Athingati ba Ndaundi
12
1 Baba n'antû arûme bara baagwatanîîre na Ndaundi naagu Sikiragi, rîra ataarî na rûûtha rwa kûthiiyanga agîkuthûka mûnene Saûrû mwana wa Kisi. Baarî amwe na acikaarî ncamba bara baamûteethagia ndûani. 2 Babu baarî antû ba mwîrîga wa Benjameni wa ta Saûrû. Baarî antû baarî sabaa ya mîgwî, na ageri maiga na gîkûtha bagîtûmagîra njara cionthe, ya ûrîo na ya kîmotho. 3 Mûtongoria wao aarî Ayeseri, agîteethagîîrua i Njoasi, bonthe aana ba Semaa kuuma Ngibea. Bara bangî i, Njesieri na Pereti, aana ba Asimabethi, Mberaka, Njeû wa kuuma Anathothi, 4 Isimaya kuuma Ngibeoni, muntû ncamba ûmwe wa bara mîrongo îthatû na kinya arî mûtongoria wao, amwe na Njeremia, Njaasieri, Njoanani, Njosabandi, kuuma Ngendera, 5 Erusai, Njerimothi, Bearia, Semaria, Sefatia, wa kuuma Arumabi, 6 Erikana, Isia, Asareri, Njoeseri na Njasobeamu ba kuuma mûciî wa Kora 7 na Njoera na Sebandia, aana ba Njeroamu kuuma Ngendori.8 Kuuma mwîrîga wa Ngandi, baba i bo acikaarî ncamba cia ndûa bara baagwatanîîre na njûûrî ya Ndaundi arî wîbithooni bwake naagu rwanda. Baarî waara bwa gûtûmîra matumo na rong'o, barî na moothiû ma kûguayia ta ma cimba, na irîmaani baarî baayiûu ta nkûrûngû. 9 Mûtongoria wao ûra mûnene aarî Eseri, wa baîrî Obandia, wa bathatû Eriabu, 10 wa bana Misimana, wa bataano Njeremia, 11 wa bathanthatû Atai, wa mûgwanja Erieri, 12 wa banaana Njoanani, wa kenda Erisabandi, 13 wa îkûmi Njeremia, na wa îkûmi na ûmwe Makibanai. 14 Angandi babu baarî atongoria ba njûûrî. Kûringana na itî biao, ûra mûniini aarûngamagîîra gîkundi gîa acikaarî îgana, na ûra mûnene aarûngamagîîra gîkundi gîa acikaarî ngiri îmwe. 15 Baba i bo antû bara baariingire muuro wa Njorondani mweri wa mbere rîra muuro waûyûri rûûyî nteere cionthe na beengatia antû bara baatwîre ibondeeni umîîro bwa riûa na ûthwîro bwa riûa bwa muuro.
16 Antû bangî ba kuuma mwîrîga wa Benjameni na bamwe ba kuuma mwîrîgaani wa Njunda i baathiire ara Ndaundi eebithîîte. 17 Ndaundi auma ome kûrîîkana nabo, abeera, “Wegua bûûyîîte gwakwa ta acoore kaingo bûûnteethia inkûbwîtîgîîria na nkoro yonthe, îndî ûkeegua bûûyîîte kaingo bûûnkunyanîra kîrî anthû baakwa na tika ndûthîîte ûthûûku nwa bûrîkû, Ngai wa ba baaba beetû aroobwona na akabûgiitîra îgamba.” 18 Agu Kîrundu ayîîra Amasai, mûtongoria wa antû babu mîrongo îthatû, auga,
“Tiû tûrî antû baaku, woû Ndaundi,
tûrî rûteere rwaku, woû mwana wa Njesii!
Ûkiri na ûûmbani biîgue birî biaku,
na kûûmbana kwîgue kûrî na muntû wonthe ûra agaagûteethia!
N'ûntû Ngai waku n'we agûteethagia.”
I rîo Ndaundi abeetîgîîrie na abatuîkithia atongoria ba njûûrî ciake cia kwithûkaga.
19 Acikaarî bangî ba mwîrîga wa Manase baatoorooka na baagwatanîra na Ndaundi, kagiita kara athiire amwe na Afirisiti kûrûa na mûnene Saûrû. Îndî amwe n'ogu, ataabateetheeria n'ûntû aathani ba Afirisiti baathungurumire bamwîngatia aathi. Bauga, “Tûgeekîra ûtûûro bwetû ûgwatiini n'ûntû nwa atoorooke agacooka kîrî mûnene wake Saûrû.” 20 Kwoogu, Ndaundi arî Sikiragi, antû baba ba mwîrîga wa Manase i baathiire kîrî we: Andina, Njosabandi, Njendiaeri, Mikaeri, Njosabandi, Eriu na Sirethai. Woora ûmwe wao aarî mûtongoria wa gîkundi gîa acikaarî ngiri îmwe ndeeni ya mwîrîga wa Manase. 21 Baateetheeria Ndaundi kûrûa na ikundi bia bara baamwithûkagîra, n'ûntû bonthe baarî acikaarî ncamba na atongoria njûûrîîni ya acikaarî. 22 Wa îra ntugû, antû i baathiiyaga kîrî Ndaundi kûmûteetheeria, mûthiani aagîa na njûûrî înene mûno, ta njûûrî ya Ngai.
