Kûûmbana kwa Ndaundi ndûani
(2Sam 8:1-18)
18
1 Nyuma ya kagiita mma, Ndaundi aarûa na Afirisiti abacinda na aatua kûbaatha, na abatuunya taûni ya Ngathi amwe na ntûûra ciayo ira Afirisiti baatûîre. 2 Aacinda Amoabu wanabo, baatuîka aruti ngûgî baake na baatua kûrîa ûgooti. 3 Ndaundi aacinda kinya Andandeseri mûnene wa Soba amwe na nthîgûrû ya Amathi. Aarûthire ûgu kagiita kara aathiîte kwînjîra itugî bia mwanka naara mbarî ya muuro wa Yufîrîti. 4 Ndaundi aataa nkaarî cia mbaraathi ngiri îmwe, antû bara baathiithagia mbaraathi ngiri mûgwanja na acikaarî bara baathiiyaga na magûrû ngiri mîrongo îîrî. Nkûrûki Ndaundi agiita mîkunu ya mbaraathi cionthe, îndî aatigaria mbaraathi îgana rîmwe. 5 Na rîra Aaramu ba kuuma Ndamasiki, baayire gûteetheeria Andandeseri mûnene wa Soba, Ndaundi aabaûragire ngiri mîrongo îîrî na ciîrî. 6 Rîru Ndaundi aaka kambî cia acikaarî taûni ya Samu ya Ndamasiki. Kwoogu Aaramu baatuîka aruti ngûgî baake, na baatua kûrîa ûgooti. Mwathani aaneenkera Ndaundi kûûmbana wakûra kunthe aathiiyaga. 7 Ndaundi aathûkia rong'o cia thaabu ira ciakamatagwa n'aruti ngûgî ba Andandeseri, na aciira Njerusaremu. 8 Ndaundi aathûkia kinya kîthimi kîînene kîa rûthuku kuuma taûni ya Tibathi na taûni ya Kuni, ira ciarî taûni cia Andandeseri. Rûthuku rûru i ru Soromoni aatûmîîre kûrûtha îtangi,a itugî na into biingî bia rûthuku.9 Rîra Tou, mûnene wa Amathi eegiirue atî Ndaundi agûcinda njûûrî yonthe ya Andandeseri mûnene wa Soba, 10 aatûma mwana wake Andoramu, kîrî mûnene Ndaundi, kûmwirîra nkeethi na kûmûkumîîria n'ûntû Tou aarî akûrûa na Andandeseri maita maingî agîcindagwa. Andoramu, airîra Ndaundi biewa bia into birûthîîtwe na fetha, thaabu na rûthuku. 11 Mûnene Ndaundi aathûrîra Mwathani biewa bibu, amwe na fetha, na thaabu îra aataîte kuuma mîgongo ya Endomu, Moabu, Amoni, Afirisiti na Aamareki.
12 Abisai mwana wa Seruya, aûragîra antû ba Endomu ngiri îkûmi na inyanya Kîbondeeni kîa Mwonyo. 13 Aarûtha kambî cia acikaarî naagu Endomu. Nabo antû ba Endomu bonthe baatuîka aruti ngûgî ba Ndaundi. Mwathani aneenkera Ndaundi kûûmbana wakûra kunthe aathiiyaga.
14 Ndaundi aathana Isiraeri yonthe, akîrûthaga bûra bwarî bwa mma na bûra kûbatîîrue kîrî antû baake bonthe. 15 Njoabu, mwana wa Seruya aarî mûtongoria wa njûûrî, Njeosafati mwana wa Airundi aarî mwandîki wa mantû ma ûbici ya mûnene, 16 Sandoki, mwana wa Aitubu na Abimereki, mwana wa Abiathari baarî athînjîri ba Ngai; Sabisa aarî karani wa nyomba ya mûnene, 17 na Benaya, mwana wa Njeoyanda aarûngamagîîra Akerethi na Aperethi, na aana ba Ndaundi baarî atongoria baanene ndeeni ya wathani bwake.