Abusaromu aûragîrwa ndûani
18
1 Rîru Ndaundi eethîrania acikaarî bara aarî nabo, na aatuîkithia bamwe atongoria ba kûrûngamîîra ikundi bia antû ngiri, na bangî nabo ba kûrûngamîîra ikundi bia antû îgana. 2 Rîru Ndaundi aagaania acikaarî ikundi bithatû. Gîkundi kîmwe gîatongoreerua i Njoabu, kîa biîrî gîatongoreerua n'Abisai mwana wa Seruya, mûruagina wa Njoabu, na kîa bithatû nakîo gîatongoreerua n'Itai ûra aarî Mûngathi. Mûnene abeera, “Namma kinya niû ningwa nkaathiyania naabi.” 3 Îndî antû babu nabo bamwîra, “Ûtikaathi. N'ûntû tûkeengîîrua, batiitindanîra naati. Kinya nucu yetû îgakua batitindanîra naati. Îndî woû ûrî gîtûmi nkûrûki ya tiû antû ngiri îkûmi, kwoogu kaaba ûtigwe naaga ûtûtumîre ûteethio kuuma taûni.” 4 Mûnene abeera, “Bûra bûkoona bwagîrîîte nkûrûki i bu nkaarûtha.” Kwoogu mûnene aarûngama rûteere rwa mwîrîga, acikaarî bonthe nabo baanjîîria kuumagarûka baathi barî ikundi bia magana, magana na magiri, magiri. 5 Mûnene aaruta watho kîrî Njoabu, Abisai na Itai abeera, “N'ûntû bwakwa bûtikainyîîrie nthaka înu Abusaromu.” Na antû bonthe beegua mûnene akîrutîra atongoria babu watho mantûûni ma Abusaromu.6 Rîru njûûrî ya acikaarî ba Ndaundi yauma yaathi ithakaani kûrûa na antû ba Isiraeri, na ndûa înu yaarûîrîîrwe mûthitûûni wa Eburaimu.a 7 Agu noogo njûûrî ya ndûa ya Isiraeri yaaturîîrwe n'acikaarî ba Ndaundi, na antû baingî mûno i baûragirwe ntugû înu, antû ngiri mîrongo îîrî. 8 Ndûa yataamba kîthakaani gîku kîonthe, na acikaarî bara baakuire ntugû înu n'ûntû bwa moogwati ma mûthitû ûyu i bo baarî baingî nkûrûki ya bara baûragirwe n'anthû baao.
9 Na Abusaromu n'arîîkanire na acikaarî bamwe ba Ndaundi ateerîgîîrîîte. Abusaromu aakamatîîtwe i nyûmbû yake, na nyûmbû înu yaabuurîîra ruungu rwa mpong'i cia mûpuru ûmûnene, na kîongo gîake kîagwatwa na gîatîra mpang'aani cia mûtî ûyu. Aatigwa acuncuurîîte ruuoni, na nyûmbû inu yaamûkamatîîte yaatigwa yathi. 10 Na muntû ûmwe akûona ûgu aathi eera Njoabu ata rî, “I mbonire Abusaromu acuncuuri mûpuruuni.” 11 Njoabu n'we aûria muntû ûyu, “Wegua n'ûmwonire rî, i mbi îgiriirie ûmûringîra waagu? Ta ûkeegua n'ûrûthire ûgu ndîîyaga gûkwaa icuncî îkûmi bia fetha na mûcibi.” 12 Îndî muntû ûyu n'we eera Njoabu, “Wana kinya ûkeegua n'ûkûrî ûgûûmpa icuncî ngiri îmwe bia fetha, ntigîtambûrûkia njara yakwa ndinga mwana wa mûnene, n'ûntû mûnene akwîrire bûrî na Abisai na Itai na tiû tûkîîgagua na matû meetû ata rî, ‘N'ûntû bwa nthoni ciakwa mmenyeeraani Abusaromu.’ 13 Na bûngî nabu, ta ûkeegua mbunire watho bwa mûnene ndaûraga Abusaromu, mûnene akîîgua mantû mamu, na woû wengwa ûtigînteethia.” 14 Njoabu auga, “Ntiita thaa naawe kaîrî.” Na aathûkia tûtumo tûthatû na njara atugera aamunta Abusaromu nkoro natu, wa arî mwoyo acuncuurîîte mûpuruuni ûyu. 15 Na akamati ba mathaga ma ndûa ba Njoabu îkûmi, baacîgîîria Abusaromu nteere cionthe bamûringanga aakua.
16 Rîru Njoabu aaringa rûgoci, na njûûrî inu cia ndûa ciacooka ciatiga kwîngana na antû ba Isiraeri, n'ûntû Njoabu n'acirigîîrie. 17 Rîru baathûkia Abusaromu bamûgera îrinyaani rîînene mûno mûthitûûni ûyu, bamûmbîîra kîthûmba kîa maiga kîînene mûno, na Aisiraeri bonthe baakuthûka wa muntû eenûka mûciî wake.
