Njoabu aagondokera Ndaundi
19
1 Njoabu eerwa, “Mûnene n'akûrîra na kwîthikîîra n'ûntû bwa Abusaromu.” 2 Kwoogu gîkeno gîa gûcinda kûra gwacindanîîtwe ntugû înu kwagarûka gwatuîka kîeba kîrî antû bonthe n'ûntû ntugû înu n'yo beegiirue gûkîîrwa, “Mûnene arî na kîeba mûno n'ûntû bwa mwana wake.” 3 Na ntugû înu antû baathiire baciemeereetie baathûngîra taûni înu wa ta bûra antû bagîîte îgi baciemagîîria bakuthûkîîte kuuma ndûani. 4 Mûnene eeguîka ûthiû bwake, na augîîria nainya akiugaga, “Woû Abusaromu mwan'wakwa! Woû Abusaromu, mwan'wakwa, mwan'wakwa!”5 Rîru Njoabu aathûngîra kanyomba kara mûnene aarî, amwîra, “Îmunthî ûgwîkîrithia antû baaku bonthe nthoni, na i bo boonokiirie mwoyo waku, na mîoyo ya aana baaku ba arûme na ba aarî, na mîoyo ya eekûrû baaku ba kûgûra na ba kwaiga, 6 n'ûntû wendeete bara bakûmeneete na wamena bara bakwendeete. N'ûntû îmunthî ûkwonania bwega atî atongoria na acikaarî baaku batirî na gîtûmi kîrî woû. Inkwona nwa wîgue ûkeneete mûno ûkeegua îmunthî Abusaromu arî mwoyo naati twinthe tûrî bakuû. 7 Kwoogu îîndî ûkîîra ûthi ûkaarie na antû baaku rwaria rwa kûbeekîra inya, n'ûntû inkûthiîtia na riîtwa rîa Mwathani atî, wegua ûtiithi, ûtirî muntû nwa ûmwe akeegua arî naawe ûtugû bûbû, na bûbu bûkeegua bûrî nkûrûki ya moothûûku monthe mara marookûûyîîra kuuma waana bwaku mwanka îmunthî tûrî.” 8 Rîru mûnene aûkîîra, na aathi aakara nthî mwîrîgaani wa taûni înu. Rîra antû bonthe beerirwe, “Mûnene n'akari nthîgûrû mwîrîgaani,” baaya kîrî mûnene.
Îgiitaani warîru acikaarî ba Isiraeri bonthe baarî bagûkuthûkîra woora muntû gwake. 9 Na antû bonthe i baathetanagia mîîrîgaani yao yonthe ya Isiraeri, bakiugaga, “Mûnene n'aatûkûûrire kuuma njaraani cia Afirisiti na kuuma njaraani cia anthû beetû bara bangî, îndî îîndî ûûgû nakuthûkîîte auma nthîgûrû îno n'ûntû bwa Abusaromu. 10 Îndî Abusaromu, ûra twetûûrîîrie maguta atûtongoria, n'akuîrîîte ndûani. Kwoogu îîndî i mbi n'ûntû bûkirîîte kii îgûrû rîa gûcookia mûnene?”
11 N'ûntû mantû monthe mara maaragua nthîgûrû ya Isiraeri yonthe i maakinyîîre mûnene Ndaundi naara aakaraga, aatûmana ntûmwa kîrî Sandoki na Abiathari athînjîri ba Ngai, baathi kwîrwa ûûgû, “Ariani na akûrû ba Njunda bûbaûrie, ‘I mbi n'ûntû bûreethîîrwe bûrî antû ba mûthia gûcookia mûnene mûciî wake? 12 Biû bûrî aruayia, bûrî nthakame yakwa. Aabu i mbi n'ûntû bûrî ba mûthia gûcookia mûnene?’ 13 Na ûûrie Amasa ata rî, ‘Anga ûtirî nthakame yakwa? Ngai aroompa îkaanûkia, wegua ûtiîgua ûrî mûtongoria wa njûûrî ciakwa cia ndûa bantû a Njoabu kuuma îîndî ûgu kûthi mbere.’ ” 14 Na mûnene aakuuyia nkoro cia antû ba Njunda bonthe baakara ta muntû ûmwe, na baatûmana kîrî mûnene bamwîra, “Cooka, woû na antû baaku bonthe.” 15 Kwoogu mûnene aacooka aathi mwanka Njorondani. Na antû ba Njunda baaya Girigari baakomana n'we na bamuumagaria ariinga Njorondani.
