Ngûgî ya athînjîri ba Ngai
24
1 Bibi i bio ikundi bia nciarwa cia Arûni. Arûni aarî na aana bana, Nandabu, Abiu, Eriasari na Ithamarû. 2 Nandabu na Abiu, baakuire mbere ya îthe akua, na bataarî na aana, kwoogu aruagina Eriasari na Ithamarû baatuîka athînjîri ba Ngai. 3 Mûnene Ndaundi abaanga nciarwa cia Arûni ikundi kûringana na ngûgî ciao. Aateetheerua kûrûtha ûgu i Sandoki, wa rûrîîyo rwa Eriasari, na Aimereki, wa rûrîîyo rwa Ithamarû. 4 N'ûntû bwa bûra kwagîîre na atongoria ba antû arûme baingî nkûrûki gatîgatî ka nciarwa cia Ithamarû, i baagaûkaniirie nciarwa cia Eriasari ruungu rwa atongoria îkûmi na bathanthatû, na nciarwa cia Ithamarû ruungu rwa atongoria banaana. 5 Baagaûkaniirue na kuura n'ûntû i kwarî na anene ba bantû ara atheru na atongoria ba kîîndiini ndeeni ya mîciî îrî îîrî, wa Eriasari na mûciî wa Ithamarû. 6 Semaya mwana wa Nethaneri, ûra aarî Mûrawi na mwandîki, aandîka mariîtwa na ngûgî ciao mbere ya mûnene Ndaundi, atongoria baake, mûthînjîri wa Ngai Sandoki, Aimereki mwana wa Abiathari na atongoria ba mîciî ya athînjîri ba Ngai na ya Arawi. Baathuuraga muntû ûmwe kuuma mûciî wa Eriasari na ûmwe kuuma mûciî wa Ithamarû na njîra ya kûringa kuura. 7 Kuura ya mbere yagwîra Njeoyaribu, ya ciîrî Njendaya, 8 ya ithatû Arimu, ya inya Seorimu, 9 ya itaano Marikiya, ya ithanthatû Miyamini, 10 ya mûgwanja Akosi, ya inyanya Abiya, 11 ya kenda Njesua, ya îkûmi Sekania, 12 ya îkûmi na îmwe Eriasibu, ya îkûmi na ciîrî Yakimu, 13 ya îkûmi na ithatû Upa, ya îkûmi na bana Yesebeabu, 14 ya îkûmi na itaano Biriga, ya îkûmi na ithanthatû Imeri, 15 ya îkûmi na mûgwanja Esiri, ya îkûmi na inyanya Apisesi, 16 ya îkûmi na kenda Pethaya, ya mîrongo îîrî Njeesikeri, 17 ya mîrongo îîrî na îmwe Njakini, ya mîrongo îîrî na ciîrî Ngamuri, 18 ya mîrongo îîrî na ithatû Nderaya, na ya mîrongo îîrî na inya Maasia.19 Ûgu i bu baabangîîtwe kûruta ngûgî ndeeni ya Nyomba ya Mwathani kûringana na mûbango ûra warûthirwe n'Arûni kîûyûûyû kîao, wa ta bûra aathîîtwe i Mwathani, Ngai wa Isiraeri.
Mariîtwa ma Arawi
20 Baba i bo atongoria ba mîciî ba nciarwa ira iingî cia Rawi,
kuuma kîrî aana ba Amuramu aarî;
Subaeri, kuuma kîrî aana ba Subaeri aarî Yendeya.
21 Kuuma kîrî aana ba Reabia aarî:
Isia mûtongoria wa mûciî wao.
22 Kuuma kîrî aana ba Aisaarî aarî Seromothi
na kuuma kîrî aana ba Seromothi aarî Njaathi.
23 Kuuma kîrî aana ba Eburoni baarî, Yeria gîtûra îria, Amaria wa baîrî, Njaasieri wa bathatû, na Yakameamu wa bana.
24 Kuuma kîrî aana ba Usieri aarî Mika.
Kuuma kîrî aana ba Mika aarî Samiri.
25 Kuuma kîrî aana ba Isia mûruagina wa Mika, aarî Sakaria.
26 Kuuma kîrî aana ba Merari baarî, Maari, Musi na Yaasia,
27 Kuuma kîrî nciarwa cia Merari gûkûrûkîîra mwana wake Yaasia baarî Beno, Soamu, Sakuri na Iburi.
28 Kuuma kîrî aana ba Maari aarî, Eriasari ûra ataagîa na mwana,
29 Kuuma mûciî wa Kisi aarî Njerameeri ûra aarî mwana wa kîmoomwe.
30 Kuuma mûciî wa Musi baarî aana bathatû, Maari, Enderi na Njerimothi.
Inu i cio nciarwa cia Rawi kûringana na mîciî yao. 31 Wana babu bonthe i bariingire kuura kûringana na mûciî woora mûtongoria na mûniini wake, wa ta bûra nciarwa cia Arûni baarûthire. Baariingire kuura mbere ya mûnene Ndaundi, Sandoki, Aimereki na atongoria ba mîciî ya athînjîri ba Ngai na ya Arawi.