22
1 Kwoogu Ndaundi auga, “Bantû aaga noogo Nyomba ya Mwathani îkeegua îrî, na gîkî i kîo kîthînjîro ara antû ba Isiraeri bakaarutagîra igongwana bia kûbîîthua.”Ndaundi athuuranîra into bia gwaka Nyomba ya Ngai
2 Ndaundi aaruta watho ageni bonthe bara baarî ndeeni ya nthîgûrû ya Isiraeri beethîranue, abanenkera ngûgî. Aagaiga acai ba maiga bacae maiga bwega ma gwaka Nyomba ya Ngai. 3 Ndaundi aacooka aagaiga îthaga riingî rîtathimîka rîa kûrûtha mîcumaarî na ithaîki bia mîîrîga ya nyomba, na into biingî bia rûthuku rûtathimîka. 4 Mbaaû cia mîthithinda ira Ndaundi aareeteerwe n'antû ba Sindoni na ba Turo itigîtarîka. 5 Ndaundi eebîîra na nkoro, “Nyomba îra mwan'wakwa Soromoni agaakîra Mwathani îkeegua îrî na mwago mûno, îrî îgweta na îrî na ûkumio nthîgûrû yonthe. Îndî n'ûntû we wana îîndî i mwana ûmûniini na atirî na ûûme bwingî, na kaaba nthuuranîre into bia gwaka yo.” Kwoogu, Ndaundi aiga into biingî mûno bia gwaka mbere akua.
6 Rîru Ndaundi eeta Soromoni mwana wake, amwîra aakîre Mwathani Ngai wa Isiraeri nyomba. 7 Ndaundi eera Soromoni, “Mwan'wakwa, ndaathûgaanagia nkorooni yaakwa ngaakîra Mwathani, Ngai wakwa nyomba n'ûntû bwa gûtîîya riîtwa rîake. 8 Îndî Mwathani aambîîrire, ‘Woû n'wîtûûrîîte nthakame înyingî na warûa ndûani inyingî. N'ûntû bwa nthakame inyingî îra wîtûûrîîte mbere yakwa aaga nthîgûrû, ûtiimbakîra nyomba. 9 Îndî amwe n'ogu, ûkaagîa na mwana, ûra akaathana na ûkiri n'ûntû nkamwa ûkiri na anthû baake bonthe nteere cionthe. Ageetwa Soromoni, n'ûntû ntugûûni cia wathani bwake, akareetera Isiraeri ûkiri na gûkirîîria. 10 Kwoogu, we n'we akaambakîra nyomba. Agaatuîka mwan'wakwa naani ngaatuîka îthe, na nciarwa ciake ikaathana Isiraeri tene na tene.’ 11 Îîndî mwan'wakwa, Mwathani, Ngai waku aroegua arî amwe naawe kaingo ûûmba kûmwakîra nyomba wa ta bûra augire. 12 Mwathani arookwa ûûme na ûmenyo, kaingo rîra agaakwa ûtongoria îgûrû rîa Isiraeri, ûkaamenyeera watho bwa Mwathani Ngai waku. 13 Wathingata watho bûra Mwathani aaneenkeere Musa îgûrû rîa Isiraeri, ûkaathi na mbere bwega. Îgîa inya na ûcamba. Ûtikaamake kana ûkua nkoro. 14 Indeerutanîîrie, kwaiga into bia gwaka Nyomba ya Mwathani, tani ngiri ithatû cia thaabu, tani ngiri mîrongo îthatû na inya cia fetha, na rûthuku na mathaga ma cuuma itathimîka, n'ûntû ni inyingî mûno. Inthuuranîrîîte mbaaû na maiga. Îndî nwa wende kwongeera nkûrûki. 15 Ûrî na aruti ngûgî baingî, kûrî na acai ba maiga, aaki ba maiga, mabundi ma mbaaû na mabundi ma mîthemba yonthe bara barî na ûmenyo bûûnene ngûgîîni mwanya mwanya, 16 ba gûtura thaabu, fetha, rûthuku na îthaga. N'îgûrû rîaku îîndî, anjîîria ngûgî na Mwathani aroegua arî amwe naawe.”
17 Nkûrûki ya ûgu, Ndaundi aatha atongoria bonthe ba Isiraeri bateetheerie Soromoni mwana wake, akiugaga, 18 “Anga, Mwathani Ngai wenu atirî amwe naabi? Anga, atibûneenkereete ûkiri nteere cionthe? Wee n'anenkanîîre bara baatwîre nthîgûrû îno njaraani ciakwa na îîndî barî ruungu rwa Mwathani na antû baake. 19 Îîndî tûmîkîraani Mwathani Ngai wenu, na mathûgaania na nkoro yonthe. Kwoogu ûkîraani! Bwakîre Mwathani bantû aatheru n'ûntû bwa gûtîîya riîtwa rîa Mwathani amwe na into bionthe biitheru bira bitûmagîrwa ndeeni ya kûgonga, biaigwa ndeeni ya nyomba îra yaakîîtwe n'ûntû bwa Mwathani.”