23 Ûyû nuu mûtari wa ikundi bia acikaarî bara baarî na mathaga bara baagwatanîîre na Ndaundi naagu Eburoni kaingo bamûtuunyanîra wathani kuuma kîrî Saûrû, kûringana na kiugo kîa Mwathani: 24 Antû ba mwîrîga wa Njunda bara baarî na matumo na rong'o, baarî ngiri ithanthatû cia magana manaana bara baarî na mathaga maao ma ndûa. 25 Kuuma mwîrîga wa Simioni, i kwarî na ncamba cia ndûa ngiri mûgwanja cia îgana rîmwe. 26 Kuuma mwîrîga wa Rawi, i kwarî na acikaarî ngiri inya cia magana mathanthatû. 27 I kwarî na Njeoyanda, wa rûciaro rwa Arûni ûra aarî na acikaarî baangî ngiri ithatû cia magana mûgwanja, 28 na kinya Sandoki, mûthaka aarî na ûtea ndûani, we amwe na atongoria mîrongo îîrî na baîrî kuuma mûciî wao ungwa. 29 Kuuma mwîrîgaani wa Benjameni, mwîrîga wa Saûrû, i kwarî na acikaarî ngiri ithatû. Baingî baao ibaakarîîte barî eetîgua kîrî mîciî ya Saûrû mwanka kagiita gaku. 30 Kuuma mwîrîga wa Eburaimu, i kwarî na acikaarî ngiri mîrongo îîrî cia magana manaana, acikaarî ncamba mûno na kaîrî baarî îgweta ndeeni ya mîciî yao; 31 Kuuma nucu ya mwîrîga wa Manase: antû ngiri îkûmi na inyanya, bara bagweteetwe mariîtwa kaingo bathi gûtuîkithia Ndaundi mûnene. 32 Kuuma mwîrîga wa Isakaari i kwarî na atongoria magana maîrî amwe na antû ba mîciî yao bonthe bara baarî ruungu rwa watho bwao. Atongoria babu baarî na ûûgî bwa kûmenya magiita na i baiyî bûra antû ba Isiraeri baabatîîrue barûtha. 33 Kuuma mwîrîgaani wa Seburuni, i kwarî na acikaarî ngiri mîrongo îtaano bara baarî eetîgua na baarî na ûmenyo bwa ndûa. Beethuuranîra na mathaga ma ndûa ma mîthemba yonthe, beethuuranîrîîte gûteetheeria Ndaundi. 34 Kuuma mwîrîgaani wa Nabutarî i kwarî na atongoria ngiri îmwe amwe na acikaarî ba ndûa ngiri mîrongo îthatû na mûgwanja bara baarî na rong'o na matumo. 35 Kuuma mwîrîgaani wa Ndani i kwarî na acikaarî ba ndûa ngiri mîrongo îîrî na inyanya na magana mathanthatû bara baarî na mathaga ma ndûa beethuuranîrîîte n'ûntû bwa ndûa. 36 Kuuma mwîrîgaani wa Aseri i kwarî na acikaarî ba ndûa ngiri mîrongo îna baarî na ûmenyo bwa ndûa, beethuuranîrîîte n'ûntû bwa kûrûa. 37 Kuuma mîîrîgaani ya Rubeni, Angandi na nucu ya mwîrîga wa Manase kuuma rûgongo rwa muuro wa Njorondani i kwarî na acikaarî na acikaarî ngiri îgana rîa mîrongo îîrî barî na mîthemba yonthe ya mathaga ma ndûa.
38 Baba bonthe baarî antû baûmba kûrûa beeruta baathûngîra njûûrîîni. Baathiire Eburoni na yeerekeeria rîmwe rîrî gûtuîkithia Ndaundi mûnene wa Isiraeri yonthe. Nabo antû bonthe ba Isiraeri, kinya bo baaya amwe barî na yeerekeeria rîmwe rîa gûtuîkithia Ndaundi mûnene.
39 Kwoogu, baakara na Ndaundi bantû a kagiita ga ntugû ithatû, bakîrîîyaga na bakînyuunyaga, n'ûntû antû ba mîciî yao baarî bakûbathuuranîra biakûrîa. 40 Nkûrûki ya ûgu, antû baao ba akubî na kinya ba kûûraaya ta naagu Isakaari, Seburuni na Nabutarî, babaretera biakûrîa babikamatîîte na mang'ooi, nkamîîra, nyûmbû na ng'ombe. Babaretera kinya mûtu, keki cia nkûyû, ikûmbwa bia ncabiibû îmbûûmithie, ndibei na maguta, ng'ombe na ng'ondu inyiingî, kwegua kûrî na biakûrîa biingî, n'ûntû i kwarî na gîkeno ndeeni ya Isiraeri.