Rwîmbo rwa Ndaundi rwa ûcindi
(Sabu 18)
22
1 Ndaundi n'aarîîrie Mwathani na biugo bia rwîmbo rûrû kagiita kara Mwathani aamûtunyûkiirie kuuma njaraani cia Saûrû na anthû bara bangî bonthe. 2 Ainire auga,“Mwathani n'we Rwara rwakwa rwa iiga, na n'we wîbitho bwakwa, na mwonokia wakwa,
3 Ngai wakwa, Rwara rwakwa rwa iiga, i kîrî we ndîîbithaga,
n'we rong'o yakwa na inya ya wonokio bwakwa,
kîbayo gîakwa kîîraaya na n'we wîbitho bwakwa,
mwonokia wakwa, i woû ûmbonokagia kuuma kîrî bara barî ûgîti.
4 Ndîkayîra Mwathani, we ûra abatîîrue akumagua,
na ntuunyûkue kuuma kîrî anthû baakwa.
5 Gîkuû gîancîgîîrîîtie ta makûmbî ma rûûyî,
mîkumbîîrî ya wînyangia yambûyîîra.
6 Mîîndo ya nthiko n'yandigicîîrîîtie,
mîtego ya gîkuû n'yandîkîîrie.
7 Kîebaani gîakwa i ndaakayîîre Mwathani,
i Ngai wakwa ndaakayîîre,
na eegua kayû gaakwa arî nyomba yake,
na kîrîro gîakwa kîathûngîra matûûni maake.
8 Rîru nthî yainaina na yathetema,
mûngûûra wa îgûrû wainaina
na wathetema, n'ûntû n'aathûûri.
9 Ntoogo yeetia kuuma nyiûrû ciake,
na mwanki wauma kanyuani gaake,
makara ma mwanki mauma kanyuani gaake.
10 Oonjeeria matu, eendama nthî,
ruungu rwa mbayo ciake kwagîa matu maayirû.
11 Aabuurûûkua arî mûgongooni wa kerubi,
na oonekana arî mathabuuni ma ruuo.
12 Eeguîkîîte mwindu ta bûra muntû eeguîkaga nguo
Matu maayirû ma mbura ma îgûrû.
13 Kuuma kîrî werû bûûnene bûra bwarî mbere yake,
makara ma mwanki maakana.
14 Mwathani aathandîka kuuma îgûrû,
na Ûra arî îgûrû mûno augîîria na kayû gaake.
15 Aagera mîgwî yake na aanyagaaria anthû baake,
rweni rwake rwenia, anthû baake barigicana.
16 Rîru nkona ya îria yaumîîrua,
mîcingi ya nthîgûrû yatigwa bûûrîîni,
rîra Mwathani aagondoka,
mîruke îrî na inya yauma nyiûrûûni ciake.
17 Aatambûrûkiirie njara arî îgûrû, aangwata,
na aanduûra kuuma rûûyîîni rûûriku.
18 N'aantûnyûkiirie kuuma kîrî mûnthû wakwa warî na inya,
kuuma kîrî bara baameneete,
n'ûntû baarî na inya nkûrûki yakwa.
19 Baambithûkîîre ntugû îra ndaarî na thîîna,
îndî Mwathani aambigîka.
20 N'antethiirie aanduta thîînaani,
aantunyûkiirie, n'ûntû n'akenaga i niû.
21 Mwathani aampeere kîewa kûringana na wagîru bwakwa,
aantharimire kûringana na ûtheru bwa njara ciakwa.
22 N'ûntû i ndaathîkîîre watho bwa Mwathani,
na ntaarûtha ûthûûku ntiganîria Ngai wakwa.
23 I ndaamenyeere mawatho maake,
ntauna maathana maake.
24 N'aiyî ntaarî na mabîtia,
na i ndaareganire na kûrûtha mabîtia.
25 Kwoogu Mwathani aampeere kîewa kûringana na wagîru bwakwa,
n'ûntû n'onete gwîtîgîka gwakwa.
