Gîkuû kîa mûnene Saûrû
(1Sam 31:1-13)
10
1 Kagiitaani gaku Afirisiti i baarûaga na Aisiraeri. Aisiraeri beengatua baugia îndî baingî baao baûragîrwa kîrîmaani kîa Ngiriboa. 2 Afirisiti baarûmarûma Saûrû na aana baake mûno, na baûraga aana baake Njonathani, Abinandabu na Mariki-Sua. 3 Ndûa yaimba mûno akubî na Saûrû. Na ageri ba mîgwî bamûgwatagwata bamûguraria.4 Rîru Saûrû eera mûkamati wake wa mathaga ma ndûa ata rî, “Kûûra rûûyiû rwaku ûûmunte nkue, giria aîyî baba baangwatagwata bambûraga na bancambia.” Îndî mûkamati ûyu wake wa mathaga ma ndûa n'arî na ûguaya mûno atikîûmba kûrûtha ûgu. Saûrû aathûkia rûûyiû rwake eegwîthia îgûrû rîaru 5 Rîra mûkamati wa into biake bia ndûa oonire Saûrû agûkua wan'we eegwîthia îgûrû rîa rûûyiû rwake na baakuuyanîria. 6 Kwoogu Saûrû na aana baake bathatû baakua, na mûciî wake uunthe waakuuyanîria amwe. 7 Nabo antû ba Isiraeri bara baarî kîbondeeni bakwona njûûrî îkuthûkîîte, na kwîgua Saûrû na aana baake bagûkua, baatiganîria taûni ciao baakuthûka. Afirisiti baaya baatûûra ku.
8 Rûûni, Afirisiti bakûthi kûberenca bara baûragîîtwe, beethîra biimba bia Saûrû na aana baake baagwîte kîrîmaani kîa Ngiriboa. 9 Bamûberenca, baagiita kîongo gîake na bamûruta mathaga maake monthe ma ndûa, baatûma atûmwa nthîgûrû yonthe ya Afirisiti kuugîîria ntheto îno mbega kîrî ngai ciao cia mîbuanaano na kîrî antû baao. 10 Baiga mathaga maake ma ndûa nyomba ya ngai ciao, na baacuuria kîongo gîake ndeeni ya nyomba ya ngai îra yeetagwa Ndagoni. 11 Îndî antû ba Njabesi Ngiriandi bakwîgua mamu monthe mara Afirisiti baarûthîrîîte Saûrû, 12 ncamba ciao cia ndûa cionthe ciathi na ciathûkia mwîrî wa Saûrû na mîîrî ya aana baake, bamîreeta mwanka Njabesi. Baathika maîndî maao ruungu rwa mûpuru naagu Njabesi, nabo baatîîrîra kûrîa irio ntugû mûgwanja.