16
1 Nabo baathûngîria Îthandûkû rîa Kîrîîkanîro rîa Ngai, na barîaiga ndeeni ya îrema rîra Ndaundi aarî akûrîthuuranîra. Rîru baaruta igongwana bia kûbîîthua na bia ngwatanîro mbere ya Ngai. 2 Ndaundi akûrîîkia kûruta igongwana bibu bia kûbîîthua na bia ngwatanîro, aathaarima antû riîtwani rîa Mwathani. 3 Rîru aagaîra antû ba Isiraeri bonthe, antû arûme na aka, woora ûmwe apeewa mûgaate, na kînuku kîa nyama na kîûmbwa gîa ncabiibû.4 Nkûrûki ya ûgu, Ndaundi aathuura bamwe ba Arawi batuîka atûmîki mbere ya Îthandûkû rîa Mwathani, bagoongaga, bagîcookagia nkaatho na gûkumia Mwathani, Ngai wa Isiraeri. 5 Aathuura Asabu gûtuîka mûtongoria agîteethagîîrua i Sakaria, Njeyeri, Semiramothi, Njeiyeri, Matithia, Eriabu, Benaya, Obendi-Endomu na Njeiyeri. Aabathuurire batuîka ariingi ba inaanda na wandîndî cia ndigi inyingî. Asabu aaringaga tamburini, 6 nabo athînjîri ba Ngai Benaya na Njaasieri, baathuurwa batuîka ariingi ba tarumbeta batagûtigithîria mbere ya Îthandûkû rîa Kîrîîkanîro rîa Mwathani.
7 Kwoogu, ntugû înu n'yo Ndaundi aaneenkeere Asabu na aruagina Arawi rîrî îgiita rîa mbere ngûgî ya kwinîra Mwathani nyîmbo cia nkaatho.
Rwîmbo rwa gûkumia
(Sabu 105:1-15; 96:1-13; 106:1, 47, 48)
8 Cookeriani Mwathani nkaatho,
îtaani riîtwa rîake,
menyithiani mîgongo yonthe bûra arûthîîte!
9 Mûkeneereeni, inîraani Ngai nyîmbo cia kûmûkumia;
ugaani ngûgî ciake cia kûrigaria!
10 Îîkumîrieni riîtwa rîake rîîtheru;
bara bacwaga Mwathani i bakene.
11 Îthiini kîrî Mwathani Mwene Inya;
Îthiiyagaani kîrî Mwathani rîonthe.
12 Ririkanaani ngûgî cia kûrigaria ira arûthîîte,
biama biake na magamba mara agiitîîte,
13 biû nciarwa cia Îburaîmu, mûruti ngûgî wake,
biû nciarwa cia Njakubu, athuure baake.
14 We Mwathani, n'we Ngai wetû,
bûra agiitaga magamba ibwiyîkeene nthîgûrû yonthe.
15 Bûtikaariganîrue i kîrîîkanîro gîake tene na tene,
wîrane bwake kîrî nthuke ngiri,
16 kîrîîkanîro kîra aarûthire na Îburaîmu,
na wîrane bûra apeere Isaka.
17 Aburikithia kîrî Njakubu ta watho,
amûneenkera kîrîîkanîro gîku gîa tene na tene.
18 Auga: “Nkabûnenkera nthîgûrû ya Kanaani,
n'yo îgaatuîka into bienu bwingwa.”
19 Îgiita rîru mûtari wenu warî ûmûniini,
bwarî baakai, na bûrî ageni ndeeni ya nthîgûrû ya Kanaani,
20 bûkîangaga kuuma mûgongo ûmwe kûthi mûgongo ûra ûngî,
kuuma nthîgûrû îmwe mwanka nthîgûrû îngî.
21 Ngai ateetîgîîria muntû nwa ûrîkû abainyîîria;
n'ûntû n'akaaniirie anene:
22 “Bûtigaatongithie eetûûrîrua maguta baakwa;
bûtikaarûthîre iroria biakwa ûthûûku!”
23 Inîraani Mwathani, nthîgûrû yonthe.
Tûmîîriani ûkumio bwake kîrî mîgongo,
ngûgî ciake cia kûrigaria kîrî antû bonthe.
