Antû baumbûra meeyia maao
10
1 Esira wa akîrombaga na akiumbûraga, akîrîraga na agîîturanagia nthî mbere ya Nyomba ya Ngai, kîrîndî kiingî gîa antû Isiraeri, arûme, aka, na twana, beethîrana baarîra amwe n'we nainya mûno. 2 Rîru Sekania mwana wa Njeiyeri, wa rûrîîyo rwa Eramu, eera Esira, “I tûkuumbûra atî i twîthîrîtwe tûtarî eetîgua kîrî Ngai wetû, n'ûntû i tûgûrîîte aka ba nthî ingî bataiyî Ngai. Îndî amwe na ûgu kûrî na wîrîgîîro kîrî Isiraeri. 3 Îîndî ga twaige kîrîîkanîro na Ngai wetû gîa gûcookia eekûrû beetû na tûbeengatie na aana baao. Tûkaathingata mataaro mara bûgatwaa bûrî na bara bangî bara batîîyaga mawatho ma Ngai wetû. Tûkaathîkîra watho bwa Ngai. 4 Gîta inya, n'ûntû i ngûgî yaku gûtwîra bûra tûkaathi na mbere mantûûni ma kûbanga mantû bwega, na tûkaagwatanîra cwee.”5 Kwoogu Esira aûkîîra na aûria atongoria ba athînjîri ba Ngai na Arawi na antû bonthe ba Isiraeri bathiîtie bauge bakaarûtha bûra Sekania augîîte. Na bonthe baathiîtia. 6 Rîru Esira auma mbere ya Nyomba ya Ngai aathi kanyomba ka Njeoanani mwana wa Eriasibu. Aaraara ku, îndî ataarîa kana anyua nwa mbi. Nwa aarîraga n'ûntû bwa kûrega gwîtîgîka kwa agwate babu baacookeete. 7 Rîru ntûmwa yatûmanwa Njunda yonthe na Njerusaremu atî agwate bonthe bara bacookeete beethîrane Njerusaremu. 8 Ûra ûkîîthîrwa atakinyîîte gwa kagiita ga ntugû ithatû aarî anenkanîre into biake, kûringana na bûra anene na akûrû bagaatua, na we wengwa aarî eengatue kuuma gîkundiini gîa atae.
9 Ntugû ithatû ikîthira, antû ba Njunda na Benjameni bonthe i baarî bakwîthîrana Njerusaremu. Na ntugûûni ya mîrongo îîrî ya mweri wa kenda, antû bonthe baakari nthî kîaragooni kîa Nyomba ya Ngai. Baathetemaga n'ûntû bwa bûra mantû maacacîîte na n'ûntû i kwauraga. 10 Rîru Esira ûra aarî mûthînjîri wa Ngai aarûngama abeera, “I bwîyîîtie, n'ûntû i bûgûrîîte aka bataiyî Ngai, bwongeera mabîtia ma Isiraeri. 11 Îîrireeni wîyia bwenu kîrî Mwathani, Ngai wa biûyûûyû bienu, na bûrûthe bûra akwenda. Îîbathûraneeni na antû ba nthî na aka ba kûngî.”
12 Rîru kîrîndî kîonthe kîaugîîria gîacookia, “Yîî, n'ûkwaria ûmma, na nwa mwanka tûrûthe ûgu wauga!” 13 Rîru bauga kaîrî, “Bûbû t'ûntû bûmba kûrûthwa na ntugû îmwe kana ciîrî, n'ûntû baingî beetû i beethûngîrîtie wîyiani bûbû bûnene ûûgû. Gaka i kagiita ka mbura, kwoogu tûtiûmba gûkara aaga ome kagiita kaaraaya. 14 Ga atongoria beetû barute ngûgî îno bantû eetû twinthe. Ûra wonthe arî na mwekûrû wa kuuma kûngî aaye aaga kagiita kara kabangîîtwe n'atongoria na agiiti magamba ba ntûûra îno, kaingo mûthûûro wa Ngai wetû, n'ûntû bwa ûntû bûbû ûkaarutarutwa kuuma kîrî tiû.” 15 Nwa Njonathani wenka mwana wa Asaeri na Njaseya mwana wa Tikiba aareganire na ûntû bûbû, na Mesuramu na Sabethai Mûrawi abagwatîîra.
