23
1 Ndaundi agûkûra mûno, aatuîkithia Soromoni mwana wake mûnene wa Isiraeri.Ngûgî ya Arawi
2 Mûnene Ndaundi eethîrania atongoria bonthe ba Isiraeri, kinya athînjîri ba Ngai na Arawi. 3 Arawi bonthe antû arûme bara baarî na ûkûrû bwa mîanka mîrongo îthatû na nkûrûki, baatarwa. Bonthe baarî ngiri mîrongo îthatû na inyanya. 4 Rîru, Ndaundi abagaîra ngûgî, ngiri mîrongo îîrî na inyanya baabo baatuîka arûngamîîri ba ngûgî ya ndeeni ya Nyomba ya Mwathani, ngiri ithanthatû batuîka atongoria na agiiti magamba, 5 ngiri inya baatuîka akaria ba mîrango, na ngiri inya baatuîka aini, ba gûkumia Mwathani na inanda bîa rwîmbo bira biarûthîîtwe i mûnene wengwa n'ûntû bwa gîtûmi gîku. 6 Ndaundi agaûkania Arawi ikundi bithatû kûringana na mîciî ya nthaka cia Rawi, mûciî wa Ngerisoni, mûciî wa Koathi na mûciî wa Merari.
7 Aana ba Ngerisoni baarî baîrî, Randani na Simei. 8 Randani aarî na aana bathatû, Njeiyeri gîtûra îria kîao, Setamu na Njoeri. 9 Aana ba Simei baarî bathatû, Seromothi, Asieri na Arani. Baba baarî atongoria ba mîciî ya nciarwa cia Randani. 10 Aana wa Simei baarî bana, Njaathi, Sina, Njeusi, na Mberia. 11 Njaathi n'we aarî kîîmbere, aathiingatwa i Sisa. Îndî Njeusi, na Mberia, n'ûntû bataarî na aana baingî, baathûkua barî ba mûciî ûmwe.
12 Aana ba Koathi baarî bana, Amuramu, Isaarî, Eburoni na Usieri. 13 Aana ba Amuramu baarî Arûni na Musa. Arûni na nciarwa ciake baathuurwa batua kûmenyagîîra into bira bitheru mûno, batoogagie macoco mbere ya Mwathani, batûmîkagîre Ngai na kûthaarima antû riîtwani rîa Mwathani, ntugû cionthe. 14 Îndî nciarwa cia Musa mûruti ngûgî wa Ngai, baataranagîrua amwe na mwîrîga wa Rawi. 15 Aana ba Musa baarî Ngerisomu na Erieseri. 16 Ûra aarî kîîmbere kîrî aana ba Ngerisomu i Sebueri. 17 Erieseri aarî na mwana ûmwe ng'û, n'we eetagwa Reabia. Îndî Reabia n'aarî na aana baingî mûno. 18 Isaarî aarî îthe wa Seromithi, mûtongoria wa mwîrîga unthe. 19 Aana ba Eburoni baarî bana, kîîmbere kîao kîarî Yeria, wa baîrî Amaria, wa bathatû Njaasieri na wa bana Yekameamu. 20 Aana ba Usieri baarî baîrî, Mika kîîmbere kîao, na Isia wa baîrî.
21 Merari aarî na aana baîrî, Maari na Musi. Aana ba Maari baarî baîrî, Eriasari na Kisi. 22 Eriasari aakuire atakûrî akûgîa na aana ba antû arûme, tatiga aarî akî. Aarî babu baagûrwa n'aruagina, aana ba Kisi. 23 Aana ba Musi baarî bathatû, Maari, Enderi na Njeremothi.
24 Babu i bo aana ba Rawi kûringana na mîciî yao. Woora ûmwe wao ûra aarî na ûkûrû bwa mîanka mîrongo îîrî na nkûrûki, aandîkithua riîtwa rîake ûmwe kwa ûmwe kûruta ngûgî Nyomba ya Mwathani. 25 N'ûntû Ndaundi naugîîte, “Mwathani, Ngai wa Isiraeri, nanenkereete antû baake ûkiri, n'we aatûûraga Njerusaremu tene na tene. 26 Kwoogu gûtirî gîtûmi kîa Arawi kaîrî gûkamata îrema rîa kûrîîkanaga kana into biarîo bira bitûmagîrwa kûgonga.” 27 Kûringana na mawatho ma mûthia mara Ndaundi aneenkanîîre, Arawi bonthe bara bakinyîîtie ûkûrû bwa mîanka mîrongo îîrî ibaandîkithîîrue. 28 Îndî ngûgî yao yarî ya gûteetheeria athînjîri ba Ngai ba mûciî wa Arûni ngûgîîni ya Nyomba ya Mwathani, kûmenyeera kîarago na tûnyomba tûra tûthiûrûûkîrîîte, into biitheru bionthe na kûruta ngûgî ira ciîgiî ngûgî cia Nyomba ya Mwathani. 29 Amwe na ûgu, ibaabateethagîîria kîrî ngûgî ya kûbanga mîgaate îmîtheru, mbisikuiti itarî na ndawa ya kwimbithia, irio, keki ya kîgongwana itarî na ndawa ya kwimbithia, biewa bia irio, mûtu ûkimîîtwe na maguta, kinya kûmenyeera ithimi bia ûrito na mûgana wabio. 30 Na kinya i baarûûngamaga mbere ya Mwathani wa îra ntugû rûkîîrî na ûgoro kûmûkumia na gûcookia nkaatho. 31 Na kinya ibaateethagîîria rîonthe rîra igongwana bira bibîîthagua biarutagwa kîrî Mwathani ntugû cia Sabatû, magiita ma kûyiûka kwa mweri, na biathooni bira bithuure. Mawatho maarûthagwa kûringana na mûtari wa Arawi bara beendekanaga wa kîra kagiita kûruta ngûgî înu rîonthe mbere ya Mwathani. 32 Kwoogu, yarî ngûgî yao kûmenyeera Îrema rîa Kûrîîkanaga na bantû ara atheru, na gûteetheeria aruagina athînjîri ba Ngai, nciarwa cia Arûni, na ngûgîîni ya Nyomba ya Mwathani.