2 Samweri 17

1 Na kaîrî Aithoferi eera Abusaromu, “Reka nthuure antû ngiri îkûmi na ciîrî, mbuume nthingate Ndaundi na mpwî mûno ûtugû bûbû. 2 Nkaamwithûkîra warîra anogire na inya yathira, mûmakie, na antû bonthe bara arî nabo bakuthûke. Nkaûraga mûnene wenka akî, 3 na ncookie antû bonthe kîrî woû ta bûra mwiki acookaga mûciî kwa mûrûme wake. Bûra ûbatîîrue ûrûtha i kûûraga muntû ûmwe akî, na antû bara bangî bonthe bagakara barî mayîîga.” 4 Na mûbango ûyu nwakeniirie Abusaromu na akûrû bonthe ba Isiraeri.

5 Rîru Abusaromu auga, “Îtaani Usai Mûariki kinya we aaye, na bûreke twîgue bûra akauga.” 6 Na Usai agûkinya kîrî Abusaromu, Abusaromu amwîra bûra Aithoferi aamûroreetie, rîru amûûria, “Ûrîona ata woû? tûrûthe woogu augîîte? Kana wegua tibu, twîre bûra ûkûthûgaania.” 7 Rîru Usai eera Abusaromu, “Kîrîra gîku Aithoferi eeyana kagiita gaka ti kîega.” 8 Usai aathi na mbere kuuga, “Woû n'wiyî abaagu na antû baake i ncamba cia ndûa, na batûûragia mûthûûro ta ndûba îtuunyîîtwe twana. Na abaagu i muntû wa ndûa, na atienda kûmaamanîra na antû. 9 Wana kinya îîndî ûûgû eebithîîte îrinyaani, kana bantû aangî. Na rîra njûûrî îmwe ya cietû îkaithûkîrwa rîambere, ûra akeegua mantû mamu akauga, ‘I kûraarî na mbûragano gatîgatî ga antû bara athiingati ba Abusaromu.’ 10 Rîru wana muntû ûra arî ûrûme, na aûmîîte nkoro ta cimba, n'agaatwekia n'ûguaya, n'ûntû Isiraeri yonthe n'iyî abaagu i muntû ûrî inya, na bara barî n'we i ncamba. 11 Kwoogu ûkûrû bwakwa i bûbû, Aisiraeri bonthe kuuma Ndani mwanka Beeriseba, i beethîranue kîrî woû na wingî ta mûthanga wa îria, na ûbatongorie ndûani woû wengwa ûthi. 12 Kwoogu tûkaamwithûkîra wa ara ûkeegua arî, tûmumpe, wa ta bûra maame magwîyagîîra nthîgûrû, rîru we wengwa amwe na antû bara arî nabo gûtirî nwa ûmwe wao tûgaatigaria. 13 Akathûûngîra taûniini îmbirigîre na rûthingo rwa maiga, antû ba Isiraeri bonthe bakaaya na mîkanda taûniini înu, tûkururie n'yo taûni înu mwanka tûmîtûûre kiurooni. Wîgue gûtirî iiga nwa rîmwe rîgaatigwa rîrûûngi.” 14 N'we Abusaromu na antû bonthe ba Isiraeri bauga, “Ûkûrû bûbu bwa Usai Mûariki i bu bwega nkûrûki ya bwa Aithoferi.” N'ûntû Mwathani naabangîîte kûthûûkia kîrîra kîega kîa Aithoferi kaingo areetera Abusaromu kînyamaara.