16 Kwoogu ûyû nuu mûbango ûra atae baathingatire. Esira mûthînjîri wa Ngai athuura atongoria ba kûrûngamîîra mîciî yao, baabangwa wora mûrûngamîîri na riîtwa rîake. Ntugû ya mbere ya mweri wa îkûmi baakara nthî gûcûnkûûna magamba mamu. 17 Na ntugûûni ya mbere ya mweri wa mbere baarîîkania na mantû ma antû arûme bara bonthe baagûrîîte aka ageni.
Bara baarî na mabîtia ma kûgûra aka ageni
18 Kîrî nciarwa cia athînjîri ba Ngai bara baagûrîîte eekûrû ageni:
Kuuma mûciî wa Njesua mwana wa Njosandaki na aruagina baarî Maaseya, Erieseri, Njaribu, na Ngendaria. 19 Baathiîtia bauga bagacookia eekûrû baao, na bonthe wa kîra ûmwe oonania arî na îgamba nkorooni na njîra ya kûruta ntûrûme îrî kîgongwana n'ûntû bwa wîyia
20 Kuuma mûciî wa Imeri baarî Anani na Sebandia. 21 Kuuma mûciî wa Arimu baarî Maaseya, Eriya, Semaya, Njeiyeri, na Usia. 22 Kuuma mûciî wa Pasiuri baarî Erioenai, Maaseya, Isumairi, Nethaneri, Njosabandi, na Eriasa.
23 Baba i bo Arawi bara baarî na ûthûûku, Njosabandi, Simei, Keraya ûra kaîrî eetagwa Kerita, Pethaya, Njunda, na Erieseri.
24 Eriasibu n'we mwini ûra aarî na ûthûûku. Baba i bo akaria ba mîîrîga bara baarî na wîyia, baarî Sarumu, Teremu, na Uri.
25 Baba i bo antû ba Isiraeri bangî bara baarî na ûthûûku baarî ba kuuma mûciî wa Parosi Ramia, Isia, Marikiya, Miyamini, Eriasari, Asabia na Benaya.
26 Mwîrîga wa Eramu baarî Matania, Sakaria, Njeiyeri, Abundi, Njeremothi, na Eriya.
27 Ba mwîrîga wa Satu baarî Erioenai, Eriasibu, Matania, Njeremothi, Sabandi, na Asisa.
28 Ba mwîrîga wa Bebai baarî Njeoanani, Anania, Sabai, na Athirai.
29 Ba mwîrîga wa Bani baarî Mesuramu, Maruku. Andaya, Njasubu, Seari, na Njeremothi.
30 Ba mwîrîga wa Paathi-Moabu baarî Andina, Kerari, Benaya, Maaseya, Matania, Mbesareri, Binui, na Manase.
31 Ba mwîrîga wa Arimu baarî Erieseri, Isia, Marikiya, Semaya, Simioni, 32 Benjameni, Maruku, na Semaria.
33 Ba rûrîîyo rwa Asumu baarî Matenai, Matata, Sabandi, Erifereti, Njeremai, Manase, na Simei.
34 Ba mwîrîga wa Bani baarî Maandai, Amuramu na Ueri, 35 Benaya, Bendia, Kerui, 36 Bania, Meremothi, Eriasibu, 37 Matania, Matenai, na Njaacu.
38 Bakuuma mûciî wa Binui baarî, Simei, 39 Seremia, Nathani, Andaya, 40 Makinandebai, Sasai, Sarai, 41 Asareri, Seremia, Semaria, 42 Sarumu, amaria, na Njosebu.
43 Kuuma mûciî wa Nebo baarî Njeyeri, Matithia, Sabandi, Sebina, Njandai, Njoeri, na Benaya.
44 Kîra ûmwe wa antû arûme baba naarî na mwekûrû wa nthî îngeni, na bamwe i baarî na kinya twana na eekûrû baba. Na babeengatia amwe na twana twene.