16 Na Simei mwana wa Gera, Mûbenjameni wa kuuma Baurimu, aarûtha bûrî mpwî eendama na antû ba Njunda baakomana na mûnene Ndaundi. 17 Aarî na antû ngiri îmwe ba kuuma mwîrîgaani wa Benjameni, na Siba mûruti ngûgî wa mûciî wa Saûrû, na aana babu baake îkûmi na bataano na aruti ngûgî baake mîrongo îîrî, beendama Njorondani na rwîro mûnene akîonaga, 18 na baaringîra îriûkooni kaingo bariingia antû ba mûciî wa mûnene, na kûrûtha mara mûnene eendaga.
Simei mwana wa Gera akûringa Njorondani, eegwîthia nthî mbere ya mûnene. 19 Eera mûnene, “Mwathi wakwa, ûtigantarîre ûthûûku, kana ûririkana bûra niû mûruti ngûgî waku ndaabîtiirie ntugû îra mûnene, mwathi wakwa waumîîte Njerusaremu, na mûnene ûtikaige mantû mamu nkorooni yaku. 20 N'ûntû niû imbiyî i mbîyîîtie, na n'ûntû bwoogu îîndî raitha wone, i niû ndaamba kûûya îmunthî mbere ya antû bara bangî bonthe ba mîîrîga ya neegûrû ya Isiraeri,a ndaaya gûkûthagaana woû mûnene mwathi wakwa.” 21 Abisai mwana wa Seruya akîmûcookeria amûûria, “Îîndî rî, Simei tika akaûragwa n'ûntû bwa mantû mama, n'ûntû nwarumire mwîtûûrîrua maguta wa Mwathani?” 22 Ndaundi aûria, “Tûriumania kû naabi, biû aana ba Seruya, mwanka bwatuîka anthû baakwa ntugû îno ya îmunthî? Anga kûrî muntû nwa ûmwe ûûmba kûûragwa ndeeni ya Isiraeri îmunthî? N'ûntû rî, i ka ntaiyî îmunthî i niû mûnene wa Isiraeri?” 23 Na mûnene eera Simei, “Ingûkûthiîtîria îmunthî atî ûtiikua.”
24 Kinya Mefibosethi mwana wa mwana wa Saûrû eendama aathi gûkomana na mûnene. Ataathambîîte magûrû, ateenjeete kîreru kana athaambia nguo ciake, kuuma ntugû îra mûnene Ndaundi aumire agu Njerusaremu aathi mwanka rîra aacookire kaîrî arî mayîîga. 25 Mefibosethi agûkinya kuuma Njerusaremu aakomana na mûnene, mûnene amûûria, “Mefibosethi, i mbi yagiriirie tûthi naawe?” 26 N'we aacookia auga, “Mûnene mwathi wakwa, n'ûntû niû inthuaga, ndaugire, ‘Ngaatandîkîrwa îng'ooi rîakwa, rîînkamate kaingo nthiiyania na mûnene.’ Îndî mûruti ngûgî wakwa Siba aankunyanîra, 27 na aanguuta kîrî woû, niû mûruti ngûgî waku, mûnene mwathi wakwa. Îndî woû mûnene mwathi wakwa ûkari ta Mûraîka wa Ngai. Kwoogu rûtha bûra ûkwona kûbatîîrue. 28 N'ûntû antû bonthe ba mûciî wa cûûcû baabatîîrue baûragwa i woû mûnene mwathi wakwa. Îndî kinya ûkeegua i gwakari ûgu rî, woû nwantuîkithiirie mûruti ngûgî waku wa kûrîyanagîra na bara barîyagîra meethaani yaku. N'ûntû nwarûthire ûgu rî, i mbi îngî mbatîîrue gûcooka kûûria kuuma kîrî woû kaîrî mûnene?” 29 Mûnene auga, “I mbi n'ûntû ûthiîte na mbere kwaria ntheto cia mantû maaku wengwa? Ndauga: Woû na Siba bwatûrane kîthaka gîku.” 30 Na Mefibosethi n'we eera mûnene, “Wana kinya akathûkia kîonthe t'ûntû, n'ûntû woû mûnene mwathi wakwa ûgûcooka mûciî waku mayîîga.”
