Wîrane bwa Ngai kîrî Ndaundi
(2Sam 7:1-17)
17
1 Kagiita kara mûnene Ndaundi aakaraga nyomba yake ya ûnene, ntugû îmwe eeta kîroria Nathani, amwîra, “Ta raitha, niû nkaraga ndeeni ya nyomba înthongi yaakîîtwe na mîthithinda, îndî Îthandûkû rîa Maathana ma Kîrîîkanîro rîa Mwathani rîkaraga îremaani.” 2 Nathani eera Ndaundi, “Rûtha wa bûra ûkûthûgaania, n'ûntû Ngai arî amwe naawe.” 3 Îndî ûtugû wa bûbu, kiugo kîa Mwathani gîakinyîra Nathani, gîkiugaga, 4 Îthi wîre mûruti ngûgî wakwa Ndaundi, “Ûûgû i bu Mwathani akuuga, ‘Ti woû ûkambakîra nyomba ya gûtûûra. 5 Kuuma ntugû îra ndaarutire antû ba Isiraeri kuuma Miisiri mwanka îmunthî, ntitûûraga ndeeni ya nyomba. Mbîgîîtue nkîthaama kuuma îrema rîmwe mwanka îrema rîra rîngî, na kuuma gîkaro kîmwe mwanka gîkaro kîra kîngî. 6 Î bungwa rî, gûntû kunthe kûra mbîrîga kûthi na antû ba Isiraeri, ndaraaro mbûûria mûtongoria wao nwa ûrîkû ûra mbathîîte amenyeere antû baakwa, i kî n'ûntû ataambakîra nyomba ya mîthithinda?’ 7 Kwoogu îîndî, îra mûruti ngûgî wakwa Ndaundi atî Mwathani wa Njûûrî ariuga ûûgû, ‘Ndaakûrutire ndîîthiani rîra warîîthagia ng'ondu, kaingo ûtuîka mûtongoria wa antû baakwa Isiraeri. 8 Kuuma kagiita gaku mbîgîîtue ndî amwe naabi wakûra kunthe bûthiiyaga, na i nthirîîtie anthû baaku bonthe bauma mbere yaku. Ngaatûma ûgîa îgweta ta antû bara bangî barî îgweta nthîgûrû. 9 Naani nkaathuurîra antû baakwa ba Isiraeri bantû a gûtûûra mmbaande oogo ningwa, kaingo batûûra bantû agu, batikaanyamaarue kaîrî. Nabo antû bara baûmo biongo bara batûmagîra inya batibûnyamaaria kaîrî ta agu mbereeni, 10 kuuma kagiita kara ndaathuurire agiiti magamba îgûrû rîa antû baakwa Isiraeri. Niû ngaacinda anthû baaku bonthe. Nkûrûki ya mamu monthe, niû Mwathani ingûkwîra atî ngagwakîra nyomba. 11 Ntugû ciaku ciakinya cia kûthingata biûyûûyû biaku, ngaatûma ûmwe wa aana baaku woû wengwa, atuîke mûnene, naani nkaarûngamia ûnene bwake. 12 We n'we akaambakîra nyomba, naani nkoona atî ûnene bwake bûgûtûûra tene na tene. 13 Niû ngaatuîka îthe, n'we agaatuîka mwan'wakwa na ntiitiga kûmwenda ta bûra ndaatigire kwenda Saûrû ûra aarî mûnene mbere yaku. 14 Îndî ngaatûma arûngamîîra nyomba yakwa na ûnene bwakwa tene na tene, na gîtî gîake kîa ûnene gîtienyeenyeka.’ ”15 Kûringana na biugo bibi bionthe, na kûringana na bûra kîoneki gîkî kîonthe gîakari, Nathani n'eerire Ndaundi mantû monthe.
Maromba ma Ndaundi ma nkaatho
(2Sam 7:18-29)
16 Rîru mûnene Ndaundi aathûûngîra ndeeni ya îrema na aakara mbere ya Mwathani, aaromba, “Niû ndî ûû, woû Mwathani, na mûciî wakwa i mbi kaingo ûndûthîra ûûgû? 17 Mwathani, n'ûûndûthîrîîte maingî nkûrûki. Ûkûûnenkera wîrane îgûrû rîa nciarwa ciakwa ira ikaaya, woû Mwathani Ngai! 18 Nkwîre ata nkûrûki, niû Ndaundi mûruti ngûgî waku, n'ûntû bwa kûûmbûkîîria ûûgu? Woû n'ûmbiyî, niû mûruti ngûgî waku. 19 Woû Mwathani, n'ûntû bwa mûruti ngûgî waku na kûringana na wendi bwaku, n'ûrûthîîte ûntû bûbû bûnene ûûgû na watûma mawîrane mama manene ûûgû monthe mamenyeka. 20 Gûtirî ûngî ta woû, woû Mwathani, na monthe mara twîgîîtue i makwonania atî gûtirî Ngai ûngî tatiga woû. 21 Na kaîrî gûtirî antû bangî nthîgûrû baûmba kûbuanaanua na antû baaku ba Isiraeri. Bara bonka Ngai wao aathiire gûkûûra kaingo batuîka antû baake? Woû werûthîîre riîtwa gûkûrûkîîra kûrûtha mantû maanene na ma kûrigaria rîra wengatiirie mîgongo mbere ya antû baaku bara wakûûrire kuuma Miisiri. 22 Na nkûrûki yoogu, watûma antû baaku ba Isiraeri batuîka antû baaku tene na tene. Naawe, woû Mwathani, watuîka Ngai wao.
23 “Na îîndî, woû Mwathani, ûyûria kiugo gîaku tene na tene kîra waugire îgûrû rîakwa niû mûruti ngûgî waku na îgûrû rîa mûciî wakwa. Rûtha wa ta bûra waugire. 24 Narîo riîtwa rîaku rîgaakumua tene na tene, antû bakauga, ‘Mwathani wa Njûûrî, Ngai wa Isiraeri, n'we Ngai wa Isiraeri!’ Na mûciî wakwa, niû Ndaundi mûruti ngûgî waku, ûkaarika mbere yaku. 25 N'ûntû îîndî Ngai wakwa nkûgîa na ûcamba bwa gûkûromba n'ûntû woû, n'ûnguûrîrîîtie wauga atî ûkaambakîra nyomba. 26 Îîndî woû Mwathani, ûrî Ngai, ûra eeranîîre naani niû mûruti ngûgî waku mantû mama meega. 27 Îîndî nûthaarimîîte mûciî wakwa, niû mûruti ngûgî waku, kaingo mûciî wakwa ûtûûra tene na tene mbere yaku. N'ûntû kîra woû Mwathani ûthaarimîîte, kîîgagua kîrî kîîthaarime tene na tene.”