Ndaundi aatuîka mûnene
(2Sam 5:1-10)
11
1 Antû ba Isiraeri bonthe beethîrana amwe kwa Ndaundi naagu Eburoni, bamwîra, “Raitha, tiû tûrî antû baaku ba mûciî ndeeni. 2 Bantû a kagiita kaaraaya kinya rîra Saûrû aarî mûnene wetû, i woû watongoreerie antû ba Isiraeri kûthi ndûani. Na Mwathani Ngai waku akwîra, ‘I woû ûkaarîîthagia antû baakwa ba Isiraeri, na i woû ûgaatuîka mûtongoria wa Isiraeri.’ ” 3 Rîra akûrû bonthe ba Isiraeri baayire kîrî mûnene Ndaundi naagu Eburoni, aiga kîrîîkanîro nabo mbere ya Mwathani, na beetûûrîria Ndaundi maguta bamûtuîkithia mûnene wa Isiraeri, wa ta bûra Mwathani eeranirîte gûkûrûkîîra kîrî Samweri.4 Nyumaani Ndaundi na antû ba Isiraeri bonthe i baathiire Njerusaremu (îra yaiyîkeene ta Njebusi). 5 Anjebusi bara baatûûraga ku beera Ndaundi, “Ûtiithûûngîra taûni îno.” Îndî amwe na ûgu, Ndaundi neegwatîîre taûni îra yarî îmbirige na maiga ya Sayuuni, Taûni ya Ndaundi.
6 Ndaundi aarî akuuga, “Muntû ûra akaithûkîra Anjebusi arî wa mbere, agaatuîka mûnene na mûtongoria wa njûûrî ya acikaarî.” Kwoogu Njoabu, mwana wa Seruya, aatuîka wa mbere kûbaithûkîra, na aatuîkithua mûnene. 7 Ndaundi aakara ndeeni ya taûni înu bantû ara airigîrîtwe na rûthingo, na n'ûntû bwa ûgu, taûni înu yeetwa Taûni ya Ndaundi. 8 Aaka taûni înu kaîrî, amîanjîîria kuuma Miro, amîthiûkîîria na rûthingo kunthe, n'we Njoabu aarûngamîîra gûcookeerua kwa mîako înu îngî ya taûni. 9 N'we Ndaundi aathi na mbere kûgîa inya nkûrûki n'ûntû Mwathani wa Njûûrî n'aarî amwe n'we.
Ncamba cia ndûa cia Ndaundi
(2Sam 23:8-39)
10 Mama i mariîtwa ma atongoria ba ncamba cia ndûa cia Ndaundi, bara amwe na antû bara bangî bonthe ba Isiraeri, baamûgwatire mbaru barî amwe kaingo atuîka mûnene, kûringana na kiugo kîa Mwathani kîra augîîte îgûrû rîa antû ba Isiraeri. 11 Mama i mo mariîtwa ma antû bara ncamba bara Ndaundi aarî nabo: Njasobeamu, Muakimoni, ûra aarî mûtongoria wa bara mîrongo îthatû. Ûra aûkîîrie îtumo rîake aûraga antû magana mathatû yîîkia rîmwe ndûani. 12 Rîru ûra aathiingatîîrîîte gatîgatî ka bara ncamba bathatû aarî Eriasari mwana wa Ndondo, wa mûgongo wa Oi. 13 Ntugû îmwe Eriasari aarî amwe na Ndaundi naagu Pasi-Ndamimu, kagiita kara Afirisiti beethîranîîte barûa. Naagu i kwarî na mûnda warî na sayiri înyiingî, nabo antû ba Isiraeri baarî bagûkuthûka Afirisiti. 14 Îndî Ndaundi na Eriasari baarûngama batakwenyeenya gatîgatî ka mûnda ûyu kaingo bautheteera na baûraga Afirisiti. Mwathani aboonokia na abanenkera kûûmbana kûûnene.
15 Na ncamba ithatû kuuma kîrî anene mîrongo îthatû beendama mwanka kûra kwarî na rwara rwa iiga, baathi kîrî Ndaundi kûra kwarî na îkurungu naagu Anduramu. Kagiita gaku njûûrî ya Afirisiti yaambîîte marema kîbondeeni kîa Refaimu. 16 Ndaundi kagiita gaku aarî bantû aake a wîbitho, njûûrî ya Afirisiti n'yo yarî Bethireemu. 17 Ndaundi n'we eerirîria mûno auga, “Ûtakîîgua imbona muntû wa gûnkuundia rûûyî rwa kûnyua kuuma kîthimaani kîa Bethireemu kîra kîrî mwîrîgaani” 18 Kwoogu ncamba ira ciake ithatû ciauma, ciarugunyîîra gatîgatî ga kambî ya njûûrî ya Afirisiti, baathi na gûtaa rûûyî kîthimaani kîa Bethireemu, akubî na mwîrîga wa taûni, baareetera Ndaundi. Îndî Ndaundi aarega kûrunyua. Bantû anyua arwîtûûra nthî ta kîgongwana kîrî Mwathani 19 na auga, “Ngai aroombebithania na ûntû ta bûbû, ntiûmba kûburûtha mbere ya Ngai wakwa. Ma, waûmba kûnyua nthakame ya ûtûûro bwa antû baba? N'ûtûûro bwao beekîîre ûgwatiini baareeta rûûyî rûrû!” Kwoogu Ndaundi ataanyua rûûyî rûru. Mamu i mantû mamwe ma mara ncamba ira ithatû ciarûthire.