24 Tûmîîriani mîgongo ûkumio bwake,
îraani antû bonthe ngûgî ciake cia kûrigaria.
25 N'ûntû Mwathani i mûnene, arî îgweta rîînene mûno
nabatîîrue gûtîîywa nkûrûki ya ngai cionthe.
26 Ngai cionthe cia mîgongo îra îîngî i mîbuanaano ya ûtheri;
îndî Mwathani n'aûmbire îgûrû.
27 Ûkumio na ûnene i bimûthiûrûkîrîîte,
inya na gîkeno ciûyûri nyomba yake.
28 Kumiani Mwathani, biû mîîrîga yonthe ya antû,
yîî, ûmbûraani ûkumio na inya yake.
29 Nenkeraani Mwathani ûkumio bwa riîtwa rîake;
reeteeni igongwana na bûthûûngîre nyomba yake.
Gongeraani Mwathani bantû aake ara atheru.
30 Woû nthîgûrû yonthe; inaina mbere yake!
Aigîîte nthîgûrû îtakwenyeenya, îtiinainîka.
31 Kenaani biû îgûrû na nthîgûrû!
Îraani mîgongo, “Mwathani n'we akwathana!”
32 Îria i rîgoondoke, amwe na bionthe bira birî ku!
Kenaani biû mînda na bionthe bira birî ku!
33 I rîo mîtî yonthe mûthitûûni îkaina i gîkeno
mbere ya Mwathani ûra aayîîte
yîî, ûra aayîîte kûgiitîra nthîgûrû îgamba.
34 Cookeriani Mwathani nkaatho n'ûntû n'ûmwega,
n'ûntû wendo bwake bûtûûraga tene na tene!
35 Îraani Mwathani,
“Twonokie, woû Ngai wa wonokio bwetû,
ûtwîthîranie amwe na ûtwonokie kuuma kîrî mîgongo,
kaingo tûûmba gûkumia riîtwa rîaku rîîtheru,
tûkeneere na tûgûkumie.”
36 Mwathani akumue, Ngai wa Isiraeri,
kuuma tene na tene. Mwanka tene na tene!
Nabo antû bonthe bauga, “Aameni!” Na baakumia Mwathani.
Kûgonga mbere ya Îthandûkû rîa Kîrîîkanîro rîa Mwathani
37 Kwoogu, mûnene Ndaundi aatiga Asabu na aruagina Arawi bantû ara baigîîte Îthandûkû rîa Maathana ma Kîrîîkanîro kîa Mwathani, baruta ngûgî ira ciendekaga mbere ya îthandûkû rîru wa kîra ntugû. 38 Na kaîrî aatiga Obendi-Endomu, mwana wa Njenduthuni, amwe na antû baangî mîrongo îthanthatû na banaana babateethagîîria. Obendi-Endomu mwana wa Njenduthuni na Osa baarî akaria ba mîîrîga. 39 Mûnene Ndaundi aiga mûthînjîri Sandoki na athînjîri bangî ba Ngai barî aruti ngûgî ba îrema rîa Mwathani rîra rîarî bantû a kûgongera naagu Ngibeoni 40 kaingo barutagîra Mwathani kîgongwana gîa kûbîîthua îgûrû ya kîthînjîro gîa kîgongwana gîa kûbîîthua rîonthe rûkîîrî na ûgoro, kûringana na mantû monthe mara maandîkîîtwe wathooni bwa Mwathani, mara aathîîte antû ba Isiraeri. 41 Bara baarî nabo i Emani, na Njenduthuni na bara bonthe baathuurîîtwe, bara beetîîtwe na mariîtwa maao, kaingo bacookeria Mwathani nkaatho, n'ûntû wendo bwake i bwa tene na tene. 42 Emani na Njenduthuni baarî na tûrumbeta na tamburini n'ûntû bwa kwina, na inanda bîa rwîmbo n'ûntû bwa nyîmbo cia gûkumia Ngai. Aana ba Njenduthuni baathuurirwe gûkaria mîîrîga. 43 Rîru babu bangî bonthe woora muntû aathi gwake mûciî, n'we Ndaundi eenûka aathi kûthaarima mûciî wake.