18 Îgiita rîra Abusaromu aarî mwoyo, n'eebakîîre gîtugî kîa iiga bantû eetagwa Kiuro kîa Mûnene, n'ûntû augire, “Niû ntirî na mwana wa muntû mûrûme wa gûtûma riîtwa rîakwa rîririkanagwa.” Eetire gîtugî gîku kîa iiga riîtwa rîake we wengwa, na wana îmunthî tûrî gîîtagwa gîtugî gîa kûririkanwa kwa Abusaromu.
19 Rîru Aimaasi mwana wa Sandoki auga, “Kaambugaangie rwîro nkamenyithie mûnene wetû atî Mwathani n'amûkûûrire kuuma njaraani cia anthû baake.” 20 Njoabu n'we amwîra, “Arî, îmunthî ûtiithi kûmwîra mantû, ûkaathi ntugû îîngî îndî t'îmunthî, n'ûntû mwana wa mûnene n'ûmûkuû.” 21 Na kagiitaani wa gaku Njoabu eera Mûkusi, “Îthi wîre mûnene bûra wona.” Mûkusi ûyu eendamia kîongo gîake mbere ya Njoabu kwonania gîtîîyo, na augia rwîro aathi. 22 Rîru Aimaasi mwana wa Sandoki kaîrî eera Njoabu ata rî, “Kinya gûgakarîka ata, wana niû ndekeeria mbîngane na Mûkusi ûyu.” Na Njoabu amûûria, “I mbi ûkaugîria mwan'wakwa, na n'wiyî bwega gûtirî kîewa ûkoona n'ûntû bwa kwira ntûmwa?” 23 Aimaasi kaîrî acookeria auga, “Kinya gûgakarîka ata nwa nkaugia nthi.” Njoabu n'we amwîra, “Ugia.” Rîru i rîo Aimaasi augiirie athingatîîte njîra ya kiuro kîa Njorondani, na aacinda Mûkusi ûyu rwîro amûkûrûka.
24 Îîndî, wegua Ndaundi aakari gatîgatî ka mwîrîga wa ndeeni na wa nja, na mûraaria wa taûni înu aatwa rûthingooni kûra îgûrû na aarûngama rûûgûrû rwa kanyomba ka mwîrîga, na akûraithîîria oona muntû ayîîte na rwîro arî wenka. 25 Mûraaria ûyu augîîria na inya eera mûnene bûra oona. Mûnene n'we amwîra, “Akaaya kwîgua n'wenka na mma arî na ntheto cia kweyana.” Na muntû ûyu aathi na mbere kûbakuîrîîria. 26 Rîru mûraaria woyu oona muntû ûngî augîîtie, na mûraaria eeta mûkaria wa mwîrîga amwîra, “N'ûûra muntû ûngî aayîîte na rwîro arî wenka!” mûnene auga, “Kinya we nwa mantû aayîîte kweyana.” 27 Mûraaria ûyu auga, “Niû ndîona muugîrie wa ûûra arî mbere ûkari ta wa Aimaasi wa Sandoki.” Na mûnene auga, “Ûyu i muntû ûmwega, na aayaga na mantû meega.” 28 Rîru Aimaasi augîîria mûnene amwîra, “Mantû monthe i meega.” Na eendamia kîongo aatiirithia ûthiû nthî arî agu mbere ya mûnene auga, “Mwathani Ngai waku arookumua. Nanenkanîrîîte antû bara barakûnyamaaragia njaraani ciaku woû mûnene mwathi wakwa.” 29 Na mûnene aûria, “Mûthaka ûra agwîtwa Abusaromu n'ûmwega?” Aimaasi amûcookeria amwîra, “Njoabu agûntûma, niû i mbonire kagwîgwî kaaneene ga kûmakania, îndî ntiramenya bwega bûra gûkarîkire.” 30 Mûnene auga, “Garûka gateere, na ûrûngame aaga.” Kwoogu n'we aathi gateere aarûngama kii. 31 Rîru Mûkusi aaya na auga, “I mantû meega ndakûretera mûnene mwathi wakwa, n'ûntû Mwathani îmunthî agûgûkûûra thîînaani ya bara bonthe baûkîîrîîte barûa naawe.” 32 Mûnene aûria Mûkusi ûyu ata rî, “Abusaromu n'ûmwega?” Mûkusi ûyu amûcookeria amwîra, “Anthû baaku woû mûnene mwathi wakwa, na bara bonthe baûkîîrîîte bakûrûthîra mantû maathûûku, barookara ta bûra mûthaka ûyu akari.” 33 Na mûnene akwîgua mantû mamu aamaka mûno, na aatwa aathûngîra kanyomba kaarî îgûrû agu mwîrîgaani, na aarîra, na athiîte woogu, augaga, “Mwan'wakwa Abusaromu, mwan'wakwa, mwan'wakwa Abusaromu! Kaaba ûkeegua i niû nkuire bantû ûkua, Abusaromu mwan'wakwa, mwan'wakwa!”