Biugo bia mûthia bia rwîmbo rwa Ndaundi
23
1 Bibi i bio biugo bia mûthia bia Ndaundi. Ndaundi mwana wa Njesii auga ata rî, we ûra ûûkîîrîîtue mûno, we ûra mwîtûûrîrua maguta wa Ngai wa Njakubu, na mûtungi wa nyîmbo cia Sabuuri:2 “Kîrundu wa Mwathani n'aaragia gûkûrûkîîra niû,
na kiugo gîake kîrî kanyuani gaakwa.
3 Ngai wa Isiraeri augîîte,
we ûra rwara rwa iiga rîa Isiraeri aambîîrîîte:
‘Muntû akaatha antû na ûmma,
na akaathana agîkuthûkaga Ngai,
4 akari ta werû bwa rûkîîrî riûa rîkiuma,
rûkîîrî rûra rûtarî matu;
akari ta werû bwa riûa rîra mbura yarîîkia kuura,
îra îtûmaga nyaki yuuma nthîgûrû.’
5 Na mma ûgu i bu Ngai akathaarima nciarwa ciakwa,
n'ûntû n'arîîkanîrîte naani kîrîîkanîro gîtakîthira rî kana rî,
kîra kîbanganîîtue na gîakarua bwega mantûûni monthe.
Na mma rîonthe aganteethia
na aampe kîonthe kîra mbîrîgîîrîîte.
6 Îndî antû bara baathûûku bonthe bakari ta mîîgua îra îteetwe,
na mma îtigwatîka na njara.
7 Îndî ûra amîgwataga,
nwa mwanka eegue arî na gîntû kîa îthaga kana mûthîrî wa îtumo,
n'yo îbîîthîrue wa ara oongwa yaigîîtwe îthire cwe.”
Ncamba irî inya cia Ndaundi
(1Karaaya 11:10-41)
8 Mama i mo mariîtwa ma antû bara ncamba bara Ndaundi aarî nabo: Njosebu-Basebethi Mûtakemoni,a ûra aarî mûtongoria wa ncamba ira ithatû, ûra aûkîîrie îtumo rîake aûraga antû magana manaana yîîkia rîmwe akîrûa nabo.
9 Wa baîrî gatî ga ncamba inu ithatû aarî Eriasari mwana wa Ndondo, Mûaoi. N'we baarî na Ndaundi rîra banyûrûntire Afirisiti bara beethîranîîte agu kaingo barûa ndûa, na acikaarî ba Isiraeri i baarî bagûkuthûka. 10 Îndî Ereasarî we atenyeenya aarûgamire ara aarî aatura Afirisiti mwanka njara yake yaûmagara yaremwa i kûrekia rûûyiû. Na Mwathani aatûma ûûmbani bûnene bwonekana ntugû înu; na acikaarî bacooka kîrî we kaingo bathi kûberenca bara bakuîte.
11 Wa bathatû aarî Sama, mwana wa Age Mûarari. Kagiita kamwe, Afirisiti beethîrana naagu Rei, bantû aarî na mûnda waûyûri mûthemba wa ndengû; nabo acikaarî ba Isiraeri baakuthûka Afirisiti babu. 12 Îndî Sama aarûngamire gatîgatî ka mûnda ûyu, na amîrûîrîîra na aûraga Afirisiti, na Mwathani aatûma ûûmbani bûnene bwonekana.
