Gûcookeeria kîthînjîro
3
1 Rîra mweri wa mûgwanja wakinyire na Aisiraeri beegua bakûnogoka ntûûraani ciao, antû beethîrana ta muntû ûmwe ndeeni ya Njerusaremu. 2 Rîru Njosua mwana wa Njosandaki na athînjîri bara bangî na Serubaberi mwana wa Searitieri na mûciî wake banjîîria gwaka kîthînjîro kîa Ngai wa Isiraeri kaîrî kaingo barutîra igongwana bia kûbîîthia ku, wa ta bûra kwathanîîtwe wathooni bwa Musa, mûruti ngûgî wa Ngai. 3 Na baakire kîthînjîro ara kîarî mbere, kinya wegua i baakuthûkaga antû bara baatwîre agu. Warîru baanjîîria kûrutîra Mwathani igongwana bia kûbîîthia kîthînjîrooni. Baarûthaga ûûgû wa kîra rûkîîrî na ûgoro.4 Baakûngwîre Kîatho gîa Tûganda kûringana na bûra kwandîkîîtwe wathooni bwa Musa, kûrutaga igongwana bia kûbîîthia bira bikwendeka wa kîra ntugû. 5 Kinya ibaakaraga bakîrutaga igongwana bia kûbîîthua na igongwana bira biendekanaga bia gûkûngwîra mweri waimbia na biatho bira bingî bia wa mwanka kîrî Mwathani. Antû i baarutaga kinya igongwana bia kwîbendera kîrî Mwathani. 6 Kinya wegua ngûgî yongwa ya Nyomba ya Ngai, îtaarî kwanjîîria antû i baanjîîrie kûrutîra igongwana kîthînjîrooni kîa Mwathani ntugû ya mbere ya mweri wa mûgwanja wa mwanka ûyu.
Antû banjîîria gûcookeeria Nyomba ya Ngai
7 Rîru baandîka mabundi ma gwaka na atea ba mbaaû baagûra mîgogo kuuma kîrî antû ba Turo na Sindoni, babarîa na irio, ndibei na maguta. Kwoogu mîgogo ya mîthithinda yeendamua kuuma irîmaani bia Rebanoni yereereetue îriani rîa Menditarîniani mwanka Njopa kîrûngamooni kîa meeri, wa ta bûra mûnene Sairas wa Pasia eeyanîîte rûûtha.
8 Mweriini wa îîrî wa mwanka wa îîrî nyuma ya gûkinya kwao Nyomba ya Ngai Njerusaremu, Serubaberi mwana wa Searitieri, Njosua mwana wa Njosandaki na aruagina babu bangî athînjîri na Arawi na bonthe bara baacookeete kuuma ûkombooni baathi Njerusaremu banjîîria ngûgî, baathuura Arawi ba kuuma mîanka mîrongo îîrî kûthi mbere baraithîra Nyomba ya Mwathani. 9 Njesua na nthaka ciake na aruagina na Kandimieri na nthaka ciake nciarwa cia Ondabia na nthaka cia Enandandi na nthaka ciao na aruagina, Arawi bonthe, baagwatana amwe mantûûni ma kûraithîra bara baarutaga ngûgî Nyomba ya Ngai.
10 Rîra aaki beenjîîre mûcingi wa Nyomba ya Mwathani, athînjîri beekîra nguo ciao na baathûkia kaanya kaao ga kûringa tûrumbeta. Na Arawi, nciarwa cia Asabu, baarî na tamburiini cia kûringania n'ûntû bwa gûkumia Mwathani, wa ta bûra mûnene Ndaundi aathanîîte. 11 Bagîkumithia na bagîcookia nkaatho, bainagîra Mwathani rwîmbo rûrû,
“N'ûmwega mûno!
Wendo bwake bwa wîtîgîka kîrî Isiraeri bûtûûraga tene na tene!”
Rîru antû bonthe baugîîria na kayû kaanene,
bagîkumagia Mwathani n'ûntû mûcingi wa Nyomba ya Mwathani nwarî ûkwînjwa.
12 Îndî baingî ba athînjîri bara bakûrû, Arawi, na atongoria bara bangî baaririkana Nyomba ya Ngai ya mbere, na baarîra nainya rîra boonire mûcingi waimbia wa Nyomba ya Ngai. Amwe na ûgu, bara bangî baugagîîria n'ûntû bwa gîkeno. 13 Gûtirî we akîathûrana gîtuma gîa gîkeno kuuma kîrî gîtuma gîa kîrîro, n'ûntû antû i baaringire gîtuma kînene na kîeguîka kûraaya mûno.