31 Îîndî Barisirai Mûngiriandi nwe naarî akwîndama aumîîte Rogerimu, baringa Njorondani na mûnene kaingo amuumagaria batiganîra nwe oogo. 32 Barisirai aarî mûkûrû ûmûkûrû mûno, wa mîanka mîrongo înaana, na n'we eeyaga mûnene irio îgiita rîra aakarire Maanaimu, n'ûntû naarî ûmûtongu mûno. 33 Na mûnene eera Barisirai, “Ncû tûriinge muuro tûrî amwe, na ngakweyaga irio biakûrîa îgiita rîra ûkeegua tûrî naawe Njerusaremu.” 34 Îndî Barisirai aûria mûnene, “Woû mûnene rî, i ka ntigeerie mîanka îgana ndî mwoyo, kaingo nthiiyania naawe Njerusaremu? 35 Agu ndî îmunthî ndî na mîanka mîrongo înaana, na gûtirî kîo mbûmba gûkeneera bûra ndaakenagîîra mbere. Ntiûmba kwathûrana mûcamo wa gîntû kîra nkûrîa kana kîra nkûnyua kana mbathûrana mwinîre wa antû arûme kana wa aka. Na i mbi îgûtûma ntuîka mûrigo kîrî woû mûnene mwathi wakwa. 36 Nkaaringa Njorondani na nthiiyanie na mûnene bantû aakai, îîndî i mbi îgaatûma mûnene ampa kîewa ta gîkî? 37 Ngûkwereka, ndekeeria ncooke, ngakuîre taûni yetû, akubî na nthiko ya baaba na maama. Îndî mûruti ngûgî waku Kîmuamu n'we ûyû, n'aringe rûûyî amwe naawe woû mûnene mwathi wakwa, ûkamûrûthîre bûra ûkwona bwagîrîîte.” 38 Mûnene amûcookeria amwîra, “Tûkaathi na Kîmuamu, na nkamûrûthîra bûra woû ûkwona bwagîrîîte, na bunthe bûra woû ûkeenda nkûrûthîra ngakûrûthîra bu.” 39 Kwoogu antû bonthe baathi baaringa Njorondani, na mûnene n'we aaringa. Na mûnene aacunca Barisirai na amûthaarima. N'we Barisirai eenûka mûciî wake.
40 Mûnene n'aaringire muuro aathi Girigari. Baathiire barî amwe na Kîmuamu, njûûrî yonthe ya Njunda na kinya nucu ya njûûrî ya Isiraeri i baumagariirie mûnene aaringa muuro. 41 Rîru antû ba Isiraeri bonthe baathi kîrî mûnene, na bamûûria, “I mbi n'ûntû aruayia, antû ba Njunda bakuîte, bakûthûkia bakuumagaria woû mûnene, antû ba mûciî waku, na acikaarî baaku bûringa Njorondani?” 42 Antû babu ba Njunda bonthe baacookeria antû ba Isiraeri babeera, “Tûrîmuumagaria n'ûntû mûnene nwa mwîrîga wetû. I mbi îgûtûma bûthûûra i mantû mamu? I ka kûrî kîo kîa mûnene tûrarîa? Kana i ka kûrî kîewa aratwaa?” 43 Antû ba Isiraeri baacookeria antû ba Njunda babeera, “Tiû tûrî na icuncî îkûmi kîrî mûnene. Na Ndaundi n'wetû nkûrûki ya bûra arî wenu. Ûkeegua n'ûgu rî, i mbi bûgûtûbûthîria? Anga ti tiû twarî ba mbere kwaria mantû ma gûcookia mûnene wetû?” Îndî biugo bia antû ba Njunda i biarî na rûng'ento nkûrûki ya bia antû ba Isiraeri.