26 Mwathani, woû ûrî mwîtîgua kîrî bara eetîgua kîrî woû,
na ûrî ûmwega cwe kîrî bara baagîru.
27 Woû ûrî ûmwagîru kîrî bara batheru nkoro,
îndî kîrî bara batarî eetîgua wou nwonanagia ûrî ûmûûgî.
28 N'wonokagia bara babooreeru nkoro,
îndî bara beekumagia n'ûbanyiiagia.
29 Îî, woû i woû taa yakwa, îî Mwathani,
Mwathani n'we akaamûrîkîra rîra ndî mwinduuni.
30 N'ûmpeyaga inya ya gûcinda anthû baakwa,
na n'ûntû bwa ûteethio bwa Ngai wakwa inthûngûthaga rûthiingo.
31 Ngai ûyû njîra ciake n'imbagîru,
wîrane bwa Mwathani i bwonanîîtie n'ûmma,
n'we rong'o ya bonthe bara bacûaga wîbitho kîrî we.
32 I ka tûrî na Ngai ûngî, tatiga Mwathani?
Na n'ûû rwara rwa iiga, tatiga Ngai wetû?
33 Ngai ûyû i wîbitho bwakwa bwa inya,
na n'atûmîîte njîra yakwa yîîgua îtarî na mabîtia.
34 Aatûmire magûrû maakwa makara ta ma nthwariga,
na aandûngamia bantû aûkîîru.
35 N'arutanaga njara ciakwa kûrûa,
kaingo njara ciakwa ikuuyia ûta bwa rûthuku.
36 Mwathani, i woû ûmpete rong'o yaku ya ûûmbani,
na ûteethio bwaku i bu bûntuîkithîîtie ûmûnene.
37 N'waramagia njîra ciakwa,
kaingo magûrû maakwa matabaratia ngwa nthî.
38 Ndaathingatanire na anthû baakwa ndabathiria,
na ntaacooka nyuma mwanka rîra baathirire cwe.
39 Ndaabathiriirie, ndabamunta na rûûyiû ndababuura, bûra batoota kûrûngama kaîrî,
baagwîre ruungu rwa magûrû maakwa.
40 N'ûmpeete inya ya kûrûa ndûa,
n'watûmire anthû baakwa baturia maru mbere yakwa.
41 N'watûmire anthû baakwa baamberekeria mûgongo,
bo bara baameneete, na ndabathiria.
42 Baacûire ûteethio, îndî batoona wa kûboonokia,
i baarîrîîre Mwathani îndî ataabacookeria.
43 Ndaabakinyangire bainya baakara ta tuukû,
ndabathoontoria ta ntaga njîraani.
44 Na n'ûûnkûrîîte ndauma kwithûkîrwaani gwa antû baakwa,
n'ûmbaigîîte ndî mûnene wa mîgongo,
mîgongo ntaiyî îkaambathîkîra.
45 Antû ageni bakeenyiia mbere yakwa,
warîo beegua nkîaria, bakaambathîkîra.
46 Ageni babu baatemûka nkoro,
na baumbûka bauma ara beebithîîte baaya bakiinainaga n'ûguaya.
47 Mwathani atûûraga mwoyo, na aroothaarimwa, Rwara rwakwa rwa iiga,
na Ngai arooneneua, rwara rwa wonokio bwakwa.
48 Ngai woora ûndîagîria,
agaatûma mîgongo yînyiia ruungu rwakwa na mîatha,
49 ûra aandutire kîrî anthû baakwa.
Î woû wantuîkithiirie ûmûnene nkûrûki ya bara baambithûkagîra,
i woû wantunyûkiirie kuuma kîrî bara baarî na bitina.
50 N'ûntû bwoogu ngagûcookeria nkaatho, Mwathani, ndî gatîgatî ka mîgongo,
na nkaina nyîmbo cia gûgûkaatha.
51 Eeyaga mûnene wake ûcindani bûûnene maita maingî,
na akoonania wendo bûra bûtathiraga kîrî mwîtûûrîrua maguta wake,
kîrî Ndaundi, na nciarwa ciake tene na tene.”