Kûthuuranîra kûthaamithia îthandûkû rîa Maathana ma kîrîîkanîro
15
1 Ndaundi eebakîîre nyomba ndeeni ya Taûni ya Ndaundi. Acooka aathuuranîra îthandûkû rîa Kîrîîkanîro rîa Ngai bantû aarîo, arîambîra îrema. 2 Na auga, “Gûtirî muntû ûngî nwa ûrîkû agaakamata îthandûkû rîa Ngai tatiga Arawi, n'ûntû Mwathani n'abathuurire barîkamataga na bamûtûmîkagîra tene na tene.” 3 Kwoogu, eethîrania antû ba Isiraeri bonthe baaya Njerusaremu, kaingo baareeta îthandûkû rîru rîa Mwathani bantû ara aarîthuuranîrîîte. 4 Rîru Ndaundi eeta nciarwa cia Arûni na Arawi. 5 Kuuma mûciî wa Koathi, baaya Urieri, amwe na aruagina îgana rîa mîrongo îîrî ruungu rwa ûrûngamîîri bwake; 6 kuuma mûciî wa Merari baaya Asaya amwe na aruagina magana maîrî ma mîrongo îîrî ruungu rwa ûrûngamîîri bwake; 7 kuuma mûciî wa Ngerisomu, baaya Njoeri amwe na aruagina îgana rîa mîrongo îthatû ruungu rwa ûrûngamîîri bwake; 8 kuuma mûciî wa Erisafani, baaya Semaya amwe na aruagina magana maîrî ruungu rwa ûrûngamîîri bwake; 9 kuuma mûciî wa Eburoni, baaya Erieri amwe na aruagina mîrongo înaana ruungu rwa ûrûngamîîri bwake; 10 na kuuma mûciî wa Usieri, baaya Aminandabu amwe na aruagina îgana rîmwe na îkûmi na baîrî, ruungu rwa ûrûngamîîri bwake.11 Ndaundi eeta athînjîri ba Ngai baîrî: Sandoki na Abiathari, amwe na Arawi bara bathanthatû, Urieri, Asaya, Njoeri, Semaya, Erieri na Aminandabu. 12 Abeera, “Biû bûrî atongoria ba mîciî ya Arawi. Îîtherieni amwe na aruanyûkwe, kaingo bûgîîra îthandûkû rîa Mwathani, Ngai wa Isiraeri, mwanka bantû ara ndîrîthuuranîrîîte. 13 N'ûntû bûtaarîkamata îgiita rîa mbere, Mwathani, Ngai wetû, n'atûkaanûkiirie n'ûntû bûtaarîmenyeera kûringana na bûra kwabatîîrue.” 14 Kwoogu, athînjîri ba Ngai na Arawi beetheria kaingo bagîîra îthandûkû rîa Mwathani, Ngai wa Isiraeri. 15 Arawi barîkamata na ituro bagîtûmagîra mîaro yaarîo wa ta bûra Musa aathanîîte, kûringana na kiugo kîa Mwathani.
16 Ndaundi aacooka aatha anene ba Arawi bathuure bamwe ba antû ba mîciî yao beegue bakiina na gîkeno na bagîtûmagîra into bia kwina nabio ni, inanda, wandîndî cia ndigi inyingî na tamburini. 17 Kwoogu Arawi baathuura antû baba, Emani, mwana wa Njoeri, mûruagina Asabu ûra aarî mwana wa Mberekia na Ethani mwana wa Kusaya wa mwîrîga wa Merari. 18 Na baathuura Arawi bangî baciao beegua barî ateetheeria baao. Nabo baarî, Sakaria, Yaasieri, Semiramothi, Njeiyeri, Uni, Eriabu, Benaya, Maaseya, Matithia, Erifereu, Mikineya, na akaria ba mwîrîga, Obendi-Endomu na Njeyeri. 19 Nabo aini baba, Emani, Asabu na Ethani baathuurwa ba kûringa tamburini ya rûthuku. 20 Sakaria, Asieri, Semiramothi, Njeiyeri, Uni, Eriabu, Maaseya na Benaya, baarî ariingi ba wandîndî cia mwario wa Aramothi. 21 Îndî Matithia, Erifereu, Mikineya, Obendi-Endomu, Njeyeri na Asasia baatongoragia barî na wandîndî cia ndigi inyingî cia mwario wa Semenithi. 22 N'we Kenania mûtongoria wa Arawi n'ûntû bwa ûmenyo bwa wini bûra aarî nabu, aatuîkithiirue mûtongoria wa babu bonthe. 23 Mberekia na Erikana baarî akaria ba Îthandûkû rîa Kîrîîkanîro. 24 Sefania, Njosafati, Nethaneri, Amasai, Sakaria, Benaya na Erieseri, bara baarî athînjîri ba Ngai, baatuîkithiirue ariingi ba karumbeeta mbere ya Îthandûkû rîa Kîrîîkanîro rîa Ngai. Obendi-Endomu na Njeiya wana bo baatuîkithiirue akaria ba Îthandûkû rîa kîrîîkanîro.
Îthandûkû rîa Kîrîîkanîro rîairwa Njerusaremu
(2Sam 6:12-22)
25 Kwoogu, Ndaundi, akûrû ba antû ba Isiraeri na atongoria ba ikundi bia ngiri, baathi kûthûkia îthandûkû rîa Maathana ma kîrîîkanîro rîa Mwathani kuuma nyomba kwa Obendi-Endomu na nkena. 26 N'ûntû Ngai n'ateethiirie Arawi bara baakamatîîte Îthandûkû rîa Maathana ma Kîrîîkanîro rîa Mwathani, ncamba mûgwanja na ntûrûme mûgwanja i ciarutirwe kîgongwana. 27 Ndaundi eekîrîîte nguo îndaaya ya gatani înthongi, bûmwe na Arawi bonthe bara baakamatîîte îthandûkû, aini na Kenani mûtongoria wa aini. Tatiga nguo înu ndaaya, Ndaundi n'eekîrîîte ebondi ya gatani. 28 Kwoogu, antû bonthe ba Isiraeri bakeneete baira Îthandûkû rîa Kîrîîkanîro rîa Mwathani mwanka Njerusaremu. Baariumagariirie na mûrurumo wa coro, karumbeta, tamburini, na mîario îmînene ya wandîndî cia ndigi inyingî na inaanda.
29 Wa Îthandûkû rîa Kîrîîkanîro rîa Mwathani rîthûngîrîte Taûni ya Ndaundi, Mikari, mwarî wa Saûrû, aaraithîîria ndîrîcaani, oona mûnene Ndaundi akiina na agîkeneera, eegua nkorooni yake amûmena.