Ndaundi aatara antû ba Isiraeri
(2Sam 24:1-25)
21
1 Saitaani aaya kîînyume na antû ba Isiraeri, eengîîra Ndaundi atara antû ba Isiraeri. 2 Kwoogu Ndaundi eera Njoabu na atongoria bara bangî ba antû, “Îthiini bûtare antû ba Isiraeri, kuuma Beeriseba mwanka Ndani. Bûncookerie ntûmwa kaingo menya bagana ata.”3 Îndî Njoabu auga, “Mwathani aroongeera antû ba Isiraeri maita îgana nkûrûki ya bûra bagana îîndî! Mwathani wakwa mûnene, anga baba bonthe t'aruti ngûgî baaku? I kî n'ûntû ûkwenda kûrûtha ûntû bûra bûkaathûûngîria antû ba Isiraeri mabîtiani?” 4 Îndî kiugo kîa mûnene i kîarî na ûrito nkûrûki ya kîa Njoabu. Kwoogu Njoabu auma aathi na aathiûrûûka nthîgûrû yonthe ya Isiraeri, na mûthiani aacooka Njerusaremu. 5 Njoabu airîra mûnene Ndaundi îthaabu rîa antû, ndeeni ya Isiraeri yonthe, kwarî na antû arûme miirioni îmwe na ngiri îgana rîmwe, bara baarî na ûmenyo bwa gûtûmîra rûûyiû, na ndeeni ya Njunda kwarî na antû ngiri magana mana ma mîrongo mûgwanja bara baiyî gûtûmîra rûûyiû. 6 Îndî Njoabu ataatara Arawi na Abenjameni, n'ûntû ataakenagua i watho bûbu bwa mûnene.
7 Ngai ataakenua i watho bûbu bwa mûnene kwoogu aakaanûkia Isiraeri. 8 Ndaundi eera Ngai, “I mbîyîîtie bûûnene gûkûrûkîîra ûntû bûbû ndûthîîte! Îndî ingûkûromba ûndekere niû mûruti ngûgî waku, n'ûntû i ndûthîîte ûntû bwa waa mûno.”
9 Kwoogu Mwathani aaria na Ngandi, kîroria kîa Ndaundi, amwîra, 10 “Îthi wîre Ndaundi Mwathani ariuga ûûgû, ‘Ndîkwaa mantû mathatû. Naawe ûthuure bûmwe bwa mo naani ngakûrûthîra.’ ” 11 Kwoogu Ngandi aathi kîrî Ndaundi amwîra, “Mwathani ariuga wîthuurîre bûmwe bûra ûkwenda kîrî mama: 12 mîanka ithatû ya yûûra, kana mîeri ithatû ya anthû beenu bakîbûthiragia na rûûyiû, kana ntugû ithatû Mwathani akîbûkaanûkagia bwega, abûreetere mûrimo ûmûthûûku nthîgûrû, na Mûraîka wa Mwathani akûrûkîîre nthîgûrû yonthe ya Isiraeri akîbûthiragia. Îîndî ta tua, ûmbîîre bûra ngaacookeria ûra aantûmire.”
13 Ndaundi aacookeria Ngandi, “Inthûûngîîre thîînaani înene! Îndî na kaaba nkaanûnkue i Mwathani n'ûntû kîao gîake i kîînene mûno. Bunka ntikaagwe njaraani cia muntû.”
14 Kwoogu Mwathani aareetera antû ba Isiraeri mûrimo ûmûthûûku, ûra watûmire antû ngiri mîrongo mûgwanja baakua. 15 Rîru Ngai aatûma mûraîka aathi kwînyangia Njerusaremu; îndî mbere arûtha ûgu, Mwathani aagarûra mathûgaania maake na eera mûraîka ûyu areeteete mûthiro, “Nûûgu, makûgana!” Mûraîka aarûngi akubî na rwara rwa kûbûûrîra irio rwa Orinani Mûnjebusi.