13 Kagiita kamwe îgiita rîa maketha antû bathatû kîrî acikaarî bara mîrongo îthatû bara baarî beega, i beendamire baakinya kîrî Ndaundi naagu îkurunguuni rîa Anduramu, rîra gîkundi gîa acikaarî ba Afirisiti baambîîte marema Kîbondeeni kîa Refaimu. 14 Ndaundi kagiita gaku aarî bantû aake a wîbitho, njûûrî ya Afirisiti n'yo yarî Bethireemu. 15 Ndaundi n'we eerirîria mûno auga, “Ûtakîîgua imbona muntû wa gûnkuundia rûûyî rwa kûnyua kuuma kîthimaani kîa Bethireemu kîra kîrî mwîrîgaani!” 16 Kwoogu ncamba ira ciake ithatû ciauma, ciarugunyîîra gatîgatî ga kambî ya njûûrî ya Afirisiti, baathi na gûtaa rûûyî kîthimaani kîa Bethireemu, akubî na mwîrîga wa taûni, baareetera Ndaundi. Îndî Ndaundi aarega kûrunyua. Bantû anyua arwîtûûra nthî ta kîgongwana kîrî Mwathani. 17 Na auga, “Mwathani aroombebithania na ûntû ta bûbû, ntiûmba kûburûtha mbere ya Ngai wakwa. Ntiinyua rûûyî rûrû, anga ti ta nthakame yao rîra beekîîre ûtûûro bwao ûgwatiini?” Kwoogu ateetîgîîria kûrunyua. Mantû ta mama i mo maarûthirwe i ncamba inu irî ithatû.
18 Abisai, mûruagina wa Njoabu, mwana wa Seruya, n'we warî mûtongoria wa babu mîrongo îthatû. Na nwa we aathûkiirie îtumo rîake aarûa na antû magana mathatû abathiria, na aagîa îgweta mûno wa ta baba ba mbere bathatû. 19 Ûyu n'we wagîîre îgweta nkûrûki ya babu mîrongo îthatû,b na aarî mûtongoria wao, wana kinya ûkeegua ataarî ûmwe wa babu bathatû.
20 N'we Benaya, mwana wa Njeoyanda, kuuma Kabuseeri, aarî mûcikaarî ncamba ûra aarûthire mantû maingî ma kûrigaria. Aûraga ncamba ciîrî kuuma Moabu, na ntugû îmwe kagiita ka mbaraabu, na eendama mûrinyaani na aûragîra cimba ku.c 21 Wana kinya, aûraga Mûmiisiri ûmwe, muntû ûmûthongi mûno, n'we njaraani aakamatîîte îtumo; îndî amwe na ûgu Benaya aathiire kîrî we arî na ncûgûma aabûria îtumo rîa Mûmiisiri ûyu rîrî njaraani, na amûûraga narîo. 22 Mantû mamu i mo Benaya mwana wa Njeoyanda aarûthire, na aagîa îgweta mûno amwe na ncamba ira ithatû. 23 Aagîa îgweta mûno nkûrûki ya babu bangî mîrongo îthatû, îndî ti ta bara ba mbere bathatû. Na Ndaundi amûtuîkithia mûtongoria wa bara bangî baamûkaragia.
24 Asaeri mûruagina wa Njoabu aarî ûmwe wa babu mîrongo îthatû;
na babu bangî baarî: Erianani mwana wa Ndondo wa Bethireemu,
25 Sama Mûarondi,
na Erika kinya we Mûarondi,
26 Eresi Mûpereti,
na Ira mwana wa Ikesi Mûtekoa,
27 Abieseri Mûanathothi, Mebunai Mûusa,
28 na Sarumoni Mûaoi,
Maarai Mûnetofa,
29 Erebu mwana wa Mbaana wa kuuma Netofa,
Itai mwana wa Ribai Mûngibea nthîgûrû ya Benjameni,
30 Benaya wa kuuma Pirathoni,
Indayi wa kuuma iguuruuni bira birî akubî na Gaasi,
31 Abi-Ariboni Mûaribathi,
Asimabethi Mûbaurimu,
32 Eriaba wa kuuma Saariboni,
aana ba Njaseni,
na Aiyamu mwana wa Sarari Mûarari,
34 Erifereti mwana wa Aasibai Mûmaakathi,
Eriamu mwana wa Aithoferi wa kuuma Giro,
35 Esiro Mûkarimeri,
Paarai Mûaribi,
36 Igari mwana wa Nathani wa naagu Soba,
na Bani Mûngandi,
37 Sereki wa kuuma Amoni,
barî na Naarai wa kuuma Beerothi, ûra aarî mûkamati mathaga ma ndûa wa Njoabu mwana wa Seruya,
38 Ira Mûithiri,
Ngarebu kinya we Mûithiri,
39 na Uria Mûiti.
Bonthe baarî mîrongo îthatû na mûgwanja.