Ndaundi acinda Aamoni na Aaramu
(2Sam 10:1-19)
19
1 Nyuma ya kagiita Naasi mûnene wa Amoni aakua, na mwana wake Anuni aatuîka mûnene bantû aake. 2 Kwoogu, Ndaundi auga, “Nkaarûthîra Anuni mwana wa Naasi mantû meega, n'ûntû îthe n'andûthîrîte mantû meega.” Kwoogu Ndaundi aatûma atûmwa na amûtûmîra ntûmwa cia kûmûbooreria n'ûntû bwa gîkuû kîa îthe. Nabo baathi kwa Anuni naagu nthîgûrû ya Amoni kûmûkirakiria. 3 Îndî atongoria ba antû ba Amoni baûria Anuni mûnene ata rî, “Ma! Ûrîthûgaania n'ûntû bwa gîtîîyo kîa abaagu gîatûma Ndaundi aatûma atûmwa baba baaya gûgûkirakiria? Anga antû baba t'athigaani batûmîîtwe baaya kûthûûya nthîgûrû îno bamîthiria na bamîthigaana?”4 Kwoogu Anuni aathûkia atûmwa babu ba Ndaundi, abeenja ireru na aateembûranga nguo ciao gatîgatî mwanka nthûno, na abarekeeria baathi. 5 Ndaundi akwîrwa ntheto bûra atûmwa baake baarûthîrîîtwe, aatûma antû babathagaane, n'ûntû atûmwa babu i beegagua nthoni mûno. N'we mûnene abeera, “Karaani taûniini ya Njeriko, mwanka rîra bûkauma ireru, rîru bûcooke.”
6 Antû ba Amoni bakwona bagûtûma bamenwa i Ndaundi, Anuni na antû babu ba Amoni baatûma antû na taranta ngiri inya cia fetha gûkoombora nkaarî na athiithia ba mbaraathi kuuma Mesopotamia, Aramu-Maaka na Soba. 7 Baakombora nkaarî cia mbaraathi amwe na athiithia baacio ngiri mîrongo îthatû na ciîrî, amwe na mûnene wa Maaka na acikaarî baake, nabo baaya na baamba marema akubî na Mendeba. Aamoni beethîrana kuuma taûni ciao cionthe, beethuuranîra kûrû n'ûntû bwa ndûa.
8 N'we Ndaundi akwîgua mantû mamu, n'aatûmire Njoabu na njûûrî yonthe ya ncamba cia ndûa. 9 Antû ba Amoni nabo baumagarûka baabanga njûûrî cia ndûa mwîrîgaani wa taûni, îndî anene bara baayîîte kûbateethia baarî naagu bieniini barî bonka.
10 Njoabu akwona atî ndûa n'yabangîîtwe mbere na nyuma yake, aataara bamwe ba acikaarî bara beega mûno ba Isiraeri ababaangania kaingo barûa na antû ba Aramu, 11 Acikaarî babu bangî baatigeere, abagaiga ruungu rwa ûtongoria bwa mûruagina Abisai, n'we ababaanga kaingo barûa na Aamoni. 12 Njoabu eera Abisai, “Wegua Aaramu bagankîria inya, ûûye ûnteethie, îndî wegua Aamoni bagagûkîria inya, nkaaya gûgûteethia. 13 Kwoogu bûtikaamake! Tûrûeni ta antû arûme n'ûntû bwa antû beetû, na n'ûntû bwa taûni cia Ngai wetû na Mwathani agatûrûthîra bûra akwona bûrî bwega kîrî we.”
14 Kwoogu, Njoabu na antû baake baatheengangîîra Aaramu kaingo barûa nabo, nabo Aaramu baugia baakuthûka. 15 Na antû ba Amoni bakwona antû ba Aramu baakuthûka, kinya bo baakuthûka Abisai, mûruagina Njoabu, baathûûngîra taûni. Rîru Njoabu baacooka Njerusaremu.
16 Îndî antû ba Aramu bakwona atî bagûcindwa n'antû ba Isiraeri, baatûma atûmwa bathi kûreeta Aaramu bangî baarî rûgongo rwa muuro wa Yufîrîti batongoreetue i Sofaki, mûtongoria wa njûûrî ya Andandeseri. 17 Ndaundi akwîrwa mantû mamu, aacookanîîria njûûrî ya ndûa ya Isiraeri yonthe amwe, na baaringanîria, aathi kûrûa nabo. Abaanga ikundi biake birûa na Aaramu, nabo baarûa n'we. 18 Îndî Aaramu baugia bakuthûkîîte Aisiraeri. Ndaundi aûraga Aaramu bara bathiithagia nkaarî ngiri mûgwanja na acikaarî bara bathiiyaga na magûrû ngiri mîrongo îna. Kinya aûraga Sofaki, mûtongoria wa njûûrî yao. 19 Na aruti ngûgî ba Andandeseri bakwona bagûcindwa n'antû ba Isiraeri, baarûtha kîrîîkanîro gîa ûkiri na Ndaundi, nabo baatuîka aruti ngûgî ba Ndaundi. Kwoogu Aaramu bateenda gûteetheeria Aamoni kaîrî.