15 Rîru Usai eera Sandoki na Abiathari athînjîri ba Ngai ûkûrû bûra Aithoferi aarî akwaa Abusaromu na akûrû ba Isiraeri, na ûkûrû bûra we aarî akûbaa. 16 Rîru abeera, “Kwoogu îîndî tûmana ntûmwa na mpwî kîrî Ndaundi eerwe, ‘Îmunthî ûtikaaraare mariûkooni mara marî rwanda, nwa mwanka ûringanîrie rûgongo rûra rûngî, wegua t'ûgu, mûnene na antû bonthe bara arî nabo bakaathirua.’ ”

17 Njonathani na Aimaasi baakaraga beteereete naagu Eni-Rongeri. Mûruti ngûgî ûmwe wa mwarî n'aathiyaga kûbaa ntheto, nabo bakathi kwîra mûnene Ndaundi bûra beerirwe, n'ûntû kwarî nwa mwanka batikoonekane bakîthûngîra taûni înu. 18 Îndî kûrî kaîyî kamwe kaaboonire, na keera Abusaromu. Kwoogu barî baîrî bauma agu na mpwî baathi, baakinya kwa muntû ûmwe aarî na kîthima kîa rûûyî kîaragooni gîake naagu Baurimu. Nabo baathi baathûngîra kîthimaani gîku. 19 Na mwekûrû wa muntû ûyu aathûkia gîkunîkîri aakunîkîra nakîo kîthima gîku, na aacooka aanîka ngano irî mbûûre gîkunîkîriini gîku kaingo ûntû bûbu bûtamenyekana. 20 Na aruti ngûgî ba Abusaromu baaya baakinya kwa mwekûrû ûyu nyomba, bamûûria, “Aimaasi na Njonathani barîkû?” Mwekûrû ûyu abacookeria abeera, “I baaringire kauro.” Na aruti ngûgî babu bakûbacûa bataaboona, baagarûkire bacooka bwa Njerusaremu. 21 Nyumaani aruti ngûgî babu bakûthi, Aimaasi na Njonathani baumîra kîthimaani na baathi beera mûnene Ndaundi bûra Aithoferi amûbangîrîîte. Bamwîra, “Ûkîîraani bûthi bûringe muuro na mpwî.” 22 Rîru mûnene Ndaundi na antû bonthe bara aarî amwe nabo, baûkîîra baathi baaringa Njorondani. Rûkîîrî gûgîkîa gûtirî muntû nwa ûmwe aatigeere ataringîîte muuro wa Njorondani.

23 Aithoferi akwona kîrîra gîake kîra eeyanîîte gîtaathingatwa, eetandîkîra bantû agûkarîra mûgongooni wa îng'ooi rîake eenûka bwa taûni ya kwao. Na aathi aabanga mantû ma mûciî wake, eecuuria na aakua, aathikwa nthikooni ya îthe.

24 Ndaundi n'aarî akûthi aakinya Maanaimu. Na Abusaromu n'aarî akûringa rûgongo rûra rûngî rwa Njorondani we amwe na antû ba Isiraeri bonthe. 25 Abusaromu aatuîkithia Amasa mûtongoria wa njûûrî ya ndûa bantû a Njoabu. Amasa aarî mwana wa muntû wetagwa Ithira Mûisumairi, ûra aagûrîîte Abigairi mwarî wa Naasi, mwaragina wa Seruya, gina wa Njoabu. 26 Na antû ba Isiraeri amwe na Abusaromu baamba marema maao nthîgûrû ya Ngiriandi.

27 Ndaundi agûkinya Maanaimu, Sobi mwana wa Naasi wa kuuma Raba wa antû ba Amoni, na Makiri mwana wa Amieri wa kuuma Rondebari, na Barisirai Mûngiriandi wa kuuma Rogerimu, 28 baareeta mîgeka, iraî, na into bia kûûmba na yûûmba, ngano, sayiri, mûtu, irio biikarange na rûgîo, mbooco na ndengû. 29 Kinya baareeta ûkî bwa njûkî, maguta ma îria na maguta ma ng'ombe, kîrî Ndaundi na antû bara aarî nabo kaingo barîa, n'ûntû baugire, “Antû baba barî na yûûra, na i baanogu, na i bagwatîrîîtwe i bûûta naagu rwanda.”