngûgî ba thirikaarî ya Pasia kaingo beegua barî kîînyume nabo. Baakarire bakîrûthaga ûgu îgiita rîa wathani bwa Sairas rîonthe, mwanka rîa Ndariasi mûnene wa Pasia.

Kûrigîîrua gwaka îgiita rîa Asuerusu na Aritasasta

6 Mwanjîîrioni wa wathani bwa mûnene Asuerusu, anthû babu ba antû bara baatwîre Njunda na Njerusaremu baandîka baarûa ya kûbathitanga bamûreetera. 7 Na kinya Nyumaani, îgiita rîa wathani bwa mûnene Aritasasta wa Pasia, anthû ba Njunda, batongoreetue i Bisiramu, Mithirendathi, na Tabeeri, baatûmîra Aritasasta baarûa yandîkîîtwe na rwaria rwa Kîaramu, na yataûrîrwa mûnene. 8 Reumu ngabana na Simusai mwandîki baandîka barûa, bakîîraga mûnene Aritasasta mantû ma bûra gûkari Njerusaremu.

9 “Kuuma kîrî ngabana Reumu na Simusai mwandîki, ngwatanîro ya agiiti magamba na atongoria bonthe ba kuuma Ereki, Mbabironi na kuuma Susa nthîgûrû ya Eramu, 10 amwe na antû bara bangî banene na ba gîtîîyo, bara Asurubanipo athaamithiirie kuuma kwao na baatûûra taûni cia Samaria na gûntû kûra kûngî ndeeni ya nthîgûrû ya ûthwîro bwa riûa ya Yufîrîti.” 11 Îno n'yo baarûa îra baamûtûmîîre:

“Kîrî mûnene Aritasasta, kuuma kîrî aruti ngûgî baaku, antû ba Yufîrîti ya ûthwîro bwa riûa. 12 Itû mûnene menya atî Ayaundi bara baayire naaga Njerusaremu baumîîte Mbabironi i bagûcookeeria nthingo cia taûni îra îrî antû baûmo biongo na baathûûku. I barîîkîîtie kwînja mûcingi wa nthingo ciayo na bagacirîîkia îkubî. 13 Îndî itûkwenda ûmenye atî taûni îno îkaaya gûcookeerua na nthingo inu ikarîîka, acaara i kîrî woû, n'ûntû Ayaundi i bakaarega kûrîa ûgooti bwao kîrî woû. 14 Tûrîkwîra ûûgû, n'ûntû tûrî eetîgua kîrî woû mûno, na tûtikwenda woû mûnene waagîrwa gîtîîyo na njîra îno. 15 Itûgûkûûria ûraithe mabukuuni ma ba ûyûûgu, kûra ûkoona bûra antû ba taûni înu baarî baûmo biongo bûgana mbereeni. Warûtha ûgu ûkaamenya taûni înu yenyangiirue n'ûntû bwa mûtugo waayo wa ntwîre wa kûthûûria anene na nthîgûrû ira ciageragia kûmîatha. 16 Tûrîenda mûnene amenya ata rî, taûni îno îkaaya gwakwa na nthingo ciayo ikarîîka, nthîgûrû îra îrî rûteere rwa ûthwîro bwa riûa rwa muuro wa Yufîrîti nîgaakûûra.”

17 Mûnene atûma îcookio rîrî, “Kîrî Reumu mûnene, Simusai ta we mwandîki na babu bangî bakaranagia nabo batwîre Samaria na nthîgûrû îra îngî îrî ûthwîro bwa riûa bwa muuro wa Yufîrîti. 18 Baarûa îra bwatûtûmîîre n'yathoomirwe na ndaataûrîrwa. 19 I ndeeyanire watho na ûcûnkûûni bwarûthwa, na kwoneka waabu kuuma tene taûni îno îtwîre îremaga na îkareeta thîîna kîrî anene na nthîgûrû ira iingî. 20 Anene baarî na inya i baathanîîte Njerusaremu na nthîgûrû îra îrî rûteere rwa ûthwîro bwa riûa bwa muuro wa Yufîrîti na i beeyagwa ûgooti bûûnene. 21 Kwoogu, rutaani watho bwa kuuga antû baba batigane na ngûgî yao. Taûni înu îtibatîîrue gwakwa nwanga mbugîîte. 22 Na menya bûkaranga, n'ûntû tûtibatîîrue kûrekeeria mantû mama mathi mbere marema mwanka mûnene athi acaara.”

23 Rîra baarûa îno ya mûnene Aritasasta yathoomeerwe Reumu, Simusai, na acoore baao, baathi Njerusaremu na mpwî na baatûmîra inya na taka gûtigithia Ayaundi gwaka.

24 Kwoogu, ngûgî ya gwaka Nyomba ya Ngai Njerusaremu yarûngamua. Yarûngamire mwanka mwanka wa îîrî wa wathani bwa mûnene Ndariasi wa Pasia.