Îthandûkû rîa Maathana ma Kîrîîkanîro Kiriathi-Njearimu
(2Sam 6:1-11)
13
1 Rîru Ndaundi aaranîria na atongoria bara baarûngamagîîra ikundi bia acikaarî ngiri na ba ikundi bia acikaarî îgana, amwe na atongoria bonthe. 2 Rîru eera antû ba Isiraeri bonthe bara beethîranîîte, “Ûkeegua bûgeetîganîîria naani, na ûkeegua i wendo bwa Mwathani, Ngai wetû, ga tûtûme atûmwa bathi bageete antû beetû bara batigîîtwe iteere bionthe bia nthîgûrû ya Isiraeri, amwe na athînjîri ba Ngai na Arawi bara barî ndeeni ya taûni yao na ndeeni ya gûntû kwao gwa kûrîîthia, baaye bagwatanîre naati. 3 Rîru tûthi tûgîîre îthandûkû rîa Maathana ma kîrîîkanîro rîa Ngai wetû, n'ûntû tûtaatindanîra narîo kagiita ka wathani bwa mûnene Saûrû.” 4 Antû bonthe bara beethîranîîte, beetîganîîria n'ûntû i boonire bwarî ûntû bwega bwa kûrûtha.5 Kwoogu, Ndaundi eethîrania antû ba Isiraeri ba kuuma nthîgûrû înu yonthe, kuuma kauro ga Siori kara karî Miisiri mwanka mwîrîgaani wa Amathi, kaingo baareeta îthandûkû rîa kîrîîkanîro rîa Ngai kuuma Kiriathi-Njearimu mwanka Njerusaremu. 6 Ndaundi na antû bonthe ba Isiraeri bara aarî nabo beetia taûni ya Baara ndeeni ya Njunda, na nwa yoo kaîrî îîtagwa Kiriathi-Njearimu, îra îrî nthîgûrû ya Njunda, baathi kûgîîra Îthandûkû rîa Mwathani Ngai rîra rîîtanagîrua na riîtwa rîa Mwathani Mwene Inya ûra akaraga gatîgatî ga akerubi. 7 Kwoogu, baakamata îthandûkû rîru rîa Ngai na nkaarî înjerû ya ng'ombe kuuma nyomba ya Abinandabu, na Usa na Ayo baatongoreeria nkaarî înu. 8 Ndaundi na antû ba Isiraeri bonthe i baakenagîîra mbere ya Ngai na inya yao yonthe bakîmûkumia. Baina bakîringaga mîthemba mwanya mwanya na into bia kwina nabio ta: wandîndî cia ndigi inyingî, ngita, inanda, tamburini na tûrumbeeta.
9 Bagûkinya rwaraani rwa kûbûûrîra rwa Kindoni ng'ombe ira ciakamatîîte îthandûkû rîa kîrîîkanîro rîa Ngai ciataratara, Usa aataambûrûkia njara arîgwatîîra. 10 Warîo Mwathani aathûûra ni Usa, na amûûraga n'ûntû bwa kûgwatîîra îthandûkû na njara yake, kwoogu akuîra waagu mbere ya Ngai. 11 Ndaundi n'we aathûûra mûno n'ûntû bwa bûra Mwathani aakaanûkiirie Usa na mûthûûro ûgana. Na bantû agu eetagwa Peresi-Usa amwanka îmunthî tûrî. 12 Ntugû înu Ndaundi aamaka mûno i Ngai na aûria, “Îîndî, n'ata mbûûmba kwira îthandûkû rîa kîrîîkanîro rîa Ngai gwakwa?” 13 Kwoogu, Ndaundi ataira îthandûkû rîru rîa kîrîîkanîro rîa Ngai mwanka Taûni ya Ndaundi, bantû a ûgu ariira mûciî wa Obendi-Endomu, Mûngathi. 14 Îthandûkû rîru rîa kîrîîkanîro rîa Ngai rîakarire mûciî kwa Obendi-Endomu Mûngathi bantû a mîeri îthatû; na Mwathani aathaarima Obendi-Endomu na mûciî wake unthe na into biake bionthe bira aarî nabio.