Gûtarwa gwa acikaarî
(1Karaaya 21:1-30)
24
1 Kaîrî Mwathani aankana ta mwanki i mûthûûro n'ûntû bwa antû ba Isiraeri, na eengîîra Ndaundi abaretera thîîna, amwîra, “Îthi, ûgatare antû ba Isiraeri na ba Njunda.” 2 Kwoogu mûnene eera Njoabu mûtongoria wa njûûrî ya ndûa, “Îthiini gûntû kuunthe mîîrîgaani ya Isiraeri, kuuma Ndani rûteere rwa îgûrû mwanka Beeriseba rûteere rwa iti, na bûtare acikaarî, kaingo mmenya bûra bagana.” 3 Îndî Njoabu eera mûnene ata rî, “Mwathani Ngai waku aroongeera antû babu maita îgana nkûrûki ya bûra bagana, meetho ma mwathi, mûnene wakwa wa makîonaga; îndî i mbi n'ûntû mwathi, mûnene wakwa akwenda kûrûtha ûntû bûbû?” 4 Îndî kiugo kîa mûnene i kîarî na ûrito nkûrûki ya kîa Njoabu. Kwoogu bauma agu mûnene aarî baathi gûtara acikaarî ba Isiraeri. 5 Baathiire baaringa Njorondani, na bambîîria kambî ciao bwa iti akubî na taûni ya Aroeri kîguruuni, kuuma agu baathi bwa îgûrû gûkûrûkîîra Ngandi mwanka Njaseri. 6 Kuuma agu baakinya Ngiriandi, na Kandesi nthîgûrû ya Aiti; bacooka bathiûrûûka bakinya Ndani, na kuuma Ndani baathi mwanka bathiûrûûka baakinya Sindoni; 7 na baakinya Turo îra mbirige na rûthingo taûniini cionthe cia Aibi na cia Akanaani, bacooka bauma agu bakinya Beeriseba bwa iti ya Njunda. 8 Nabo bakûrîîkia kûriûnga nthîgûrû înu yonthe, baacooka Njerusaremu nyuma ya mîeri kenda na ntugû mîrongo îîrî. 9 Njoabu aanenkera mûnene îthaabu rîa antû bonthe bakûrîîkia gûtarwa. Isiraeri kwarî na acikaarî ngiri magana manaana ba kûrûa na mpiû, na ba Njunda nabo baarî ngiri magana mataano.10 Nyuma ya acikaarî bonthe bagûtarwa, Ndaundi n'atangîkire mûno nkorooni yake. Na eera Mwathani, “I mbîyîîtie bûûnene gûkûrûkîîra ûntû bûbû ndûthîîte! Îndî ingûkûromba ûndekere niû mûruti ngûgî waku, n'ûntû i ndûthîîte ûntû bwa waa mûno.”
11 Na mbere Ndaundi aûkîîra rûkîîrî, kiugo kîa Mwathani i kîarî gîgûkinyîra kîroria Ngandi, ûra aaroragîria Ndaundi, gîkiugaga, 12 “Îthi wîre Ndaundi ata rî, ‘Mwathani ariuga ûûgû: Ndîkwaa mantû mathatû na ûthuure bûmwe bwa mo na ngakûrûthîra bu.’ ” 13 Kwoogu Ngandi aathi kîrî Ndaundi amwîra bûra Mwathani aamwîrîîte. Amûûria, “N'ûkwenda mîanka înu mûgwanja kwîgue kûrî na yûûra nthîgûrû yaku? Kana ûrîenda ûthirie mîeri îthatû wa wîngatagua n'anthû baaku bakuumîîte nyuma? Kana ûthirie mîthenya îthatû kûrî na ndwari nthîgûrû yaku? Îîndî thûgaania, na ûtue ûmbîîre bûra ngaacookeria ûra aantûmire.” 14 Rîru Ndaundi eera Ngandi ata rî, “Inthûûngîîre thîînaani înene, îndî ka Mwathani wengwa wîgue n'we agaatûkaanûkia, n'ûntû kîao gîake i kîînene. Bunka ntikaagwe njaraani cia muntû.” 15 Kwoogu Mwathani aatûma kwîgua kûrî na kînyamaara kîa ndwari Isiraeri kunthe kuuma rûkîîrî rûru mwanka kagiita kara aathuurîîte, na agu baakua antû kuuma Ndani mwanka Beeriseba ngiri mîrongo mûgwanja. 16 Na mûraîka agûtaambûrûkia njara yake amîerekeretie Njerusaremu athiria antû baayo. Mwathani n'aagarûrire mathûgaania maake n'ûntû bwa ûthûûku bûbu, na eera mûraîka ûyu aabangaga wînyangia bwa antû ata rî, “Bûbu i bûûganu, cookia njara yaku.” Na mûraîka ûyu aarî akubî na rwara rwa kûbûûrîra rwa Arauna Mûnjebusi. 17 Ndaundi akwona mûraîka ûra aûragaga antû eerire Mwathani ûûgû, “I niû mbîyîîtie, na ndarûtha bûthûûku, îndî antû baba bo bara bakari ta ng'ondu ciakwa rî, n'ata barûthîîte? Itû ndakwereka, nkaanûkia ndî niû na antû ba mûciî wa baaba.”
Ndaundi aaka kîthînjîro
18 Ngandi aaya kîrî Ndaundi ntugû înu, na amwîra, “Îtia ûthi ûgaakîre Mwathani kîthînjîro rwaraani rwa kûbûûrîra rwa Arauna ûra Mûnjebusi.” 19 Kwoogu Ndaundi eetia na aarûtha bûra Ngandi aamwîrire arûthe kûringana na bûra Mwathani aamwathîîte. 20 Na Arauna akûraitha oona mûnene na atongoria baake bayîîte kîrî we, aumire aathi, na aaturîria mûnene maru eendamîîria ûthiû mwanka nthî mûthetuuni. 21 Arauna amûûria, “Mûnene, mwathi wakwa, n'ata waya kîrî niû mûruti ngûgî waku?” Ndaundi amwîra, “Ndaaya gûkûgûrîra rwara rûra rwaku rwa kûbûûrîra. Ndîenda kûrûtha ûgu mbakîra Mwathani kîthînjîro. Rîru mûrimo ûyû mûthûûku ûûgû ûtige kûthiria antû baakwa.” 22 Rîru Arauna eera Ndaundi ata rî, “Reka mûnene mwathi wakwa athûkie na arute kîonthe kîra akwona kîagîrîîte. Ndeegwa i ciino cia kûruta kîgongwana gîa kûbîîthia, mîbûûro ya kûbûûra na macoki ma ng'ombe n'ûntû bwa nkû. 23 I ngûkwa into bibi bionthe, mûnene. Na ndeenda Mwathani Ngai waku eetîgîîria kîgongwana gîku gîaku.” 24 Îndî mûnene n'we eera Arauna, “Arî, îndî into bibi ingakûgûrîra bio na ûgûri bûra bibatîîrue bigûrwa nabu, ntiûmba kûrutîra Ngai wakwa igongwana bia kûbîîthua na into bia ûtheri.” Kwoogu Ndaundi aagûra rwara rûru rwa kûbûûrîra amwe na ndegwa inu na sekeri mîrongo îtaano cia fetha. 25 Rîru Ndaundi aakîra Mwathani kîthînjîro, na aaruta igongwana bia kûbîîthua amwe na igongwana bia ûkiri. Kwoogu Mwathani eegua maromba maake n'ûntû bwa nthîgûrû înu, na mûrimo watiga kûthiria antû ba Isiraeri.