Seba aûmîria Ndaundi kîongo
20
1 Gwakarîkire ûgu, agu Girigari i kwarî na muntû ûmwe aarî wa ûgîti, eetagwa Seba, mwana wa Bikiri, Mûbenjameni. Aaringire rûgoci, auga,“Tiû gûtirî gîcuncî tûrî nakîo ndeeni ya Ndaundi
na twîgua tûrî na rûgai rwa mwana wa Njesii,
wa muntû n'acooke mûciî wake, biû Aisiraeri!”
2 Kwoogu antû ba Isiraeri bonthe baatiganîria Ndaundi, baathingata Seba mwana wa Bikiri, îndî antû ba Njunda baakara na mûnene na bamûthingata kuuma Njorondani mwanka Njerusaremu.
3 Rîru Ndaundi aacooka nyomba yake ya ûnene Njerusaremu, na aathûkia aka baake îkûmi bara baarî ba kwaiga bara aatigîîte bamenyeera nyomba ya mûnene, na abatiga nyomba yîîngî barî baakarie, na abanenkera irio na into biingî bia kûgana, îndî ataamaama nabo. Kwoogu baingîîrwe mwanka ntugû ya gûkua, baakara ta aka ba ntigwa.
4 Rîru mûnene eera Amasa, “Îthîrania acikaarî ba Njunda amwe mbere ya ntugû îthatû ithira, na woû wengwa wîgue ûrî aaga.” 5 Kwoogu Amasa aathi gwîta acikaarî ba Njunda, îndî n'aakarire nkûrûki ya kagiita kara eerîîtwe i mûnene. 6 Na Ndaundi eera Abisai ûûgû, “Îîndî Seba mwana wa Bikiri agatûthûûkia nkûrûki ya Abusaromu, thûkia acikaarî baakwa bara beega nkûrûki ûmûthingate na mpwî, kaingo atathûngîra taûni îmwe ya ira mbirige aûra.” 7 Na antû bara baarî na Njoabu baumagarûka bamûthingata barî na Akerethi na Aperethi, amwe na ncamba cia ndûa cionthe. Nabo baumire Njerusaremu kaingo bathingata Seba. 8 Bagûkinya rwaraani rûûnene rwa iiga rûra rwarî Ngibeoni, Amasa n'aayire kûbathagaana. N'we Njoabu eekîrîîte nguo cia ûcikaarî, na eeboga mûcibi kauna na eecinîka rûûyiû kauna rûrî njûraani. Athiîte naara arî woogu, rûûyiû rûru rwacinûka rwagwa nthî. 9 Na Njoabu aûria Amasa ata rî, “Ûrî ûmwega, mûruayia?” Nwe Njoabu aagwata Amasa kîreru na njara yake ya ûrîo kaingo amûcunca. 10 Îndî Amasa atoona kîmindo kîra Njoabu aagwete na njara ya kîmotho, kwoogu Njoabu amûmunta nakîo nda, mainto ma nda meetîga nthî. Ataamûmunta rîa maîrî, n'ûntû Amasa n'aarî agûkua. Rîru Njoabu na mûruagina Abisai baathi na mbere na kwîngana na Seba mwana wa Bikiri. 11 Na muntû ûmwe wa antû ba Njoabu aarûngama akubî na Amasa, auga, “Ûra wonthe arî rûteere rwa Njoabu na Ndaundi n'athingate Njoabu.” 12 Na Amasa aamaami nthakameeni yake barabaraani gatîgatî. Rîra muntû ûyu oonire atî antû bonthe bara baakûrûkagîîra njîraani înu, boona Amasa ibaarûngamaga, aakamata mwîrî ûyu wa Amasa aurutaruta njîraani înu acuira kîthakaani, na auguîka na nguo. 13 Akûrutwa njîraani, antû bonthe baathiire bathingatanîîte na Njoabu kaingo beengana na Seba.
14 Na Seba aakûrûkîîre kîrî mîîrîga yonthe ya Isiraeri gûkinya mwanka Abeeri ya Bethi-Maaka, na kwa Abikiri, bonthe beethîrana amwe, na bamûthiingata. 15 Na antû bonthe bara baarî na Njoabu baaya bamûcereera naagu Abeeri-Bethi-Maaka, na baûmba kîthûmba kîa mûthetu rûthingooni rwa taûni înu, na bagîtemangaga rûthingo bakîenda kûruomora. 16 Rîru mwekûrû ûmwe ûmûûme eetana na inya kuuma taûniini înu akiugaga, “Tathikîîriani bwîgue! Thikîîriani! Îraani Njoabu aaye akubî mbarie n'we.” 17 N'we Njoabu aathiiyanga aakubî na mwekûrû ûyu, mwekûrû ûyu amûûria, “I woû wîtagwa Njoabu?” Njoabu amûcookeria amwîra, “I niû.” Rîru mwekûrû ûyu amwîra, “Itû thikîîria biugo biakwa.” Njoabu n'we amûcookeria amwîra, “I nthikîîrîîtie.” 18 Aathi na mbere na kuuga, “Karaaya mûno antû baaragia bakauga, ‘Wenda kwewa kîrîra bwega, îthi taûni îîtagwa Abeeri.’ Na njîra înu bakathiria mantû. 19 Tûrî bamwe ba bara beendeete ûkiri na eetîgua ndeeni ya Isiraeri, woû ûrîcwa kûragaragia taûni îra îkari t'yo gina wa Isiraeri, i mbi îgûtûma wenda kwînyangia rûgai rwa Mwathani?” 20 Njoabu aacookia auga, “Bûtikaaronkinyîra, bûtikaaronkinyîra ûntû ta bûbu, bwa kwenda kwînyangia kana kûthiria! 21 Ûgu t'ûmma atî itûkwenda kwînyangia taûni înu yaku. Îndî kûrî muntû wa kuuma nthîgûrû îra îrî na irîma ya Eburaimu, wîtagwa Seba, n'we aareganire na mûnene Ndaundi. Tûnenkereeni we arî wenka akî, naani mbuume taûniini îno nthi.” Na mwekûrû ûyu eera Njoabu ata rî, “Kîongo gîake igîgûturûkîrua rûthingooni.” 22 Rîru mwekûrû ûyu aathi kîrî antû bonthe na aaria nabo na ûûme bwake. Rîru antû babu nabo baagiita Seba kîongo, na baagerera Njoabu kîo. Nyuma ya ûgu Njoabu aaringa rûgoci, na antû bonthe baanyagaarania kuuma taûni, wa muntû eenûka gwake. Na Njoabu aacooka Njerusaremu kîrî mûnene.
23 Njoabu n'we aarî mûtongoria wa njûûrî ya ndûa yonthe ya Isiraeri, na Benaya mwana wa Njeoyanda aarî mûtongoria wa Akerethi na Aperethi, 24 na Andoramu n'we aarûngamîrîîte ngûgî cia kûrutithua na taka, na Njeosafati mwana wa Airundi n'we aarî mûririkanania. 25 Na Seba aarî mwandîki, Sandoki na Abiathari nabo baarî athînjîri ba Ngai, 26 na Ira Mûnjairi n'we warî mûthînjîri wa Ndaundi.