Antû bara baacookire kuuma ûkombooni
9
1 Antû ba Isiraeri bonthe i beebandîkithiirie kîîmîciî yao mabukuuni ma anene ba Isiraeri. Antû ba Njunda i baatairwe bairwa Mbabironi n'ûntû bwa kûrega gwîtîgîka kwao. 2 Antû ba mbere gûcooka ikarooni biao ndeeni ya taûni ciao baarî atûûri ba kîîwîthîre, athînjîri ba Ngai, Arawi na aruti ngûgî ba Nyomba ya Ngai. 3 Bamwe ba antû ba mîîrîga ya Njunda, Benjameni, Eburaimu na Manase i baathiire gûtûûra taûniini ya Njerusaremu. 4 Nabo baarî Uthai mwana wa Amiundi, mwana wa Omuri, mwana wa Imuri, mwana wa Bani, wa aana ba Peresi, mwana wa Njunda. 5 Na nciarwa cia Siro ciarî Asaya kîîmbere gîake na mûtongoria wao, na aana baake. 6 Na nciarwa cia Sera ciarî Njeuri na aruagina. Antû bonthe ba mwîrîga wa Njunda baarî magana mathanthatû ma mîrongo kenda.7 Na ba nciarwa cia Benjameni bara baacookire baarî Saru mwana wa Mesuramu, mwana wa Ondabia, mwana wa Asenua; 8 na Ibineya mwana wa Njeroamu, na Era, mwana wa Usi, mwana wa Mikiri, na Mesuramu, mwana wa Sefatia, mwana wa Reueri, mwana wa Ibiniya; 9 amwe na antû ba mîciî yao. Antû babu bonthe baarî magana kenda ma mîrongo îtaano na bathanthatû. Antû babu bagweteetwe i bo baarî atongoria ba mîciî yao, kûringana na mîciî ya beethe.
Athînjîri ba Ngai bara baacookire Njerusaremu
10 Athînjîri ba Ngai bara baacookire Njerusaremu baarî, Njendaya, Njeoyaribu, Njakini, 11 na Asaria mwana wa Irikia, mwana wa Mesuramu, mwana wa Sandoki, mwana wa Merayothi, mwana wa Aitubu, mûtongoria ûra mûnene wa Nyomba ya Ngai; 12 na Andaya, mwana wa Njeroamu, mwana wa Pasiuri, mwana wa Marikiya; na Maasai, mwana wa Andieri, mwana wa Njasera, mwana wa Mesuramu, mwana wa Mesiremithi, mwana wa Imeri. 13 Babu i bo baarî atongoria ba mîciî ya beethe. Babu amwe na antû ba mûciî wao bara baacookaniirie nabo bonthe baarî antû ngiri îmwe, magana mûgwanja ma mîrongo îthanthatû. Baarî atongoria barî inya înene ndeeni ya ngûgî cionthe cia Nyomba ya Ngai.
Arawi bara baacookire Njerusaremu
14 Arawi baba i bo baacookire Njerusaremu, Semaya, mwana wa Asubu, mwana wa Asirikamu, mwana wa Asabia, wa mwana wa Merari; 15 na Bakibakari na Eresi na Garari na Matania, mwana wa Mika, mwana wa Sikiri, mwana wa Asabu; 16 na Obandia, mwana wa Semaya, mwana wa Garari, mwana wa Njenduthuni; na Mberekia, mwana wa Asa, mwana wa Erikana; bara baatûûraga ndeeni ya ntûûra cia Anetofa.
Akaria ba Nyomba ya Ngai bara baacookire Njerusaremu
17 Akaria ba Nyomba ya Ngai bara baacookire Njerusaremu baarî: Sarumu, Akubu, Tarimoni na Aimani, amwe na antû ba mîciî yao. Sarumu aarî mûtongoria wao. 18 Mwanka kagiitaani gaku, akaria ba kuuma mîciî înu, i bo baakaragia Mwîrîga wa mûnene wa rûteere rwa umîîro bwa riûa bwa taûni. Agu mbereeni, baarî akaria ba mîîrîga ya kambî cia Arawi.