16 Ndaundi araitha îgûrû oona Mûraîka wa Mwathani arûûngi gatîgatî ka îgûrû na nthîgûrû n'we aarî na rûûyiû rwake njaraani amîtaambûrûkîîtie îgûrû ya Njerusaremu. Rîru Ndaundi na akûrû, beekîrîîte mathango beendamîîria biongo biao, batiirithîîtie moothiû maao nthîgûrû.
17 Ndaundi eera Ngai, “Anga, ti niû ndaarutire watho ndauga antû batarwe? I niû ndûthîîte meeyia na ndaarûtha ûthûûku. Îndî n'ata ng'ondu ino ciarûtha? Ngûkwereka mûno, woû Mwathani, Ngai wakwa, nkaanûkia ndî niû na antû ba mûciî wa baaba, îndî ûtikaareke mûthiro ûyû mûthûûku ûûgû ûgwata antû baaku.”
18 Rîru Mûraîka wa Mwathani aaruta watho eera Ngandi eere Ndaundi athi aakîre Mwathani kîthînjîro, rwaraani rwa kûbûûrîra irio rwa Orinani Mûnjebusi. 19 Ndaundi aathîkîra watho bwa Mwathani, na aathi wa ta bûra Ngandi aamwîrîîte ndeeni ya riîtwa rîa Mwathani. 20 Orinani akîbûûraga ngano, akûûndûka oona mûraîka ûyu, we na aana baake bana bara baarî amwe n'we beebitha. 21 Ndaundi akûthi kîrî Orinani, Orinani amwona, auma rwaraani rwa kûbûûrîra aathi amûturîria maru eendamîîria ûthiû mwanka nthî mûthetuuni. 22 Rîru Ndaundi eera Orinani, “Mpa rwara rûrû rwaku rwa kûbûûrîra irio mbakîre Mwathani kîthînjîro oogo, kaingo mûthiro ûthira antûûni. Mbenderia kûringana na ûgûri bwaru buungwa.”
23 N'we Orinani eera Ndaundi, “Thûkia rwara rûrû, mwathi wakwa, na ûrutûmîre bûra ûkwenda woû mwene. Cûûba, i nkûruta ndegwa n'ûntû bwa kîgongwana gîa kûbîîthua, na mîbûûro îrî nkû, amwe na ngano îîgue îrî kîgongwana kîa irio. Bionthe bibu ngûkûa.”
24 Îndî mûnene Ndaundi eera Orinani, “Arî bai, inkaabigûra na ûgûri bwa bio buungwa, ntiirîra Mwathani gîntû gîaku kana mmûrutîra kîgongwana gîa kûbîîthua kîra ntarîîrîîte nwa mbi.” 25 Kwoogu Ndaundi aarea Orinani rwara rûru na sekeri magana mathanthatû ciongwa cia thaabu. 26 Rîru Ndaundi aakîra Mwathani kîthînjîro bantû agu na amûrutîra kîgongwana gîa kûbîîthua na biewa bia ûkiri. Aaromba Mwathani, n'we eetîgîîria maromba maake na njîra ya kûreeta mwanki kuuma îgûrû wa kûbîîthia biewa kîthînjîrooni.
27 Rîru, Mwathani aatha mûraîka; n'we aacookia rûûyiû rwake njûraani. 28 Kagiita gaku, Ndaundi akwona atî Mwathani agwîtîgîîria maromba maake rwaraani rwa kûbûûrîra irio rwa Orinani, Mûnjebusi, aatua kûrutagîra igongwana oogo. 29 Kagiitaani gaku Îrema rîa Mwathani rîra rîarûthirwe i Musa rwanda, na kîthînjîro kîa igongwana bia kûbîîthua, nwa biarî waagu bantû a kûgongera naagu Ngibeoni. 30 Îndî Ndaundi ataûmba kûthi naagu kûûria mantû kuuma kîrî Ngai n'ûntû n'akuthûkaga rûûyiû rwa Mûraîka wa Mwathani.