Ncamba cia ndûa mîrongo îthatû cia Ndaundi
20 Abisai, mûruagina wa Njoabu, aarî mûtongoria wa ncamba inu mîrongo îthatû. We aarûire na îtumo rîake na antû magana mathatû, abaûraga, eecwîra riîtwa gatîgatî ga ncamba ira ithatû. 21 Ûyu n'we wagîîre îgweta nkûrûki ya babu mîrongo îthatû, na aarî mûtongoria wao, wana kinya ûkeegua ataarî ûmwe wa babu bathatû.
22 N'we Benaya, mwana wa Njeoyanda, kuuma Kabuseeri, aarî mûcikaarî ncamba ûra aarûthire mantû maingî ma kûrigaria. Aûraga ncamba ciîrî kuuma Moabu, na ntugû îmwe kagiita ka mbaraabu, na eendama mûrinyaani na aûragîra cimba ku. 23 Wana kinya, aûraga Mûmiisiri ûmwe, muntû ûmûraaya mûno, ûraaya bwake bwarî mita ciîrî, n'we njaraani aakamatîîte îtumo rîînene mûno, rîgana gîtugî kîa ng'ang'a. Îndî Benaya aamûtûûngatûûngiirie arî na mûraagi unka, amûtuunya îtumo rîru, na kûûraga Mûmiisiri ûyu na îtumo rîake rîongwa. 24 Benaya, mwana wa Njeoyanda aarûthire mantû mama, eecwîra riîtwa gatîgatîîni ga ncamba ira ithatû. 25 Aagîa îgweta mûno nkûrûki ya babu bangî mîrongo îthatû, îndî ti ta bara ba mbere bathatû. Na Ndaundi amûtuîkithia mûtongoria wa bara bangî baamûkaragia.
26 Acikaarî ncamba bara bangî ba Ndaundi baarî: Asaeri mûruagina wa Njoabu, Erianani mwana wa Ndondo wa Bethireemu, 27 Samothi Mûarondi, Eresi Mûperoni, 28 Ira, mwana wa Ikesi wa kuuma Tekoa, Abieseri wa kuuma Anathothi; 29 Sibekai wa kuuma Usa; Irai Mûaoi; 30 Maarai wa kuuma Netopathi; Erendi, mwana wa Mbaana wa kuuma Netofa; 31 Ithai, mwana wa Ribai, kuuma Ngibea, wa mwîrîga wa Benjameni; Benaya wa kuuma Pirathoni; 32 Urai wa kuuma tuuro twa Gaasi, Abieri Mûaribathi; 33 Asimabethi wa kuuma Mbaarumu; Eriaba wa kuuma Saariboni; 34 aana ba Asemi wa kuuma Ngisooni; Njonathani, mwana wa Sagee wa kuuma Arari, 35 Aiyamu, mwana wa Sakari wa kuuma Arari; Erifari, mwana wa Uri; 36 Eferi, wa kuuma Mekera; Aiya Mûperoni; 37 Esiro, wa kuuma Karimeri; Naarai mwana wa Esibai, 38 Njoeri, mûruagina wa Nathani; Mibiari, mwana wa Agiri; 39 Sereki wa kuuma Amoni; Naarai wa kuuma Beerothi, ûra aarî mûkamati mathaga ma ndûa wa Njoabu, mwana wa Seruya; 40 Ira Mûithiri,
Ngarebu kinya we Mûithiri, 41 Uria Mûiti; Sabandi, mwana wa Arai, 42 Andina, mwana wa Sisa wa mwîrîga wa Rubeni, mûtongoria wa antû ba mwîrîga wa Rubeni, arî ûmwe wa ncamba ira mîrongo îthatû; 43 Anani, mwana wa Maaka, Njosafati wa kuuma Mithani; 44 Usia wa kuuma Asiterathi, Sama na Njeyeri aana ba Othamu wa kuuma Aroeri; 45 Njendiaeri na Njoa mûruagina, aana ba Simuri wa kuuma Tisi; 46 Erieri wa kuuma Maaba, Njeribai na Njosabia aana wa Erinaamu; Ithima wa kuuma Moabu; 47 Erieri, Obendi, na Yaasieri ba kuuma Soba.