Angibioni baarîia
21
1 Îgiita rîra Ndaundi aarî mûnene, i kwagîîre yûûra bantû a mîanka îthatû îthingateene, na Ndaundi aaromba Mwathani n'ûntû bwa mantû mamu. Mwathani amwîra, “Mantû mamu moonekeete n'ûntû Saûrû na antû baake i baarî na mabîtia ma kûûraga antû bamwe ba Ngibeoni.” 2 Kwoogu mûnene eeta Angibioni aaria nabo. (Angibeoni babu bataarî ba antû ba Isiraeri, îndî baarî Aamori bara baatigarire, kinya ûkeegua antû ba Isiraeri i baarî bakûthiîtia bauga batibaûria kaîrî, Saûrû n'aagereetie kûbaûraga n'ûntû bwa wîru bûra aarî nabu bwa kwenda gûteethia antû ba Isiraeri na ba Njunda.) 3 Ndaundi aûria Angibeoni ata rî, “N'ata bûkwenda mbûrûthîra? I bûrîkû nkaabûrûthîra bûra bûgaatûgwatithania tûthiria mantû mamu, kaingo naabi bûthaarima antû ba Mwathani?” 4 Nabo Angibeoni bamwîra, “Ti mantû ma fetha kana thaabu marî gatîgatî geetû na Saûrû kana antû baake bara baûmba kûmathiria. Na tiû tûtikwenda kûûraga muntû kinya ûrîkû ndeeni ya Isiraeri.” Ndaundi abaûria, “N'ata bûkuuga mbûrûthîra?” 5 Nabo beera mûnene, “I Saûrû nwe aatûmire tûûragwa akubî twinthe na aarûtha mîbango ya gûtûma tûthirua, kaingo tûteegua tûkîonekana nthîgûrû yonthe ya Isiraeri. 6 Kwoogu i tûnenkerwe nthaka mûgwanja cia rûrîîyo rwake, naati tûciûrage na tûcicuurie mûtîîni îgûrû mbere ya Mwathani naagu Ngibeaa kîrîmaani kîa Mwathani.” Mûnene auga, “Nkabûnenkera bo.”7 Îndî mûnene ateenda kweyana Mefibosethi, mwana wa Njonathani, mwana wa Saûrû, n'ûntû bwa mûthiîtio ûra Ndaundi na Njonathani baathiîtanîîrie mbere ya Mwathani. 8 Mûnene aathûkia aana baîrî ba Risipa mwarî wa Aya, bara aaciarîîre Saûrû, tabo Arimoni na Mefibosethi, na aana bataano ba Merabu mwarî wa Saûrû bara aaciarîrîîte Andirieri mwana wa Barisirai, Mûmeora, 9 na Ndaundi abanenkanîra njaraani cia Angibioni. Nabo babaûraga na babacuuria kîrîmaani îgûrû mbere ya Mwathani, barî mûgwanja woogu baakuuyanîria amwe. Baûragirwe ntugûûni cia mbere cia maketha, mwanjîîrioni wa maketha ma sayiri.
10 Rîru Risipa aathûkia kîthango gîa nkunia agîtambûrûkia îgûrû ya rwara rwa iiga kîrî mûgunye, kuuma mwanjîîrioni wa maketha mwanka rîra mbura yabaurîîre kuuma îgûrû, na ataareka nyoni igûîrîîra biimba bibu mûthenya, kana areka nyamû cia kîthaka ibiringithia ûtugû. 11 Ndaundi akwîrwa bûra Risipa mûka wa kwaiga wa Saûrû, aarûthîîte, 12 Ndaundi aumire agu aathûkia maîndî ma Saûrû na ma mwana wake Njonathani kuuma kîrî antû ba Njabesi-Ngiriandi, bo bara baathûkîîtie na witho maîndî mamu bamaruta kîaragooni kîa Bethi-Sani, ara Afirisiti baabacuurîîtie, ntugû îra baatûmire Saûrû akuîra kîrîmaani kîa Ngiriboa. 13 Nyuma ya Ndaundi akûreeta maîndî ma Saûrû na ma mwana wake Njonathani, kuuma noogo, antû bamwe beethîrania amwe maîndî ma antû bara baacuuriirue. 14 Baathikanîîrie maîndî mamu maao amwe na ma Saûrû na ma mwana wake Njonathani nthikooni ya Kisi îthe wa Saûrû naagu Sera, nthîgûrû ya Benjameni. Na baarûtha bunthe bûra mûnene aabaathîîte barûthe. Nyuma yoogu Ngai acookia maromba maao îgûrû rîa nthîgûrû yao.
Ndûa na Afirisiti
(1Karaaya 20:4-8)
15 Kaîrî Afirisiti bacooka kûrûa na Isiraeri, Ndaundi eendama noogo na acikaarî baake, baarûa na Afirisiti. Na Ndaundi aanoga mûno.
16 Ncamba îmwe ya rûrîîyo rwa Rafa yeetagwa Isibi-Benobu, yaakamatîîte îtumo rîa rûthuku rîa ûrito ta bwa sekeri magana mathatû, acinîkîîte rûûyiû rwaimbia kauna. Aathûgaania kûûraga Ndaundi. 17 Îndî Abisai mwana wa Seruya aaya gûteethia Ndaundi. Aaringa Mûfirisiti ûyu na amûûraga. Rîru antû ba Ndaundi bamûthiîtîria bamwîra, “Tûtiithi naawe ndûani kaîrî. N'ûntû woû i ta taa ya Isiraeri na tûtikwenda kworia taa înu.”
18 Nyuma yoogu kwegua kûrî na ndûa îîngî na Afirisiti naagu Ngobu, rîru Sibekai wa kuuma Usa aûraga Sabu, ûra ûmwe wa rûrîîyo rwa Rafa. 19 Na kaîrî kwegua kûrî na ndûa na Afirisiti waagu Ngobu, na Erianani mwana wa Njaare, Mûbethireemu, aûraga Ngoriathi ûra aarî Mûngathi, ûra mûthîrî wa îtumo rîake wakari ta mûtî wa mûtumi wa nguo. 20 Na kaîrî kwegua kûrî na ndûa îîngî Ngathi, bantû kwarî na muntû ûmûraaya mûno, warî na biara bithanthatû bia wa kîra njara na biara bithanthatû wa kîra kûgûrû, bionthe biara mîrongo îîrî na binna. Na kinya we aarî wa rûrîîyo rwa antû baanene mûno. 21 Na akûbûthîîria antû ba Isiraeri, Njonathani mwana wa Simei amûûraga. Simei aarî mûruagina wa Ndaundi. 22 Babu baarî nciarwa cia antû baanene mûno naagu Ngathi, nabo baûragirwe i Ndaundi amwe na aruti ngûgî baake.