19 Sarumu, mwana wa Kore, mwana wa Ebiasabu, amwe na antû a mûciî wao wa Kora, baarî na ngûgî ya kûmenyeera mîîrîga ya Îrema rîa Kûrîîkanaga, ta bûra biûyûûyû biao baakari kagiita ka ûkaria bwa kambî ya Mwathani. 20 Finiasi, mwana wa Eriasari, aarî mûrûngamîîri wao agu mbereeni, na Mwathani aarî amwe n'we. 21 Sakaria mwana wa Meseremia, kinya we aarî mûkaria wa mîîrîga ya Îrema rîa Kûrîîkanaga. 22 Bonthe, antû magana maîrî na îkûmi na baîrî baathuurwa gûtuîka akaria ba mîîrîga ya Nyomba ya Ngai. Baandîkithîîtue kûringana na ntûûra ira antû ba mîciî yao baatûûraga. Mûnene Ndaundi na kîroria Samweri i bo baabathûûngîîrie ngûgîîni înu ya gîtûmi mûno. 23 Kwoogu, antû babu na nciarwa ciao, baathi na mbere gûkaria mîîrîga ya Nyomba ya Mwathani. 24 Nteere irî inya wa kîra mwîrîga n'warî na akaria, na i ta kuuga, mbarî ya umîîro bwa riûa, ûthwîro bwa riûa, n'egûrû na naiti, i kwarî na mwîrîga ûra warî na akaria. 25 Ateetheeria baao, bara batûûraga ntûûraani ome ya taûni baayaga taûni nyuma ya ntugû mûgwanja bagakarîa mîîrîga. 26 N'ûntû akaria bara banene bana, bara baarî Arawi, baarî na ngûgî ya kûrûngamîîra tûnyomba na kîgîîna kîa Nyomba ya Ngai. 27 Bo baaraaraga akubî na Nyomba ya Ngai, n'ûntû yarî ngûgî yao gûkaria na kûrugûra mîîrîga yayo wa îra ntugû kûrakea.
Arawi bangî
28 Bamwe ba Arawi baarûngamîrîîte into bira biatûmagîrwa kagiita ka maromba. Baabatîîrue kûbitara kagiita kara biarutagwa na kagiita kara biacookagua. 29 Bangî baathuurwa kûrûngamîîra into bia Nyomba ya Ngai, na into bionthe biitheru, na mûtu ûmûtheru, ndibei, maguta ma mîceituuni, macoco na mîtaa. 30 Îndî ngûgî ya kûthuuranîra mîtaa yaarutagwa n'athînjîri ba Ngai.
31 Mûrawi ûmwe eetagwa Matithia, kîîmbere gîa Sarumu, wa mûciî wa Kora, aarûngamagîîra kûrûthwa kwa mîgaate ya twembembû ya igongwana. 32 Nabo antû bara bangî ba mûciî wa Koathi baarî na ngûgî ya kûthuuranîra mîgaate ya kûbangwa mûtûrûtûrû meethaani wa îra Sabatû. 33 Mîciî îra îîngî ya Arawi yaarûngamagîîra ngûgî ya nyîmbo Nyomba ya Ngai. Baatûûraga ndeeni ya mîako ya Nyomba ya Ngai na bataabatîîrue kûruta ngûgî îngî nwa îrîkû n'ûntû baarî ngûgîîni ûtugû na mûthenya.
34 Antû bonthe bara bagweteetwe agu baarî atongoria ba mîîrîga ya Arawi, kûringana na mîciî yao. Bo i bo atongoria bara baatûîre Njerusaremu.
Biûyûûyû na nciarwa cia mûnene Saûrû
35 Njeyeri, aarî mwanjîîria wa taûni ya Ngibeoni. Mwekûrû wake aarî Maaka. 36 Kîîmbere gîake kîarî Abundoni, n'we aathiingatua Suri, Kisi, Mbaari, Neri, Nandabu, 37 Ngendori, Ayo, Sakaria na Mikirothi. 38 Mikirothi aarî îthe wa Simeamu. Nciarwa ciao ciatûûraga Njerusaremu akubî na antû bara bangî ba mîciî yao.
39 Neri aarî îthe wa Kisi, n'we Kisi aarî îthe wa Saûrû. Saûrû aarî na aana bana: Njonathani, Mariki-Sua, Abinandabu, na Esibaari. 40 Njonathani aarî îthe wa Meribu-Mbaari, Meribu-Mbaari aarî îthe wa Mika. 41 Mika aarî na aana bana, nabo i Pithoni, Mereki, Tarea na Aasi. 42 Aasi aarî îthe wa Yara, Yara aagîa na Aremethi, Asimabethi na Simuri. N'we Simuri aarî îthe wa Mosa, 43 Mosa aarî îthe wa Binea, Binea aarî îthe wa Refaya, Refaya aarî îthe wa Eriasa, n'we Eriasa aarî îthe wa Aseri.
44 Aseri aarî na aana bathanthatû na mariîtwa maao i, Asirikamu, Bokeru, Isumairi, Searia, Obandia na Anani.