Ngûgî cia Ndaundi Njerusaremu
14
1 Rîru Iramu mûnene wa Turo n'aatûmire atûmwa kîrî Ndaundi, amwe na mîtî ya mîthithinda, aacooka amûtûmîra mabundi ma mbaaû na mabundi ma maiga ba kûmwakîra nyomba ya ûnene. 2 Na Ndaundi aamenya i Mwathani aamûrikithîîtie arî mûnene wa Isiraeri na atî ûnene bwake i bûûkîîrîîtue mûno n'ûntû bwa antû baake Isiraeri.3 Naagu Njerusaremu, Ndaundi n'aathûkiirie aka bangî nkûrûki, na aatuîka îthe wa aana baingî ba nthaka na ba aarî. 4 Mama i mo mariîtwa ma aana bara aagîîrîîre nabo naagu Njerusaremu, Samua, Sobabu, Nathani, Soromoni, 5 Ibari, Erisua, Erifereti, 6 Noga, Nefegi, Njafia, 7 Erisama, Beerianda na Erifereti.
Ndaundi aacinda Afirisiti
8 Afirisiti bakwîgua Ndaundi n'eetûrîîrue maguta aatuîkithua mûnene wa nthîgûrû yonthe ya Isiraeri, i beetiirie noogo nainya mûno kûmûcwa, Ndaundi akwîgua ntheto inu, auma aathi kûrîîkana nabo. 9 Afirisiti i baarî bakûûya baanjîîria kwithûkîra kîbonde kîa Refaimu. 10 Kwoogu Ndaundi aûria ûkûrû kuuma kîrî Ngai, “Mbîtie nkaithûkîre Afirisiti? Ûkabaneenkanîra kîrî niû?” Mwathani amûcookeria, “Îthi, nkabaneenkanîra kîrî woû.”
11 Kwoogu, Ndaundi na njûûrî yake beetia aathi naagu Mbaari-Perasimu, na i noogo baabacindîîre. Auga, “Wa ta bûra rûûyî ruunûkaga, Ngai n'aunûkîrîte anthû baakwa gûkûrûkîîra njara ciakwa.” Kwoogu bantû agu eetwa Mbaari-Perasimu. 12 Afirisiti bakuugia, baatigire mîbuanaano ya ngai ciao naagu, n'we Ndaundi aaruta watho îbîîthue na mwanki.
13 Na Afirisiti baacooka kaîrî baithûkîra kîbonde gîku. 14 Kwoogu Ndaundi aûria ûkûrû kaîrî kuuma kîrî Ngai, Ngai amwîra, “Ûtigeetie bwa îgûrû cwe, bacîgîîrie ûbaithûkîre ûbaumîîte bwa mbarî ya mbere naara kûrî na mîtî îra îîtagwa mîporosandi. 15 Na rîra ûkeegua muugio wa makinya îgûrû rîa mîporosandi înu, uume ûthi ndûani, n'ûntû gûku i kuuga Ngai akûthi arî mbere yaku gûtura njûûrî ya Afirisiti.” 16 Kwoogu, Ndaundi aarûtha wa ta bûra Ngai aamwathîîte, na aatura njûûrî ya Afirisiti kuuma Ngibeoni mwanka Ngeseri. 17 Ndaundi aagîa îgweta nthî înu yonthe, n'we Mwathani eekîra ûguaya mîgongo yonthe, yamûkuthûka mûno.