Nciarwa cia Rubeni
5
1 Rubeni n'we aarî kîîmbere kîa Isiraeri, îndî rîra aakarire na mûka ûmwe wa îthe rûgai rwake ta kîîmbere i rwaneenkeerwe Njosebu mwana wa Isiraeri. Na kwoogu atikîandîkwa arî kîîmbere maandîkooni maao. 2 Wana kinya wegua Njunda n'we aarî na inya kîrî aruagina bonthe na mûnene aumire rûrîîyooni rwake, îgai rîa Kîîmbere rwaneenkeerwe Njosebu.3 Aana ba Rubeni, kîîmbere kîa Isiraeri baarî,
Anoki, Paru, Esironi na Karimi.
4 Nciarwa cia Njoeri ciarî,
Semaya, Gogu, Simei, 5 Mika, Reaya, Mbaari, 6 na Beera. Beera ûra mûnene Tigirathi-Pireseri wa Asîîria aagwatire mûgwate n'we aarî mûtongoria wa antû ba mûciî wa Rubeni.
7 Mama i mariîtwa ma antû ba mûciî wa Rubeni kûringana na mîîrîga yao, wa ta bûra makari maandîkooni ma rûrîîyo rwao:
Njeyeri mûtongoria wao, Sakaria, 8 na Mbera mwana wa Asasi, mwana wa Sema, mwana wa Njoeri. Baatûûraga nthîgûrû îra îrî kuuma Aroeri mwanka Nebo na Mbaari-Meoni. 9 Rûteere rwa uumîîro bwa riûa, baatûûraga mwanka mîthiani ya ng'aarû îra îthiîte mwanka muuro wa Yufîrîti, n'ûntû nyamû ciao cia ndîîthia i ciarî îkûthagayîra Ngiriandi.
10 Îgiita rîa wathani bwa Saûrû, antû ba mwîrîga wa Rubeni baithûkîîre antû ba Agiri na babatuunya nthîgûrû yao îra îrî rûteere rwa uumîîro bwa riûa bwa Ngiriandi.
Nciarwa cia Ngandi
11 Antû ba mûciî wa Ngandi baatûûranîrîîte na antû ba mûciî wa Rubeni gîteere kîa Mbasani. Antû ba Ngandi batûûraga mwanka Sareka.
12 Njoeri n'we aarî mûtongoria, mûniini wake aarî Safamu, Njanai na Safati ba mîîrîga ya Mbasani bathiingatîîra.
13 Antû ba mûciî wao, bara baarî atongoria ba mîîrîga yao baarî Mikaeri, Mesuramu, Seba, Njorai, Njakani, Sia na Eberi. Bonthe baarî mûgwanja.
14 Inu i cio nciarwa cia Abiairi mwana wa Uri, mwana wa Njaroa, mwana wa Ngiriandi, mwana wa Mikaeri, mwana wa Njesisai, mwana wa Njando, mwana wa Mbusi.
15 Aai mwana wa Abundieri, mwana wa Nguni aarî mûtongoria wa mîîrîga yao.
16 Antû ba mwîrîga wa Ngandi baatûûraga nthîgûrû ya Ngiriandi, Mbasani na ntûûra ira ciabathiûrûkîrîîte na gûntû kunthe wa kûrîîthia gwa Saroni mwanka mîankaani yao.
17 Mantû mama maandîkirwe îgiita rîra Njothamu aarî mûnene wa Njunda na Njeroboamu arî mûnene wa Isiraeri.
Njûûrî cia mîîrîga îra yatwîre rûteere rwa uumîîro bwa riûa bwa Njorondani
18 Antû ba mîîrîga ya Rubeni, Ngandi na nucu ya mwîrîga wa Manase baarî antû ngiri mîrongo îna na inya cia magana mûgwanja ma mîrongo îthanthatû. Baarî antû beethuuranîrîîte na i baarutanîîtwe kûrûa, i baarî na inya na bakîûmba gûtûmîra rûûyiû, ngao na ûta. 19 Baithûkîîre antû ba Agiri, Njeturi, Nafisi na Nondabu. 20 Baigire wîrîgîîro bwao kîrî Ngai na bamûromba abateethie, n'we eetîgîîria maromba maao na aaneenkanîra Aagiri na acoore baao njaraani ciao. 21 Baataa nkamîîra ngiri mîrongo îtaano, ng'ondu ngiri magana maîrî ma mîrongo îtaano, mang'ooi ngiri ciîrî na antû barî mwoyo ngiri îgana rîmwe. 22 I baûragire anthû baingî mûno n'ûntû ndûa înu yarî ndûa ya Ngai. Nabo baathi na mbere gûtûûra ndeeni ya nthîgûrû inu, mwanka kagiita kara baagwatirwe mîgwate.
Antû ba Manase ba uumîîro bwa riûa
23 Antû ba Manase ba uumîîro bwa riûa baatûûraga ndeeni ya nthîgûrû ya Mbasani. Naamba yao n'yongeerekire na inya mûno, baanyagaara rûteere rwa n'egûrû mwanka Mbaari-Erimoni, Seniri na kîrîmaani kîa Erimoni. 24 Baba i bo baarî anene ba mîciî ya mwîrîga ûyu: Eferi, Isi, Erieri, Asirieri, Njeremia, Ondabia na Njandieri. Bonthe baarî acikaarî ncamba, antû baarî îgweta mûno na atongoria ndeeni ya mîciî inu.
Mîîrîga ya umîîro bwa riûa yaataîgwa
25 Îndî antû i baaregire kwathîkîra Ngai wa biûyûûyû biao, baarûtha ûthûngîîri na njîra ya kûgonga ngai cia atûûri ba nthîgûrû inu îra Ngai aathiriirie mbere yao. 26 Kwoogu, Ngai wa Isiraeri eengîîra Puri, mûnene wa Asîîria, (ta we Tigirathi-Pireseri) aithûkîra nthîgûrû yao na aataa antû babu ba mwîrîga wa Rubeni, Angandi na nucu ya antû ba mwîrîga wa Manase. Abagwata baatuîka mîgwate naagu Araa, Abori na Ara, rûteere rwa muuro wa Ngosani, naara batûûraga mwanka îmunthî.