Ndaundi aagwata taûni ya Raba
(2Sam 12:26-31)
20
1 Gwakarîkire ûgu, mwanjîîrioni wa mwanka, îgiita rîra anene bathiiyaga ndûani, Njoabu aatongoreeria njûûrî na bagwata nthîgûrû ya Amoni, kinya aathi na gûcîgîîria Raba. Îndî Ndaundi we aatigirwe Njerusaremu. Njoabu aithûkîra Raba na amîînyangia. 2 N'we Ndaundi aathûkia nthûmbî ya mûnene wao îra yarî kîongo gîake, n'we aamenya atî nthûmbî înu yarî na ûrito bwa kiro mîrongo îthatû na itaano cia thaabu na ndeeni yaayo i kwarî na iiga rîa goro. Na Ndaundi eekîrwa nthûmbî înu kîongooni gîake. Na aathûkia kîthûûmba gîa into bira baataîte kuuma taûni înu. 3 Na aathûkia antû bara baarî taûniini înu, abatuîkithia aruti ngûgî ba mîcumeeno, cururu na mathoka. Ûgu i bu Ndaundi aarûthire taûni cionthe cia Aamoni. Rîru Ndaundi na njûûrî yake yonthe baacookire Njerusaremu.Ndûa na antû baanene mûno ba Afirisiti
(2Sam 21:15-22)
4 Nyuma yoogu kwegua kûrî na ndûa na Afirisiti naagu Ngeseri. Sibekai, wa kuuma Usa, aûraga Sipai ûra aarî ûmwe wa nciarwa cia Arefaimu. Kwoogu Afirisiti baacindwa.
5 Kwagîa na ndûa kaîrî na Afirisiti. N'we Erianani mwana wa Njairi aûraga Rami mûruagina wa Ngoriathi wa kuuma Ngathi, ûra kîano gîa îtumo rîake kîagana mûtî wa mûtumi wa nguo.
6 Na kaîrî kwegua kûrî na ndûa îîngî Ngathi, bantû kwarî na muntû ûmûraaya mûno, warî na biara bithanthatû bia wa kîra njara na biara bithanthatû wa kîra kûgûrû, bionthe biara mîrongo îîrî na binna. Na kinya we aarî wa rûrîîyo rwa antû baanene mûno. 7 Akûbûthîîria antû ba Isiraeri, Njonathani, mwana wa mûruagina wa Ndaundi Simea, amûûraga. 8 Babu baarî nciarwa cia antû baanene mûno naagu Ngathi, nabo baûragirwe i Ndaundi amwe na aruti ngûgî baake.